މި ސަރުކާރު ބަލިކަށި ކުރުމަކީ ރައްޔިތުންނަށް ލާޒިމް ކަމެއް: އިދިކޮޅު

މި ނާގާބިލު ސަރުކާރަށް ނޫނެކޭ ބުނެ މި ސަރުކާރު ބަލިކަށިކޮށްލުމަކީ ދިވެހި ރައްޔިތުންނަށް ލާޒިމް ކަމެއް ކަމަށް އިދިކޮޅުން ބުނެފިއެވެ.

ޕީޕީއެމް އިން ބޭއްވި ނޫސްވެރިންގެ ބައްދަލުވުމުގައި ޕީޕީއެމްގެ ތަރުޖަމާނު ހީނާ ވަލީދު ވިދާޅުވީ އިދިކޮޅުން ހުކުރު ދުވަހު ކުރިއަށް ގެންދިޔަ ސަބަބުވެރި ހިނގާލުމުން އެނގިގެން ދިޔައީ، ކުރީގެ ރައީސް ޔާމީންއަށް ކޮށްފައިވާ ހަރާމް ހުކުމް ރައްޔިތުން ބަލައިނުގަންނަ ކަމާއި ދިވެހި ހުރިހާ ރައްޔިތުން ރައީސް ޔާމީން މިނިވަންކުރަން ބޭނުންވާކަން ކަމަށެވެ.

އެހެންކަމުން މިހާރުން މިހާރަށް ރައީސް ޔާމީން މިނިވަން ކޮށް އިދިކޮޅުގެ ރިޔާސީ ކެންޑިޑޭޓްގެ ގޮތުގައި ހަރަކާތްތެރިވެވޭނެ މަގު ފަހިކޮށްދިނުމަށް އޭނާ ވަނީ ސަރުކާރަށް ގޮވާލާފައެވެ.

މީގެ އިތުރުން، ހީނާ ވިދާޅުވީ 2023 ވަނަ އަހަރާއި ކުރިމަތިލާއިރު ރައްޔިތުންވަނީ ވަރަށް އަތްމަތި ދަތިވެފައިކަމަށާއި ކުރިމަތިލަނީ ގިލަންވެރި 2023 ވަނަ އަހަރަކާ ކަމަށެވެ.

ކަން މިހެން ހުރިއިރު، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު، ދެވަނަ ދައުރަކަށް އިންތިހާބުވުމަށް ނުފުއްދޭނެ ވައުދުތައް ވަމުންކަމަށާ، އެހެން ނަމަވެސް، މި އަހަރު ފެށުމާއި އެކު ބޮޑުވެގެންދާ ޖީއެސްޓީއާއި އެކު ރައްޔިތުންނަށް އިތުރު އެތައް ތަކުލީފު ތަކެއް ލިބިގެން ދާނެ ކަމަށް އޭނާ ވިދާޅުވި އެވެ.

"ކަންކަން މިހެން ހުރި އިރު، ދިވެހި ރައްޔިތުންނަށް މިއަދު ލާޒިމްވެގެންވަނީ މި ނާގާބިލް، ނުކުޅެދޭ، މި ވައްކަން ކުރަމުންދާ ސަރުކާރަށް ނޫނެކޭބުނެ، މި ސަރުކާރު ބަލިކަށި ކޮށްލުން." ހީނާ ވިދާޅުވިއެވެ.

އެހެންކަމުން، އެކަން ކުރުމަށްޓަކައި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަށް ވެރިކަން ހޯދައި ދިނުމަށްޓަކައި ކުރެވެން ހުރި ހުރިހާ ކަމެއް ކުރުމަށްވެސް ހީނާ ވަނީ އެދިވަޑައިގެންފަ އެވެ.