ފޯޅަވަހި މައްސަލައިގައި ކުރީގެ ރައީސުންގެ މައްޗަށް ދައުވާކުރަން ޖެހޭ: ޝަރީފު

ފޯޅަވައްސަކީ ރާއްޖޭގެ ސަރަހައްދެއްގެ ގޮތުގައި ބޭއްވުމަށް ކުރީގެ ރައީސުން އެއްވެސް މަސައްކަތެއް ކޮށްފައި ނުވާކަމަށާއި، އެ ބޭފުޅުންގެ މައްޗަށް ދައުވާކުރަން ޖެހޭކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ) ވިދާޅުވެއްޖެ އެވެ.

ޝަރީފު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުންނެވެ.

އޭނާ ވިޅާޅުވީ ފޯޅަވައްސަކީ މޮރިޝަސްގެ ތަނަކަށް ހެދުމަށް އެ ގައުމުން އެތައް މަސައްކަތެއް ކުރަމުން ދިޔަނަމަވެސް ރާއްޖޭގައި ކުރިން އޮތް ސަރުކާރުތަކުން އެތަން ހޯދުމަށް އެއްވެސް މަސައްކަތެއް ކޮށްފައި ނުވާކަމަށެވެ.

މިއަދު ފޯޅަވަހީގެ މައްސަލަ ހޫނުވެ، ސަރުކާރުން އަމަލުކޮށްފައިވާ ގޮތް ގޯސްކޮށްފައިވާއިރު، ކުރީގެ އެއްވެސް ވެރިކަމެއްގައި ފޯޅަވައްސަކީ ރާއްޖޭގެ ބައެއްގެ ގޮތުގައި ކަނޑައެޅުމުގެ މަސައްކަތް ކޮށްފައިނުވާކަމަށާއި، އެ ކަމަށްޓަކައި ކުރީގެ ރައީސުންނަށް ދައުވާ ކުރަން ޖެހޭކަމަށް އޭނާ ވިދާޅުވިއެވެ.

"ދިވެހިރާއްޖޭގެ ވެރިކަމުގެ ތިއްބެވި ބޭފުޅުންގެ ތެރެއިން މިވަގުތު ދުނިޔޭގައި ތިއްބެވި ބޭފުޅުން އެބަ ވިދާޅުވޭ ތިމަންނާމެންނަށް ވަރަށް ސާފުކޮށް އެނގިވަޑައިގަންނަވައޭ ފޯޅަވައްސަކީ ދިވެހިރާއްޖޭގެ ތަނެއްކަން. މިބޭފުޅުންނަށް އެނގިވަޑައިގެން ތިއްބަވާ އެއްވެސް ފިޔަވަޅެއް ނާޅުއްވާ ވޭތުވެދިޔަ 50 އަހަރު މޮރިޝަސްއިން ފޯޅަވައްސާއި މެދު ދައުވާކޮށް ދުނިޔޭގެ އޮތިއްޔާ އޮތްހާ ކޯޓަކަށް ގޮސް، ޔުނައިޓެޑް ނޭޝަންގެ ކަމިޝަނެއް އޮތިއްޔާ އެ ކަމިޝަނަށް ގޮސް، ބައުންޑަރީއާއި ބެހޭ ތަނެއް އޮތިއްޔާ އެތަނަކަށް ގޮސް، ޓްރައިބިއުނަލެއް އޮތިއްޔާ އެތަނަކަށް ގޮސް، ކާމިޔާބުކޮށް ޔޫރަޕުގެ އޮތްހާ ކޯޓަކުން އިނގިރޭސިވިލާތުގައި އޮތް ހާ ކޯޓަކުން، އަދި ޔުނައިޓެޑް ނޭޝަންސްގެ އޮތް އިންޓަނޭޝަނަލް ކޯޓަކުންވެސް ހުކުން ކޮށް ނިމުނީމަވެސް ހަމަ އަޅާވެސް ނުލައްވާ، ކަހާތަން ހިރުވާވެސް ނުލައްވާ، މި ބޭފުޅުންގެ މައްޗަށް ދައުވާ ކުރަން އެބަޖެހޭ"

މަރަދޫ ދާއިރާގެ މެމްބަރު ޝަރީފު

ފޯޅަވަހި މައްސަލައިގައި ސަރުކާރުން މޮރިޝަސްކޮޅަށް ޖެހުމުން ކުރީގެ ރައީސުން ކަންބޮޑުވުން ފާޅުކުރަމުން ދިޔަ ނަމަވެސް އެބޭފުޅުން ޒިންމާދާރު މަގާމުތަކުގައި ތިއްބެވި އިރު އެކަމަށް އެއްވެސް ވަރަކަށް އަޅާލާފައި ނުވާކަމަށް ޝަރީފު ވިދާޅުވިއެވެ.

އަދި އޭރުު ޒިންމާދާރު މަގާމުތަކުގައި ތިއްބަވާ އެ މައްސަލައާއި ގުޅިގެން ފިޔަވަޅު ނާޅުއްވާ ތިއްބެވި ހުރިހާ ފަރާތްތައް މިކަމުގެ ޒިންމާ ނަގަން ޖެހޭނެކަމަށް ޝަރީފު ވިދާޅުވިއެވެ.