ޕްރިމިއާ ލީގް: އާސެނަލްއިން އެސްޓަން ވިލާ ބަލިކޮށް ފުރަތަމަ ފަސް މެޗުން މޮޅުވެއްޖެ

އާސެނަލްއިން އެސްޓަން ވިލާ ބަލިކޮށް މި ސީޒަނުގެ ޕްރިމިއާ ލީގުގައި އެ ޓީމުން ކުޅުނު ފުރަތަމަ ފަސް މެޗު ކާމިޔާބު ކޮށްފިއެވެ.

ވިލާ އާއި ދެކޮޅަށް ކުޅުނު މެޗު އާސެނަލް އިން ކާމިޔާބުކުރީ 1-2 ގެ ނަތީޖާއަކުންނެވެ. މިއީ އާސެނަލްއިން މި ފަހުން އެންމެ ކާމިޔާބުކޮށް ޕްރިމިއާ ލީގު ފެށި ސީޒަންކަން ފާހަގަ ކޮށްލެވެއެވެ. އެގޮތުން މިދިޔަ ސީޒަނުގެ ފުރަތަމަ ފަސް މެޗު ނިމުނު އިރު އެ ޓީމު އޮތީ ރެލިގޭޝަން ޒޯނުގައެވެ.

މެޗަށްފަހު ވާހަކަ ދައްކަމުން އާސެނަލްގެ ކޯޗު މިކެލް އާޓެޓާ ބުނެފައިވަނީ މި މޮޅާއިމެދު ވަރަށް ހިތްހަމަ ޖެހޭކަމަށެވެ. ނަމަވެސް ޕްރިމިއާ ލީގުގައި މޮޅުވުމަކީ ފަސޭހަ ކަމެއް ނޫން ކަަމަށާއި މި މެޗުގެ ފުރަތަމަ ހާފަކީ މި ސީޒަނުގައި އެ ޓީމުގެ ފަރާތުން ފެނިގެންދިޔަ އެންމެ މޮޅު ކުޅުން ކަމަށެވެ.

އާސެނަލްގެ ދަނޑުގައި ކުޅެވުނު މި މެޗުގައި ފުރަތަމަ ލީޑު ނެގީވެސް އާސެނަލްއިންނެވެ. އެގޮތުން މެޗުގެ 30 ވަނަ މިނަޓުގައި އާސެނަލްގެ މާޓިނެލީ ފޮނުވާލި ބޯޅައެއް ވިލާގެ ކީޕަރު މާޓިނޭޒްގެ އަތުގައި ޖެހިފައި ނުކުތުމުން އާސެނަލްއަށް ގޯލު ކާމިޔާބު ކޮށްދިނީ ގެބްރިއެލް ޖީސަސް އެވެ. އާސެނަލްއިން ގިނަ ހަމަލާތަކެއް އުފެއްދި މި ހާފުގައި އިތުރު ގޯލެއް އެ ޓީމަށް ނުޖެހި ހާފު ނިމިގެން ގޮސްފައިވަނީ 0-1 ގެ ނަތީޖާއަކުންނެވެ.

މެޗުގެ ދެވަނަ ހާފުގައި ވިލާއިން ވަނީ ކުޅުން ރަނގަޅު ކޮށްފައެވެ. އެގޮތުން މެޗުގެ 74 ވަނަ މިނަޓުގައި ސީދާ ކޯނަރަކުން އެ ވިލާގެ ޑަގްލަސް ލުއިޒް ވަނީ އެ ޓީމަށް ނަތީޖާ ހަމަހަމަ ކޮށްދީފައެވެ. ނަމަވެސް އާސެނަލްއިން ނަތީޖާ ބަދަލު ކޮށްލުމަށް ނެގީ ތިން މިނެޓެވެ. މެޗުގެ 74 ވަނަ މިނަޓުގައި އާސެނަލްގެ ގެބްރިއެލް މާޓިނެލީ ވަނީ އެ ޓީމަށް އަލުން ލީޑު ނަގައިދީފައެވެ.

މެޗުގެ ފަހު ވަގުތު ކޮޅުގައި ވިލާއިން ވަނީ އާސެނަލްގެ ގޯލަށް ވަރަށް ބޮޑަށް ނުރައްކާ ކޮށްފައެވެ. ނަމަވެސް އާސެނަލްއިން ވަނީ މެޗުގެ ވަގުތު ހަމަވަންދެން ދިފާއުކޮށް ވިލާއަށް އިތުރު ގޯލެއް ޖެހުމުގެ ފުރުސަތު ނުދީފައެވެ.

އާސެނަލްއިން އަންނަ އާދިއްތަ ދުވަހުގެ ރޭ ނިކުންނާނީ ވާދަވެރި މެންޗެސްޓާ ޔުނައިޓެޑާއި ދެކޮޅަށެވެ. ޔުނައިޓެޑުގެ ދަނޑުގައި ކުޅެވޭ މި މެޗު ވެގެންދާނީ މި ސީޒަނުގެ ލީގުގައި މިހާތަނަށް ކުޅެވޭ އެންމެ ވާދަވެރި މެޗު ކަމުގައި ބެލެވެއެވެ.