ޕްރިމިއާ ލީގް: ލެސްޓާ ބަލިކޮށް އެންމެ ފަހުން ކުޅުނު ތިން މެޗުވެސް ޔުނައިޓެޑުން ކާމިޔާބު ކޮށްފި

ލެސްޓާ ސިޓީ ބަލިކޮށް މެންޗެސްޓާ ޔުނައިޓެޑުން އެންމެ ފަހުން ލީގުގައި ކުޅުނު ތިން މެޗުވެސް އެ ޓީމުން ކާމިޔާބު ކޮށްފިއެވެ.

ސީޒަނުގެ ފުރަތަމަ ދެ މެޗުން ބަލިވެ ހޫނު ފެނަށް ވެއްޓުނަސް ޔުނައިޓެޑުން ވަނީ ދެން ކުޅުނު ތިން މެޗުވެސް ކާމިޔާބުކޮށް ވަރުގަދަ ރައްދެއް ދީފައެވެ. މިރޭ ލެސްޓާގެ ދަނޑުގައި ކުޅުނު މެޗު މެންޗެސްޓާ ޔުނައިޓެޑުން ކާމިޔާބު ކުރީ 0-1 ގެ ނަތީޖާއަކުންނެވެ.

މެޗަށްފަހު ވާހަކަ ދައްކަމުން ޔުނައިޓެޑުގެ ކޯޗު ޓެން ހާގް ބުނެފައިވަނީ އަދިވެސް ކުޅުން ރަނގަޅު ކުރަން ޖެހޭ ކަމަށާއި، ލިބޭ ފުރުސަތު ތަކުގައި ގޯލު ޖަހަން ޖެހޭ ކަމަށެވެ. މީގެ އިތުރުން އަލަށް ޔުނައިޓެޑާއި ގުޅުނު ބްރެޒިލްގެ އެންޓޮނީ އާދިއްތަ ދުވަހުގެ ރޭ އާސެނަލް އާއި ދެކޮޅަށް ކުޅުމުގެ ފުރުސަތު ކަމަށްވެސް ޓެން ހާގް ވަނީ ބުނެފައެވެ.

މެޗުން ބަލިވި ލެސްޓާ ޓީމުގެ ކޯޗު ބުނެފައިވަނީ އެ ޓީމުން ފެނިގެން ގޮސްފައިވަނީ ކުޅުންތެރިންގެ ކިބައިން އުންމީދެއް ނެތް ކުޅުމެއް ކަމަށެވެ. މިދިޔަ ސީޒަނުގެ ޔޫއެފާ ކޮންފަރަންސް ލީގުގެ ސެމީ ކުޅުނު ލެސްޓާއިން މިހާތަނަށް މި ސީޒަނުގެ ލީގުގައި ކުޅުނު ފަސް މެޗުން ލިބިފައިވަނީ އެންމެ ޕޮއިންޓެކެވެ.

މި މެޗުގައި ފެނިގެންދިޔަ ހަމައެކަނި ގޯލު ފެނިގެން ގޮސްފައިވަނީ މެޗުގެ ފުރަތަމަ ހާފުގައެވެ. މެޗުގެ 23 ވަނަ މިނަޓުގައި މާކަސް ރަޝްފޯޑުގެ އެހީތެރިކަމާއި އެކު މި ގޯލު ކާމިޔާބު ކޮށްދިނީ ޖޭޑަން ސަންޗޯއެވެ. މެޗުގެ ފުރަތަމަ ހާފާއި ހިލާފަށް ދެވަނަ ހާފުގައި ޔުނައިޓެޑުގެ ފަރާތުން ފެނިގެން ގޮސްފައިވަނީ އާދައިގެ ކުޅުމެކެވެ. މެޗުގެ ފަހު މިނެޓުގައި ލެސްޓާގެ ޖަސްޓިން އަށް ރަނގަޅު ފުރުސަތެއް ލިބުނު ނަމަވެސް އޭނާ ފޮނުވާލި ބޯޅަ ދިޔައީ ހުރަސް ދަނޑި މަތިން ބޭރަށެވެ.

ޔުނައިޓެޑުން ދެން ލީގުގައި އަންނަ އާދިއްތަ ދުވަހުގެ ރޭ ނުކުންނާނީ މި ސީޒަނުގައި މިހާތަނަށް ކުޅުނު ހުރިހާ މެޗެއްވެސް ކާމިޔާބު ކޮށްފައިވާ އާސެނަލް އާއި ދެކޮޅަށެވެ.