ޕްރިމިއާ ލީގު: ފަހު ސިކުންތުގައި ކަވާލިއޯ ޖެހި ގޯލުން ލިވަޕޫލު މޮޅުވެއްޖެ

ޕްރިމިއާ ލީގުގައި މެޗުގެ ފަހު ސިކުންތުގައި ލިވަޕޫލުގެ ފަބިއޯ ކަވާލިއޯ ޖަހައިދިން ގޯލުން އެ ޓީމުން ނިއުކާސަލްގެ މައްޗަށް ކުރިހޯދައިފިއެވެ.

ލިވަޕޫލުގެ ދަނޑު އެންފީލްޑުގައި ކުޅުނު މި މެޗުގައި ލިވަޕޫލު މޮޅުކޮށްދިން ގޯލު ކަވާލިއޯ ޖަހައިދީފައިވަނީ މެޗުގެ 90 މިނަޓު ހަމަވެ ދެއްކި އިތުރު ވަގުތުގެ އަށްވަނަ މިނަޓުގެ ތެރޭގައެވެ. މެޗުގެ ފުރިހަމަ ވަގުތު ހަމަވެގެން ދެއްކީ ފަސް މިނަޓު ނަަމަވެސް އެއަށްވުރެ އިތުރަށް ކުޅުމުން ނިއުކާސަލްގެ އޮފިޝަލުން އަދި ކުޅުންތެރިން ވަނީ ވަރަށް ބޮޑަށް ނުރުހުން ފާޅުކޮށްފައެވެ.

މެޗަށްފަހު ވާހަކަ ދައްކަމުން ލިވަޕޫލުގެ ކޯޗު ކްލޮޕް ބުނެފައިވަނީ ނިއުކާސަލް އާއި ދެކޮޅަށް ކުޅުނު މެޗަކީ އުނދަގޫ މެޗެއް ކަމަށާއި، ދެ ޓީމުގެ ފަރާތުންވެސް ވާދަވެރިކަން ފެނިގެންދިޔަ ކަމަށެވެ. އަދި ޓީމުގައި ރަނގަޅުކުރަން ޖެހޭ ގިނަ ކަންކަން ހުރިކަމަށް ކްލޮޕް ބުނެފައިވެއެވެ.

ރޭގެ މެޗުގައި ފުރަތަމަ ލީޑު ނެގީ ނިއުކާސަލް އިންނެވެ. މެޗުގެ 38 ވަނަ މިނަޓުގައި އެ ޓީމަށް ގޯލު ކާމިޔާބު ކޮށްދީފައިވަނީ މި ހަފްތާ އެ ޓީމާއި ގުޅުނު އެލެކްސެންޑްރާ އިސާކްއެވެ. މި މެޗަކީ އިސާކް ޕްރިމިއާ ލީގުގައި ކުޅުނު ފުރަތަމަ މެޗެވެ.

ނިއުކާސަލްއިން ރަނގަޅު ކުޅުމެއް ދެއްކި މެޗުގެ ފުރަތަމަ ހާފު ނިމިގެން ގޮސްފައިވަނީ 0-1 އިން އެ ޓީމު ކުރީގައި އޮވެގެންނެވެ.

މެޗުގެ ދެވަނަ ހާފުގައި ލިވަޕޫލުން ވަނީ ކުޅުން ރަނގަޅު ކޮށްފައެވެ. އެ ގޮތުން މެޗުގެ 61 މިނަޓުގައި ލިވަޕޫލުން ވަނީ މެޗުގެ ނަތީޖާ ހަމަހަމަ ކޮށްދީފައެވެ. މި ގޯލު އެ ޓީމަށް ކާމިޔާބު ކޮށްދީފައިވަނީ ރޮބާޓޯ ފާމީނޯއެވެ. މެޗުން ލިވަޕޫލު މޮޅުކޮށްދިން ގޯލު ފަހު ސިކުންތުގައި ކަވާލިއޯ ޖަހައިދިނީ މުހައްމަދު ސަލާހުގެ އެހީތެރިކަމާއި އެކު އެވެ.

ލިވަޕޫލުން ދެން ލީގުގައި ނިކުންނާނީ އެވަޓަން އާއި ދެކޮޅަށެވެ.