އީސީގެ ނިންމުން ބަލައިނުގަންނަން؛ ސްޕްރީމްކޯޓުން އެ ނިންމުން ބާތިލު ކުރާނެ: ޕީޕީއެމް

އިދިކޮޅު ރިޔާސީ ކެންޑިޑޭޓް، ޕީޕީއެމްގެ ރައީސް، ރައީސް ޢަބްދުالله ޔާމީން ޢަބްދުލްޤައްޔޫމްގެ ކެންޑިޑަސީއާއި މެދު އިލެކްޝަންސް އިން ނިންމި ނިންމުން ބަލައި ނުގަންނަ ކަމަށާ، އެ މައްސަލަ ސުޕްރީމް ކޯޓަށް ހުށަހެޅުމުގެ މަސައްކަތް ކުރަމުންދާ ކަމަށް އިދިކޮޅުު ޕީޕީއެމް ޕީއެންސީން ބުނެފިއެވެ.

މިއަހަރުގެ ސެޕްޓެމްބަރު 9 ވަނަ ދުވަހު ބާއްވާ ރިޔާސީ އިންތިހާބުގައި އިދިކޮޅު ޕީޕީއެމް/ޕީއެންސީގެ ފަރާތުން ވާދަކުރައްވާ ކުރީގެ ރައީސް އަބްދުالله ޔާމީން އަބްދުލްގައްޔޫމްގެ ކެންޑިޑެސީ ފޯމު އިލެކްޝަންސް ކޮމިޝަނަށް މިއަދު ހުށަހަޅާފައިވާއިރު، އީސީން ވަނީ ފޯމު ބަލައި ނުގަންނަން ނިންމާފައެވެ.

އެ ފޯމު ބަލައި ނުގަންނަން އީސީން ދާދި ދެންމެ ނިންމާފައިވާއިރު، އޭގެ ސަބަބެއްކަމަށް އެ ކޮމިޝަނުން ބުނަނީ އެމަނިކުފާނަކީ ޖަލު ހުކުމެއް ތަންފީޒުކުރާ ބޭފުޅަކަށް ވުމެވެ.

އެކަމާއި ގުޅިގެން އިދިކޮޅު ކޯލިޝަނުން ނެރުނު ނޫސް ބަޔާނެއްގައި ބުނީ، ރައީސް ޔާމީންގެ ފަރާތްޕުޅުން މިއަދު އިލެކްޝަންސް ކޮމިޝަނަށް ހުށަހެޅުއްވި ހުށަހެޅުއްވުން ޤަބޫލުނުކުރުމަށް އެ ކޮމިޝަނުން ނިންމި ނިންމުމަކީ ޞައްޙަ ނިންމުމެއް ކަމަށް އެ ކޯލިޝަން ނުދެކޭ ކަމަށެވެ.

އެހެންކަމުން، އިލެކްޝަންސް ކޮމިޝަންގެ ނިންމުން ޤާނޫނު ނަންބަރު 2008/11 (އިންތިޚާބުތަކާބެހޭ ޢާންމު ޤާނޫނު) ގެ 21 ވަނަ މާއްދާގެ (ބ) ގައި ބަޔާންކޮށްފައިވާ ގޮތުގެ މަތިން ސުޕްރީމް ކޯޓަށް ހުށަހެޅުމަށްޓަކައި ކުރަންޖެހޭ އެންމެހައި މަސައްކަތްތައް ރައީސް ޔާމީންގެ ވަކީލުންގެ ޓީމުން ކުރިއަށް ގެންދާ ކަމަށްވެސް ބުނެފައިވެއެވެ.

"އަދި ސުޕްރީމް ކޯޓުން އިލެކްޝަންސް ކޮމިޝަންގެ ނިންމުން ބާޠިލުކޮށް، ރައީސް ޔާމީންގެ ކެންޑިޑަސީގެ ޞައްޙަކަން ކަށަވަރުވެގެން ދާނެކަމީ އެއްވެސް ޝައްކެއް އޮތް ކަމެއް ނޫން ކަމުގައި ދެންނެވީމެވެ." އިދިކޮޅުގެ ބަޔާނުގައި ބުނެފައިވެއެވެ.

އީސީގެ ނިންމުން ސްޕްރީމް ކޯޓަށް ހުށަހަޅާއިރު, އެ ކޮމިޝަނުގެ ނިންމުމާމެދު ހިތްހަމަނުޖެހޭނަމަ ޝަރީއަތުގައި އެ ނިންމުމާ ޗެލެންޖު ކުރުމުގެ ފުރުސަތު އޮންނާނެކަމަށް އީސީން ވަނީ ބުނެފައެވެ.
އެގޮތުން، އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބް މިއަދު ވިދާޅުވީ އިލެކްޝަންސް ކޮމިޝަން ނިންމި ގޮތާ މެދު ހިތްހަމަނުޖެހޭ ނަމަ، އިލެކްޝަންސް ކޮމިޝަނަށް ފޯމު ހުށަހަޅުއްވާތާ 48 ގަޑިއިރު ފަހުން ފަސް ދުވަސް ތެރޭ އެ މައްސަލަ ސުޕްރީމް ކޯޓަށް ހުށަހަޅުއްވަން ޖެހޭނެ ކަމަށެވެ.

"ދެން ސުޕްރީމް ކޯޓަށް މައްސަލަ ހުށަހެޅުއްވީ ހަތް ދުވަހުގެ ތެރޭގައި އެ މައްސަލަ ނިންމުމަށް ގާނޫނުން ލާޒިމް ކުރޭ." ހަބީބް ވިދާޅުވިއެވެ.