އައްޑޫން މާލެއަށް ދަތުރުކުރި މުދާ އުފުލާ ދޯންޏެއް ރަސްމާލެ ފަރަށް އަރައިފި

އައްޑޫ ސިޓީ ހިތަދޫން ފުރައިގެން މާލެއަށް ދަތުރުކުރަމުން ދިޔަ މުދާ އުފުލާ ދޯންޏެއް، ރަސްމާލޭގެ ފަރަށް އަރައިފިއެވެ.

ފުލުހުން ބުނީ މި ހާދިސާ ހިނގައިގެން ރިޕޯޓްކޮށްފައިވަނީ ރޭ 11:15 ހާއިރު ކަމަށެވެ.

ފަރަށް އެރި މި ދޯނީގައި އެ ވަގުތު ތިބީ ހަތަރު މީހުން ކަމަށާ، އެތަނުން ދޯނީގެ ކައްޕި އަކީ ދިވެއްސަކަށްވާއިރު ދެން ތިބީ ތިން ބިދޭސީން ކަމަށް ފުލުހުން ބުނެއެވެ.

މި ހާދިސާގައި ދޯނީގައި ތިބި އެއްވެސް މީހަކަށް އަނިޔާއެއް ލިބިފައި ނުވާ ކަމަށް ފުލުހުން މައުލޫމާތު ދެއެވެ.

ފުލުހުން އިތުރަށް ބުނީ، މި ހާދިސާގެ މައުލޫމާތު ލިބުމާ ގުޅިގެން މެރިން ޕޮލިހާއި އެމްއެންޑީއެފް ކޯސްޓްގާޑުން އެ ސަރަހައްދަށް ގޮސް އެހީތެރިކަން ފޯރުކޮށްދިނުމުގައި ހަރަކާތްތެރިވެފައިވާ ކަމަށެވެ.

އެގޮތުން، ރަސްމާލޭން ދިޔަ އުޅަނދަކަށް ދޯނީގައި ތިބި ހަތަރު މީހުން ނެގުމަށްފަހު، ކޯސްޓް ގާޑުގެ އުޅަނދެއްގައި އެ ސަރަހައްދުގައި ހަރަކާތްތެރިވަމުން ދިޔަ އެހެން އުޅަނދަކަށް ގެންގޮސްދީފައިވާ ކަމަށް ފުލުހުން ވަނީ ބުނެފައެވެ.

ފުލުހުން އިތުރަށް ބުނީ، ފަރަށް އެރި ދޯނި ފުންކުރުމުގެ މަސައްކަތް މިހާރު އެ ދޯނީގެ ވެރިފަރާތުން ކުރަމުން އަންނަ ކަމަށެވެ.

މި ހާދިސާ ހިނގަން މެދުވެރިވި ސަބަބު ދެނެގަތުމުގެ މަސައްކަތް ކަމާބެހޭ ފަރާތްތަކުން ދަނީ ކުރަމުންނެވެ.