މާލޭ ސިޓީ ކައުންސިލުން އަވަށު ސުކޫލުތަކުގެ ޓީޗަރުންނާއި މުވައްޒަފުންގެ އަގުވަޒަންކޮށް އިނާމު ދީފި
މާލެ ސިޓީ ކައުންސިލްގެ ބެލުމުގެދަށުގައިވާ އަވަށު މަދަރުސާތަކުގެ ޓީޗަރުންނާއި މުވައްޒަފުންގެ އަގުވަޒަން ކުރުމުގެ ގޮތުން ޚާއްސަ ހަރަކާތެއް ބާއްވާ އިމާދު ދީފިއެވެ.
މިއަދު ކުރިއަށްގެންދިޔަ މި ޙަރަކާތުގައި މާފަންނު މަދަރުސާ އާއި ގަލޮޅު މަދަރުސާގެ އިތުރުން އަހުމަދިއްޔާ ސްކޫލްގެ ޓީޗަރުންނާއި މުވައްޒަފުންނަށް މާލެ ސިޓީ ކައުންސިލްގެ ފަރާތުން ވަނީ ގިފްޓް ހެމްޕަރ އެއް ހަދިޔާކޮށްފައެވެ.
މި ޙަރަކާތަކީ މި އަހަރުގެ ޓީޗަރުންގެ ދުވަހާއި ގުޅިގެން މާލެ ސިޓީ ކައުންސިލުން ދުރާލާ ތައްޔާރުވެގެން ކުރިއަށް ގެންދިއުމަށް ނިންމި ޙަފްލާ ބޭއްވުމަށް ސަރުކާރުން ހުއްދަ ނުދެއްވުމުން އެ ހަފްލާ ކެންސަލްކުރެވިފައިވާތީ މި ސްކޫލްތަކުގެ ޓީޗަރުންނާއި މުވައްޒަފުންގެ އަގު ވަޒަންކުރުމަށް ބޭއްވުނު ޙަރަކާތެކެވެ.
އަވަށު މަދަރުސާތަކަށް ހަދިޔަ ހަވާލު ކޮށްދެއްވީ މާލެ ސިޓީގެ މޭޔަރު ޑރ. މުޙައްމަދު މުޢިއްޒުއެވެ.
މި ޙަރަކާތާއި ގުޅޭގޮތުން މާލެ ސިޓީގެ މޭޔަރު ޑރ. މުޙައްމަދު މުޢިއްޒު ވިދާޅުވީ މާލެ ސިޓީ ކައުންސިލާއި އަވަށު ސްކޫލްތައް ހިންގަން ހަވާލުވި ހިސާބުން ކައުންސިލުން މަސައްކަތް ކުރަނީ ސްކޫލްތަކާއި ގުޅިގެން ވީހާވެސް ރަނގަޅަށް ކައުންސިލްގެ ޚިދުމަތް ފޯރުކޮށްދިނުމަށް ކަމަށެވެ.
އަދި ޓީޗަރުންނާއި ސްކޫލްތަކުގެ މެނޭޖްމެންޓް އާއި މުވައްޒަފުން ކޮށްދެއްވާ ބުރަ މަސައްކަތް ކައުންސިލުން ފާހަގަކުރާ ކަމަށް މޭޔަރު ވިދާޅުވިއެވެ.
"އަޅުގަނޑުމެން ވަރަށް އެޕްރިޝިއޭޓް ކުރަން ޓީޗަރުންނާއި ސްކޫލް މެނޭޖްމެންޓް އަދި ސްޓާފުން ތިކޮށްދެއްވާ ބުރަ މަސައްކަތް. އަޅުގަނޑުމެން ޙަޤީޤަތުގަ ބޭނުންވީ ޓީޗަރސްޑޭ އާއި ގުޅިގެން ހަފްލާއެއްބާއްވަން . މާފަންނު މަދަރުސާ ގަލޮޅު މަދަރުސާ އަދި އަހުމަދިއްޔާ ހިމެނޭނެހެން. އެކަމަށް ވަރަށް ތައްޔާރީތައްވެސް ވީން. އެހެން ނަމަވެސް ކެންސަލްކޮށްލަން ޖެހުނީ ސަރުކާރުން އެކަމަށް ހުއްދަ ނުދެއްވުމުން. ސަރުކާރުން އެއްބާރުލުން ނުދެއްވި ސަބަބު އަޅުގަނޑަކަށް އަންޑަސްޓޭންޑް އެއްނުވޭ"
މާލޭ ސިޓީގެ މޭޔަރު ޑރ މުހައްމަދު މުއިއްޒު
ޑރ މުއިއްޒު އިތުރަށް ވިދާޅުވީ ސިޓީ ކައުންސިލުން ޕްލޭނު ކުރި ގޮތަށް އެ ހަރަކާތް ކުރިއަށް ނުގެންދެވުނު ނަމަވެސް ޓީޗަރުންނަށް ރަމްޒީ ގޮތެއްގައި ނަމަވެސް ކޮންމެވެސް ކަހަލަ ހަދިޔާއެއްދީ ތުއްތު ކުދިންތަކެއް ބިނާކުރުމަށްޓަކައި ޓީޗަރުން ކުރައްވާ ބުރަ މަސައްކަތް ބަލައިގަނެ ހިތްވަރު ދިނުމަށް ކައުންސިލުން ބޭނުންވާކަމަށެވެ.
ކުރިއަށް އޮތް ތަނުގައި މިއަށްވުރެ ރަނގަޅަށް ޓީޗަރުންގެ ދުވަސް ފާހަގަކުރުމުގެ ޙަރަކާތްތައް ގެންދެވޭނެ ކަމަށް އުންމީދުކުރައްވާ ކަމަށާއި މިކަމަށް ސަރުކާރުންވެސް އެއްބާރުލުން ލިބިގެންދާނެ ކަމުގައި ޤަބޫލުކުރައްވާކަމަށް ވެސް މޭޔަރު ވަނީ ވިދާޅުވެފައެވެ.
މިއަދު ކުރިއަށް ގެންދެވުނު ޙަރަކާތުގައި މާލެ ސިޓީގެ ހެންވޭރު ދެކުނު ދާއިރާގެ ކައުންސިލަރ އަލް އުސްތާޛާ ފާތިމަތު ޝަމްނާޒް ޢަލީ ސަލީމް އާއި މެދު ހެންވޭރު ދާއިރާގެ ކައުންސިލަރ އާދަމް ރަމީޒްގެ އިތުރުން ހުޅުމާލެ ދާއިރާގެ ކައުންސިލަރ އިބްރާހިމް ޝުޖާއު ވަނީ ބައިވެރިވެ ވަޑައިގަންނަވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
