ރިޔާސީ އިންތިހާބުގައި ރައީސް ޔާމީނުގެ ޑެޕިއުޓީ ކެމްޕޭން މެނޭޖަރަކަށް ނާޒިމް
މި އަހަރު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި އިދިކޮޅު ޕީޕީއެމް/ޕީއެންސީގެ އަބްދުالله ޔާމީން އަބްދުލްޤައްޔޫމުގެ ޑެޕިއުޓީ ކެމްޕޭން މެނޭޖަރަކަށް ކުރީގެ ހެލްތު މިނިސްޓަރު އަބްދުالله ނާޒިމް ހަމަޖައްސަވައިފިއެވެ.
ނާޒިމަށް ޑެޕިއުޓީ މެނޭޖަރުކަމުގެ ލިޔުން ހަވާލުކޮށްދެއްވީ އިދިކޮޅު ކޯލިޝަން ހިންގުމާއި ވަގުތީ ގޮތުން ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله (އަދުރޭ)އެވެ.
ރައީސް ޔާމިނަށް ޕީޕީއެމްގެ ރިޔާސީ ޓިކެޓު ދޭން ނިންމާފައިވަނީ އެ ޕާޓީގެ ޖޮއިންޓު ކައުންސިލްގެ އިއްތިފާގުންނެވެ. އެފަހުން ބޮޑު ހަފްލާއެއްގެ ތެރެއިން ރާއްޖޭގެ ހުރިހާ ރަށްތައް ތަމްސީލުވާގޮތަށް މަންދޫބުންގެ އަތްޕުޅުން ރައީސް ޔާމިނަށް ވަނީ ރިޔާސީ ޓިކެޓު ހަވާލުކުރައްވާފަ އެވެ.
އެހެން ނަމަވެސް މިވަގުތު ރައީސް ޔާމީން ގެންދަވަނީ ވ އާރަށުގެ މުއާމަލާތާއި ގުޅުވާ އެމަނިކުފާނުގެ މައްޗަށް އުފުލި ދައުވާތައް ސާބިތުވާކަމަށް ކަނޑައަޅާ މިދިޔަ ޑިސެމްބަރު މަހުގެ 25ގައި ކްރިމިނަލް ކޯޓުން އިއްވި 11 އަހަރުގެ ޖަލު ހުކުމް ތަންފީޒް ކުރައްވަމުންނެވެ.
އެ ހުކުމް މިހާރު ރައީސް ޔާމީންގެ ފަރާތްޕުޅުން އިސްތިއުނާފުކޮށްފައިވާއިރު، ހައިކޯޓު މަރުހަލާއިން އެމަނިކުފާނު މިނިވަންވާނެކަމުގެ ފުރިހަމަ ޔަގީންކަން އޮތްކަމަށް ރައީސް ޔާމީންގެ ޤާނޫނީ ޓީމުން ވަނީ ވިދާޅުވެފަ އެވެ. އަދި އެމަނިކުފާނަށް ކެމްޕޭނު ކުރުމުގެ ފަހި ފުރުސަތެއް ލިބިގެންދާނެކަމަށް ގާނޫނީ ޓީމުން ވިދާޅުވެފައި ވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
