"ހިތަދޫ ޕޯޓުގެ ތަރައްގީއަށް ބޭނުންވާ 170 މިލިއަންގެ ތެރެއިން 40 މިލިއަން ރުފިޔާ މިއަހަރު ހަމަޖެހޭނެ"

އައްޑޫ ސިޓީ ހިތަދޫ ވިޔަފާރި ބަނދަރު ތަރައްޤީ ކުރުމަށް ބޭނުންވާ 170 މިލިއަން ރުފިޔާގެ ތެރެއިން 40 މިލިއަން ރުފިޔާ މި އަހަރު ތެރޭގައި ހަމަޖެހޭނެ ކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު އަދި އެމްޑީޕީ ޕާލިމަންޓްރީ ގްރޫޕްގެ ލީޑަރު މުހައްމަދު އަސްލަމް ވިދާޅުވެއްޖެއެވެ.

މިއަދުގެ ރައްޔިތުންގެ މަޖިލީހުގެ ޖަލްސާގައި، ސްޓްރެޓީޖިކް ޕާޓްނަރޝިޕް އަދި ޕަބްލިކް ޕްރައިވެޓް ޕާޓްނަރޝިޕްގެ ދަށުން އައްޑޫ އެއަރޕޯޓާއި، އައްޑޫ ރީޖަނަލް ސީޕޯޓް ޕްރައިވަޓައިޒްކުރުމަށް ގޮވާލާ ރައްޔިތުންގެ މަޖިލީހަށް ހިތަދޫ މެދު ދާއިރާގެ މެންބަރު އަޙްމަދު ރަޝީދު ހުށަހަޅުއްވާފައިވާ ޤަރާރުގެ ބަހުސް ވަނީ ކުރިއަށް ގެންގޮސްފަ އެެވެ.

އެ ގަރާރަށް ބަހުސް ކުރައްވަމުން އަސްލަމް ވިދާޅުވީ، ވިދާޅުވީ ހިތަދޫ ޕޯޓް ތަރައްޤީކުރަން 170 މިލިއަން ރުފިިޔާ ބޭނުންވާކަމަށާއި އޭގެތެރެއިން 40 މިލިއަން ރުފިޔާ މި އަހަރު ތެރޭގައި ލިބޭނެ ކަމަށެވެ..

"ޕޯޓްގެ ވާހަކަ ދެކެވޭއިރު އަޅުގަނޑު ހަމަ ސީދާ އަދަދު ދަންނަވާލަން ބޭނުންވޭ. ޕޯޓް ތަރައްޤީ ކުރުމަށް މިހާރު އެކުލަވާލާފައިވާ ޕްލޭނަށް ބޭނުންވަނީ 170 މިލިއަން ރުފިޔާ. 170 މިލިއަން ރުފިޔާގެ ތެރެއިން މިއަހަރު 40 މިލިއަން ރުފިޔާ ހަމަޖެހިގެންދާނެކަމުގެ ފުރިހަމަ ގްރީން ސިގްނަލް ވަނީ ލިބިފައި." އަސްލަމް ވިދާޅުވިއެވެ.

އަސްލަމް ވިދާޅުވީ 40 މިލިއަން ރުފިޔާ ހަމަޖެހިގެންދާއިރަށް ހިތަދޫ ޕޯޓް ތަރައްޤީކުރުމުގެ މަސައްކަތް ބާރު ދުވެލީގައި ކުރިއަށްދާނެކަމަށެވެ.

މީގެ އިތުރުން އަސްލަމް ވަނީ ގަން އިންޓަނޭޝަނަލް އެއަރޕޯރޓް ތަރައްޤީކުރުމުގެ މަސައްކަތާއި ގުޅޭ އަދާހަމަވެސް ދެއްވާފައެވެ  އެގޮތުން ވިދާޅުވީ، އެ މަސައްކަތް އިންޑިއާގެ ކޮންސްޓްރަކްޝަން ކުންފުނި، ރެނާޓަސްއާ ހަވާލުކުރުމުގެ އެއްބަސްވުމުގައި މިމަހުގެ 5 ވަނަ ދުވަހު ސޮއި ކުރާނެ ކަމަށެވެ. އަދި އެ ޙަފްލާއަށް ދަޢުވަތުވެސް ލިބިފައިވާ ކަމަށް އަސްލަމް ވިދާޅުވިއެވެ. އަސްލަމް ވިދާޅުވީ އެ ޕްރޮޖެކްޓްގެ ޖުމްލަ އަގަކީ 28.5 މިލިއަން ޑޮލަރު ކަމަށެވެ.

ހިތަދޫ ރީޖަނަލް ޕޯޓް، ދެކުނުގެ މައި ހަބްގެ ގޮތުގައި ހިދުމަތް ދޭން ފެށީ 2009 ވަނަ އަހަރު ޖުލައި މަހު އެވެ. މިއީ މާލެ ފިޔަވައި ރާއްޖޭގައި އޮޕަރޭޓް ކުރާ ތިން ބަނދަރުގެ ތެރޭގައި ހިމެނޭ އެއް ބަނދަރެވެ.