ތިލަމާލެ ބްރިޖުގެ އަދާހަމަ؛ ވިލިމާލެއާއި ގުޅިފަޅު ގުޅުވުމުގެ މަސައްކަތް މިމަހު ނިންމަނީ

ތިލަމާލެ ބުރިޖު މަޝްރޫއުގެ ދެވަނަ ބުރިޖުގެ ގޮތުގައި ވިލިމާލެއާއި ގުޅިފަޅާ ދެމެދު އަޅާ ބުރިޖުގެ މަސައްކަތް މިމަހުގެ ނިޔަލަށް ފުރިހަމަކުރުމަށް އަމާޒު ހިފާފައިވާ ކަމަށް ބިނާރާއި ގެދޮރުވެރިކަމާއި އުމްރާނީ ތަރައްގީއާ ބެހޭ ވުޒާރާއިން ހާމަކޮށްފިއެވެ.

ބިނާރާއި ގެދޮރުވެރިކަމާއި އުމްރާނީ ތަރައްގީއާ ބެހޭ ވަޒީރު، ޑރ. އަބްދުﷲ މުއްތަލިބް ޕީއެސްއެމް ނިއުސްއަށް މައުލޫމާތު ދެއްވަމުން ވިދާޅުވީ، ވިލިމާލެއާއި ގުޅިފަޅާ ދެމެދުގައި ނުގުޅި އޮތީ އެންމެ ސެގްމަންޓެއް ކަމަށެވެ. ބުރިޖުގެ ތަނބުތައް ގުޅާލާ ކޮންމެ ސެގްމަންޓަކީ ގުޅިފަޅުގެ ސައިޓުގައި ޕްރީ ފެބްރިކޭޓްކޮށް ގެނެސް ހަރުކުރާ ބައިތަކެކެވެ. މި ބުރިޖުގެ ދިގުމިނަކީ ގާތްގަނޑަކަށް 750 މީޓަރެވެ.

މާލެ ސަރަހައްދު ގުޅާލާ މި ބިޔަ މަޝްރޫއުގެ ޖުމްލަ ދިގުމިނަކީ 6.7 ކިލޯމީޓަރެވެ. އޭގެ ތެރޭގައި ކަނޑު ހުރަސްކޮށް ހަދާ ތިން ބުރިޖާއި ރަށްރަށް ހުރަސްކޮށް ހަދާ ހައިވޭތައް ހިމެނެއެވެ. ފުރަތަމަ ބައި ކަމުގައިވާ މާލެއާއި ވިލިމާލެ ގުޅާލުމުގެ މަސައްކަތް އޮގަސްޓް މަހުގެ ފަހު ހަފުތާގައި ވަނީ ނިންމައިފައެވެ. ގުޅިފަޅުން ތިލަފުއްޓާ ދެމެދު ހަދަނީ ގާތްގަނޑަކަށް 600 މީޓަރުގެ ބުރިޖެކެވެ. އެ ބުރިޖާ ގުޅިފަޅު ގުޅޭނީ 2.5 ކިލޯމީޓަރުގެ ހައިވޭއެއް މެދުވެރިކޮށެވެ.

މާލެ-ވިލިމާލެ ބުރިޖުގައި މިވަގުތު ހިނގަމުން ދަނީ ފިނިޝިން މަރުހަލާގެ މަސައްކަތްތަކެވެ. އެގޮތުން ދެ ފަރާތަށް ދުއްވާ ލޭންތައް ވަކިކުރާ މީޑިއަން ބެރިއާ ޖެހުމާއި، ތާރު އެޅުމުގެ ކުރިން ޑެކުގައި ކުރަންޖެހޭ މަސައްކަތްތައް ކުރިއަށް ގެންދާ ކަމަށް އެ މިނިސްޓްރީން ވިދާޅުވެއެވެ. ރެއިލިން ހަރުކުރުމާއި މަގު ބައްތިއާއި ސީސީޓީވީ ހަރުކުރުމުގެ ތައްޔާރީތައް ވެސް ކުރިއަށް އެބަ ދެއެވެ.

މުޅި މަޝްރޫއުގެ 77 އިންސައްތަ މިހާރު ވަނީ ނިމިފައެވެ. އިންޑިއާގެ ލައިން އޮފް ކްރެޑިޓާއި ދިވެހި ސަރުކާރުގެ ބަޖެޓުން ހަރަދުކޮށްގެން ހިންގާ މި 500 މިލިއަން ޑޮލަރުގެ މަޝްރޫއު އެއްކޮށް ނިންމައިލުމުގެ އަމާޒަކީ އަންނަ އަހަރުގެ ނިޔަލެވެ.

ފާހަގަކޮށްލެވޭ ގޮތެއްގައި މިއީ ރާއްޖޭގައި މިވަގުތު ހިނގާ އެންމެ ބޮޑު އުމްރާނީ އެއް މަޝްރޫއުއެވެ.