"އިންޑިއާ އައުޓު" ހަރަކާތް ހުއްޓުވޭނެ އެއްގޮތެއް ވެސް ނޯންނާނެ: މުޙައްމަދު އިސްމާއިލް

ދިވެހިރާއްޖޭގައި ޤާއިމްވެގެން ތިބި އިންޑިއާ ސިފައިންނާއި ދެކޮޅަށް އިދިކޮޅު ކޯލިޝަނުން އިސް ނަގައިގެން ފަށާފައިވާ "އިންޑިއާ އައުޓު" ހަރަކާތް ހުއްޓުވޭނެ ހަމަ އެއްގޮތެއް ވެސް ނޯންނާނެކަމަށް އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ އަދި މަޖިލީހުގެ ހޯރަފުށީ ދާއިރާގެ މެމްބަރު މުޙައްމަދު އިސްމާއިލް ވިދާޅުވެއްޖެ އެވެ.

މުޙައްމަދު އިސްމާއިލް މިފަދައިން ވިދާޅުވެފައި ވަނީ ޢީދު ބަންދުގައި އިދިކޮޅުން ކުރިއަށް ގެންދިޔަ މުޒާހަރާއެއްގައި އިންޑިއާގެ ބޮޑުވަޒީރު ނަރެންދްރަ މޯދީގެ މޫނުމަތިތަކެއް ޖަހާފައިވާ މާސްކުތަކެއް ބޭނުންކޮށްގެން ކުރިއަށް ގެންދިޔަ ހަރަކާތް ސަރުކާރުން ކުށްވެރިކޮށް ބަޔާނެއް ނެރެފައިވާ ދަނޑިވަޅެއްގައި ކުރެއްވި ޓްވީޓެއްގަ އެވެ.

މުޙައްމަދު އިސްމާއިލް ވިދާޅުވީ އިދިކޮޅު ކޯލިޝަންގެ އެކްޝަން ޑިޕާޓުމަންޓު ހަދައި، މިހާތަނަށް އެ ޑިޕާޓުމަންޓުން ކޮށްފައިވާ ކަންކަމަށް ބަލާއިރު ރައްޔިތުންގެ މަސްލަހަތާއި ގުޅުންހުރި ވަރަށް ގިނަ ކަންކަމުގައި އަޑުއުފުލުގެ މަގުފަހިކޮށްދީ އެކި ހަރަކާތްތައް ހިންގާފއިވާނެ ކަމަށެވެ.

"އަޅުގަނޑުމެން ވާނީ ރޭޕް ކޭސްތަކުން އަނިޔާވި ފަރާތްތަކަށް ހައްގު ހޯދުމަށް، އިންޑިއާ ސިފައިން ރާއްޖެގަ ތިބުމާ ދެކޮޅަށް، ދިވެހި ރައްޔިތުންގެ ފައިސާ ނަހަމަ ގޮތުގައި ބޭނުން ކުރުމާއި ދެކޮޅަށް އަދި ގޮތް ނޭގޭ މަރުތަކުގެ ހައްގު ހޯދުމަށް ނުހުއްޓި ސުލްހަވެރި އިހުތިޖާޖު ކޮށްފައެވެ. މީގެން އިތުރުންވެސް ދިވެހި ރައްޔިތުންގެ ހައްގުގައި އެތައް ހަރަކާތެއް ހިންގާފަ"

މިޙައްމަދު އިސްމާއިލް

މުޙައްމަދު އިސްމާއިލް އިތުރަށް ވިދާޅުވީ ރާއްޖޭގައި ޤަވައިދާއި ޚިލާފަށް ތިބި އިންޑިއާ ސިފައިން އަނބުރާ ފޮނުވާލުމަށް ކުރިއަށް ގެންދާ ހަރަކާތަކީ އިދިކޮޅު ކޯލިޝަންގެ ލީޑަޝިޕްގެ ފުރިހަމަ ތާއީދާއެކު ހިންގާ ހަރަކާތްތަކެއް ކަމަށެވެ. އަދި އެ ހަރަކާތް ހުއްޓުވުމަށް ކިތަންމެ މަސައްކަތެއް ކުރި ނަމަވެސް ހަރަކާތް ހުއްޓުވޭނެ ގޮތެއް ވެސް ނޯންނާނެކަމަށް އޭނާ ވިދާޅުވި އެވެ.

"އިންޑިއާ އައުޓު ހަރަކާތަކީ ޕީޕީއެމް ލީޑާޝިޕް ގެ ފުރިހަމަ އެއްބާރުލުން އަދި ބައިވެރިވުން ލިބިގެން ހިންގާ ހަރަކާތަކަށް ވުމުން އިންޑިއާ އައުޓް ހަރަކާތް ހުއްޓުވޭނެ އެއްވެސްގޮތެއް ނޯންނާނެކަން ދަންނަވަން"

މުޙައްމަދު އިސްމާއިލް

ޕީޕީއެމްގެ ވެރިކަމެއްގައި ޤަވައިދާއި ޚިލާފަށް ރާއްޖޭގެ އެކި ކަންކޮޅުތަކުގައި ތިބި އިންޑިއާ ސިފައިން އަނބުރާ ފޮނުވާލާނެކަމަށް ވާދަވެރި ސިޔާސީ ލީޑަރު ރައީސް އަބްދުﷲ ޔާމީން އަބްދުލްގައްޔޫމު ވެސް ވަނީ ވިދާޅުވެފަ އެވެ.

އަދި އިންޑިއާއިން ރާއްޖޭގެ ދާޚިލީ ކަންކަމަށް ބަސްބުނެ، ގޮތް ނިންމުމުގެ ފުރުސަތުވެސް ނުދެއްވާނެ ކަމަށާއި، އެފަދަ ކަންކަން ނުކުރުމަށް އިންޑިއާއަށް ނަސޭހަތްތެރިވާކަމަށް ވެސް ރައީސް ޔާމިނު ވަނީ ތަކުރާރުކޮށް ވިދާޅުވެފަ އެވެ.