ޕްރައިމަރީގައި ވާދަކުރައްވަން ރައީސް ސޯލިހު ނިންމެވީ ގައުމާއި ރައްޔިތުންނަށްޓަކައި: ނިހާދު

ސަރުކާރު ހިންގާ މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރިޔާސީ ޓިކެޓު ހޯދުމަށް ބާއްވާ ޕްރައިމަރީގައި ވާދަކުރައްވަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ނިންމެވީ ގައުމާއި ރައްޔިތުންގެ ހައްގުގައިކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.

އެމްޑީޕީގެ ޕްރައިމަރީގައި އެ ޕާޓީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ވާދަކުރައްވާނެކަން އިއުލާނުކުރައްވާފައިވާއިރު ނަޝީދު ވަނީ ކެމްޕެއިންވެސް ފައްޓަވާފައެވެ.

މި އިންތިޚާބުގައި ނަޝީދުއާއި ވާދަކުރައްވަން ނިކުންނަވަނީ ނަޝީދުގެ އެންމެ ގާތް ރަހުމަތްތެރިޔާ އަދި، އެމްޑީޕީގެ އެންމެ އިސް ލީޑަރު ރައީސް ސޯލިހުއެވެ.

އެމްޑީޕީއިން ޕްރައިމަރީއަކާއި ކުރިމަތިލަނީ، ނަޝީދުއާއި ސޯލިހުގެ ދެ ފެކްޝަންގެ މެދުގައި ބޮޑެތި ނުތަވަސްކަމެއް އުފެދި، އެއްބަަޔަކު އަނެއްބަޔަކަށް ހޫނު ބަހުގެ ހަމަލާތަކެއް ރައްދުކުރަމުންދާ ދަނޑިވަޅެއްގައެވެ.

ރައީސް ސޯލިހު ޕްރައިމަރީގައި ވާދަކުރައްވާނެކަން ހާމަކުރައްވާ ނިހާދު ކުރެއްވި ޓްވީޓެއްގައި ވިދާޅުވީ އެމަނިކުފާނުގެ އެ ނިންމެވުމަކީ ގައުމާއި ރައްޔިތުންނަށްޓަކައި ނިންމެވި މުހިންމު ނިންމެވުމެއް ކަމަށެވެ.

އެމްޑީޕީގެ ވެރިކަން ދެމެހެއްޓުމުގެ ފުރުސަތު ބޮޑީ ރައީސް ސޯލިހަށް ތާއީދުކުރައްވައިގެންކަމަށާއި، މި އިންތިޚާބުގައި އޭނާގެ ފުރިހަމަ ތާއީދު ރައީސް ސޯލިހަށް ލިބިވަޑައިގަންނަވާނެކަމަށް ނިހާދު ވަނީ ވިދާޅުވެފައެވެ.

ސޯލިހަށް ތާއީދުކުރައްވާ މެމްބަރުން، އެމަނިކުފާނު ވެރިކަމުގައި ބަހައްޓާ، ދެވަނަ ދައުރެއް އެމަނިކުފާނަށް ދެއްވަން ޖެހޭކަމަށް ވަކާލާތުކުރައްވާއިރު، އެމްޑީޕީގެ ތެރޭގައި ތިއްބެވި ނަޝީދަށް ތާއީދުކުރައްވާ މެމްބަރުން ވިދާޅުވަމުން ގެންދަވަނީ، މިހާރު އެމްޑީޕީ ހިންގަމުންދަނީ އެ ޕާޓީގެ އަސާސްތަކާއި ޚިލާފަށްކަމަށެވެ.

އަދި މި ވެރިކަމުން ރައްޔިތުންނަށް ބޮޑެތި ގެއްލުންތަކެއް ލިބެމުންދާތީ ރައީސް ސޯލިހަށް އިތުރު ދައުރެއް ދޭން ޖެހޭ އެއްވެސް ސަބަބެއް ނެތް ކަމަށެވެ.