ބޯޓު އަޑިއަށް ދިއުމާ ގުޅިގެން ރައްޔިތުންނަށް ގޭހާއި ކާޑަށް ދަތިވެދާނެ: މަޑުއްވަރީ ކައުންސިލް

މުދާ ބަރުކޮށްގެން މާލެއިން ފުރައިގެން ރ.އަތޮޅަށް ދަތުރުކުރަމުންދިޔަ މުދާ އުފުލާ ބޯޓު އަޑިއަށް ދިއުމާ ގުޅިގެން ރައްޔިތުންނަށް ގޭހާއި ކާޑަށް ދަތިވާނެ ކަމަށް ރ. މަޑުއްވަރީ ކައުންސިލުން ބުނެފިއެވެ.

މި ހާދިސާއާ ގުޅިގެން މަޑުއްވަރީ ކައުންސިލުން ނެރުނު ނޫސްބަޔާނުގައި ބުނީ، އެރަށު "އާލާ" ބޯޓު ބ. އޭދަފުށި ކައިރިއަށް އަޑިއަށް ދިއުމަކީ މަޑުއްވަރީއާއި ކައިރި ރަށްރަށުގެ ރައްޔިތުންނަށް ލިބުނު ބޮޑު ހިތާމައެއް ކަމަށެވެ.

މި ހާދިސާއާ ގުޅިގެން ވިޔަފާރި ވެރިންނަށާއި އަމިއްލަ ފަރާތްތަކަށް ބޮޑެތި ގެއްލުންތަކެއް ލިބިފައި ވާނެކަމަށް މަޑުއްވަރީ ކައުންސިލުން ބުނެއެވެ.

މަޑުއްވަރީ ކައުންސިލުން ވަނީ، މި ހާދިސާއާ ގުޅިގެން އެކި ގޮތްގޮތުން އެހީވި އެންމެހާ ފަރާތްތަކަށް ޝުކުރު އަދާކޮށްފައެވެ.

މި ހާދިސާގެ ސަބަބުން މަޑުއްވަރީގެ ރައްޔިތުންނަށް ކައްކާ ގޭހާއި ކާޑުގެ ބާވަތްތައް ލިބުން ދަތިވެދާނެތީ، އެކަމާ ގުޅުންހުރި ފަރާތްތަކުގެ ސަމާލުކަމަށް ދަންނަވާފައި ވާނެ ކަމަށް މަޑުއްވަރީ ކައުންސިލުން ބުންޏެވެ.

އަދި އެތަކެތި ވީ އެންމެ އަވަހަކަށް މަޑުއްވަރިއަށް ގެންދެވޭނެ އިންތިޒާމު ހަމަޖެއްސުމަށް މަސައްކަތް ކުރާ ކަމަށް މަޑުއްވަރީ ކައުންސިލުން ބުންޏެވެ.