ނަޝީދަށް ދިން އަނިޔާ ހަނދުމަކޮށް ދިނުމަށްފަހު މައުމޫނަށް މަރުހަބާ ދަންނަވައިފި

ރާއްޖޭގެ ނޫސްވެރިކަމަށް 75 އަހަރުފުރުމުގެ އަލިމަސް ޔޫބީލް ފާހަގަ ކުރުމުގެ ގޮތުން ރޭ ދަރުބާރުގޭގައި ބޭއްވި ރަސްމިއްޔާތުގައި "އަލިމަސް ގަލަން" ލިބިވަޑައިގެންނެވި ކުރީގެ ރައީސް މައުމޫން އަބްދުލް ޤައްޔޫމް އަށް، ކުރީގެ ރައީސް މުހައްމަދު ނަޝީދު ތަފާތުގޮތަކަށް މަރުޙަބާ ދަންނަވައިފި އެވެ.

ރޭ ބޭއްވުނު ނޫސްވެރިކަމުގެ ހަފްލާގައި ނޫސްވެރިކަން ދަތި އުދަގުލާއެކުކޮށްފައިވާ ފަރާތްތަކުގެ ބަދަލުގައި ނޫސްވެރިކަމަށް ހުރަސް އެޅުއްވި ފަރާތްތަކަށް އެވޯޑް ދިންކަމަށް ބުނެ ބައެއް ނޫސްވެރިންނާއި، މީޑިއާގައި ހަރަކާތްތެރިވާ ބައެއްފަރާތްތަކުން ފާޑުކިޔަމުން އަންނަ މި ދަނޑިވަޅުގައި ރައީސް ނަޝީދު ރައީސް މައުމޫނަށް މަރުހަބާ ދަންނަވާފައިވަނީ މައުމޫންގެ ވެރިކަމުގައި ނޫސްވެރިކަންކުރުމުގެ ސަބަބުން ޖަލައްލެވުނުކަން ހަނދުމަކޮށްދެއްވަމުންނެވެ.

ރައީސް ނަޝީދު އިނގިރޭސި ބަހުން ކުރެއްވި ޓުވީޓުގައި ވިދާޅުވެފައިވާ ގޮތުގައި އެމަނިކުފާނުގެ މައްޗައް މިނިވަން ނޫސްވެރިކަމަށް އަޑު އުފުލައްވައި ސަރުކާރާ ދެކޮޅަށް ލިޔުއްވި ލިޔުންތަކުގެ ސަބަބުން ދައުވާކޮށް އެމަނިކުފާނު 14 ފަހަރު ޖަލަށްލި ކަމަށެވެ. އެއަށްފަހު ރާއްޖޭގެ ނޫސްވެރިކަމުގެ ޑައިމަންޑް ޖުބްލީ ފާހަގަކުރުމުގެ ގޮތުން "އަލިމަސް ގަލަން"ގެ ޝަރަފު ލިބިވަޑައިގަތް ކަމަށްޓަކައި އެމަނިކުފާނު ވަނީ މައުމޫން އަށް މަރުޙަބާ ދަންނަވާފަ އެވެ.

މިއީ މިދެބޭފުޅުންގެ ގުޅުން ވަރަށް ބަދަހިކޮށް ފެންނަމުންދާ ދަނޑިވަޅެއްގައި މާޒީގެ ހިތި ތަޖުރިބާއެއް ހިއްސާ ކުރެއްވި ފުރަތަމަ ފަހަރުކަން ފާހަގަކޮށްލަން ޖެހެއެވެ.

ރައީސް ނަޝީދު 2008 ގެ ރިޔާސީ ރޭހާއި 2013 ގެ ރިޔާސީ ރޭހުގައި މައުމޫންގެ އަނިޔާވެރިކަމުގެ ވާހަކައަކީ މައުމޫނާ ދެކޮޅަށް ނަޝީދު ރައްޔިތުންނަށް ވިއްކެވި ވާހަކައެވެ. ނަމަވެސް ރައީސް ޔާމީންގެ ވެރިކަން ނިމުމަކަށް ގެނައުމަށްޓަކައި ނަޝީދުވަނީ ރައީސް މައުމޫންގެ އަނިޔާވެރިކަމުގެ ވާހަކަ ދެއްކެވުމުގެ ބަދަލުގައި ރައީސް މައުމޫންއަށް ވަރަށް ބޮޑަށް ތައުރީފްކޮށް ތަފާތު މުނާސަބަތުގައި އެމްޑީޕީ ހަރުގޭގައި ތިޔައީ ޒައީމް ލަވަ ޖައްސަވާފައެވެ.