ޕްރިމިއާ ލީގު: ހާލަންޑު ޖެހިޖެހިގެން ދެވަނަ މެޗުގައި ހެޓްރިކް ހަދާ ސިޓީ މޮޅުކޮށްދީފި

ޕްރިމިއާ ލީގުގައި މެންޗެސްޓާ ސިޓީއަށް މިސީޒަނަށް ގުޅުނު އާލިން ހާލަންޑު ޖެހިޖެހިގެން ދެވަނަ މެޗުގައި ހެޓްރިކް ހަދާ އެ ޓީމު މޮޅުކޮށްދީފިއެވެ.

ސިޓީގެ ދަނޑުގައި ނޮޓިންހަމް ފޮރެސްޓާއި ދެކޮޅަށް ކުޅުނު މެޗު ސިޓީއިން ކާމިޔާބު ކޮށްފައިވަނީ 0-6 ގެ ނަތީޖާއަކުންނެވެ. ރޭ ކުޅެވުނު މެޗު ފެށިގެން މުޅި އެކުގައި ފެނިގެން ގޮސްފައިވަނީ ސިޓީއިން މުޅި މެޗުގެ އެ ޓީމު ބޭނުންވާ ގޮތަށް ބޯޅަ ހިފަހައްޓައިގެން ކުޅުނު ތަނެވެ.

މެޗަށްފަހު ވާހަކަ ދައްކަމުން ސިޓީގެ ހާލަންޑު ބުނެފައިވަނީ ސިޓީގެ ކޯޗު ޕެޕް ގާޑިއޯލާގެ އިރުޝާދުތައް އަޑުއަހާ އޭނާގެ ޓީމުގެ ކުޅުންތެރިންގެ ވާހަކަ ބަރާބަރަށް އޭނާ އަޑު އަހަމުން އަންނަ ކަމަށެވެ. އަދި އެ ކުޅުންތެރިންނާއި ނުލާ އޭނާއަށް ގިނަ ގޯލުތައް ނުޖެހޭނެ ކަމަށް ހާލަންޑު ބުނެފައިވެއެވެ. މި މެޗުގައި ޖެހި ތިން ގޯލާއި އެކު ލީގުގައި ހާލަންޑު ވަނީ ކުޅުނު ފަސް މެޗުން ނުވަ ގޯލު ކާމިޔާބު ކޮށްފައެވެ.

މެޗުގައި ސިޓީއަށް ފުރަތަމަ ލަނޑު ޖަހައިދިނީ ހާލަންޑު މެޗުގައި ޖެހި ފުރަތަމަ ބޯޅައިންނެވެ. އެގޮތުން މެޗުގެ 12 ވަނަ މިނަޓުގައި ފުރަތަމަ ގޯލު ކާމިޔާބު ކޮށްދިން އިރު 23 ވަނަ މިނަޓުގައި އޭނާ ވަނީ ސިޓީއަށް ލީޑު ފުޅާ ކޮށްދީފައެވެ. ސިޓީގެ ތިންވަނަ ގޯލު ޖަހައި ހާލަންޑު އޭނާގެ ހެޓްރިކް ފުރިހަމަ ކޮށްދީފައިވަނީ މެޗުގެ 38 ވަނަ މިނަޓުގައެވެ. މެޗުގެ ފުރަތަމަ ހާފު ނިމިގެން ގޮސްފައިވަނީ 0-3 ގެ ނަތީޖާއަކުން ސިޓީ ކުރީގައި އޮވެގެންނެވެ.

ދެވަނަ ހާފުގައި ވެސް ސިޓީއިން ދައްކާފައިވަނީ މޮޅު ކުޅުމެކެވެ. އެގޮތުން މެޗުގެ 50 ވަނަ މިނަޓުގައި ސިޓީއަށް ލީޑު ފުޅާ ކޮށްދިނީ ޖައޯ ކެންސެލޯ އެވެ. މެޗުގައި ދެން ސިޓީއިން ޖެހި ދެ ގޯލުވެސް ކާމިޔާބު ކޮށްދިނީ އެ ޓީމާއި މި ސީޒަނަށް ގުޅުނު އާޖެންޓީނާގެ ޒުވާން ފޯވާޑް ހުލިއަން އަލްވަރޭޒް އެވެ.

ސިޓީއިން ލީގުގައި ދެން ނިކުންނާނީ މިވަގުތު ލީގުގައި އެންމެ ފޯމު ދައްކޮށް އޮތް އެސްޓަން ވިލާއާއި ދެކޮޅަށް މި މަހުގެ ތިން ވަނަ ދުވަހުގެ ރޭ އެވެ.