ސްޕީޑް 100 އަށްވުރެ މަތީގައި ބަހައްޓައިގެން ޓިކްޓޮކް ކުޅުނު ސައިކަލު ޓޯވް ކޮށްފި

ސައިކަލުގެ ސްޕީޑް ގަޑިއަކު 100 ކިލޯމީޓަރަށްވުރެ މަތީގައި ބަހައްޓައިގެން ނުރައްކާތެރިކޮށް ދުއްވައި، ޓިކްޓޮކް ވީޑިއޯއެއް ހެދި މައްސަލައިގައި ހިމެނޭ ސައިކަލު ފުލުހުންގެ ބެލުމުގެ ދަށަށް ގެންގޮސް ޓޯވް ކޮށްފިއެވެ.

މިކަމާ ގުޅިގެން 'ވޮއިސް' އަށް މައުލޫމާތު ދެމުން ފުލުހުން ބުނީ، ސޯޝަލް މީޑިއާގައި ދައުރުވި އެ ވީޑިއޯގެ މައްސަލަ ފުލުހުންގެ ސަމާލުކަމަށް އައުމާ ގުޅިގެން، އެ މައްސަލައަށް އެޓެންޑްވެ ފިޔަވަޅު އަޅައި އެ ސައިކަލު މިހާރު ޓޯވް ކޮށްފައިވާ ކަމަށެވެ.

ހޯމަ ދުވަހުގެ ތެރޭގައި ސޯޝަލް މީޑިއާ އެޕްލިކޭޝަން ޓިކްޓޮކްގައި އާންމުކުރި މި ވީޑިއޯއިން ފެންނަ ގޮތުގައި، އެ ސައިކަލު ދުއްވާފައިވަނީ ގަޑިއަކު 125 ކިލޯމީޓަރަށްވުރެ ވެސް ބާރު ސްޕީޑުގައެވެ.

ފަހަކަށް އައިސް މާލެއާއި ހުޅުމާލެ ގުޅުވައިދޭ ސިނަމާލެ ބްރިޖާއި ހައިވޭގައި ނުރައްކާތެރިކޮށް އުޅަނދުފަހަރު ދުއްވާ މައްސަލަތައް ވަނީ ބޮޑުތަނުން އިތުރުވެފައެވެ. ވަކިން ހާއްސަކޮށް، ބައެއް ޒުވާނުން ސޯޝަލް މީޑިއާގައި "މޮޅެތި" ވީޑިއޯތައް ހިއްސާކޮށް ވައިރަލް ކުރުމުގެ ބޭނުމުގައި، އަމިއްލަ ނަފުސަށާއި މަގުމަތީގެ އެހެން ބޭނުންކުރާ ފަރާތްތަކުގެ ފުރާނައަށް ނުރައްކާވާ ގޮތަށް ބާރު ސްޕީޑުގައި ދުއްވުމަކީ އާންމު ކަމަކަށް މިހާރު ވަނީ ވެފައެވެ.

މިފަދަ މައްސަލަތަކާ ގުޅިގެން މީގެ ކުރިން ފުލުހުން ބުނެފައިވަނީ، މަގުމަތީގައި ނުރައްކާތެރިކޮށް އުޅަނދުދުއްވާ ފަރާތްތަކުގެ ތެރެއިން އެ އަމަލު ތަކުރާރުކުރާ ފަރާތްތަކުގެ ވަނަވަރު އާންމުކުރަމުން ގެންދާނެ ކަމަށެވެ. އަދި މިފަދަ ކަންކަމާ ގުޅިގެން އާންމުން ހިއްސާކުރާ ފޮޓޯއާއި ވީޑިއޯ ފަދަ މައުލޫމާތުގެ ސައްހަކަން ކަށަވަރުކުރުމަށްފަހު، ގާނޫނީ ގޮތުން އަޅަންޖެހޭ އެންމެހައި ފިޔަވަޅުތައް އަޅަމުން ގެންދާނެ ކަމުގެ ޔަގީންކަން ވެސް ފުލުހުން ވަނީ ދީފައެވެ.

މީގެ އިތުރުން، މިފަދަ ޒިންމާދާރުކަން ކުޑަ އަދި ނުރައްކާތެރި އަމަލުތަކުގައި ސަރުކާރުގެ ބައެއް މުއައްސަސާތަކާއި ކުންފުނިތަކުގެ މުވައްޒަފުން ޝާމިލުވާކަން ދިވެހި ފުލުހުންގެ ޚިދުމަތަށް ފާހަގަކުރެވިފައިވާ ކަމަށް ވެސް ފުލުހުން ބުންޏެވެ. އެހެންކަމުން، އެ ފަރާތްތަކާމެދު އިދާރީ ފިޔަވަޅުތައް އެޅުމަށްޓަކައި، ކަމާބެހޭ މުއައްސަސާތަކަށް އެ މައުލޫމާތުތައް ފުލުހުންގެ ފަރާތުން ގެންދަނީ ހިއްސާކުރަމުންނެވެ.

ފުލުހުން އިތުރަށް ހާމަކުރި ގޮތުގައި، އާންމު ރައްޔިތުންގެ ހިތްތަކުގައި ބިރުވެރިކަން އުފެދޭގޮތަށް މަގުމަތީގައި ނުރައްކާތެރިކޮށް އުޅަނދު ދުއްވުން ތަކުރާރުކުރާ ފަރާތްތައް ހުއްޓުވައި، އެ ފަރާތްތަކާމެދު ހަރުކަށި ފިޔަވަޅު އެޅުމަށް މިހާރު ވަނީ ހާއްސަ މަސައްކަތްތަކެއް ފަށާފައެވެ.

މި މަސައްކަތުގެ ދަށުން، ނުރައްކާތެރިކޮށް އުޅަނދު ދުއްވާ ފަރާތްތައް ދެނެގަނެ، އެ ފަރާތްތަކުގެ މައުލޫމާތު ޕްރޮފައިލްކުރުމުގެ މަސައްކަތް މިހާރު ދަނީ ބާރަށް ކުރެވެމުންނެވެ. އަދި މިފަދަ ފަރާތްތައް ދިވެހި ފުލުހުންގެ ޚިދުމަތަށް ހާޒިރުކޮށް ފުރަތަމަ މަރުހަލާގައި ނަސޭހަތްތެރިވުމަށްފަހު، އެ އަމަލުތައް ތަކުރާރުކުރާ ފަރާތްތަކާމެދު، ޓްރެފިކް ގާނޫނާއި ގަވާއިދުތަކުގެ ދަށުން ކުރިން ކުރަމުން އައި ޖޫރިމަނާގެ އިތުރުން، އެއްވެސް އިންޒާރަކާ ނުލައި ޖިނާއީ ތަހުގީގެއް ހިންގާނެ ކަމަށް ވެސް ފުލުހުން ވަނީ ބުނެފައެވެ.