މީހަކު ޖަލަށް ލުމަކީ މޮޅުކަމެއް ކަމަށް ނުދެކެން؛ އެއީ ދާން ބޭނުންވާ ތަނެއްވެސް ނޫން: ރައީސް ނަޝީދު

އެއްވެސް ހާލެއްގައި އެއްވެސް މީހަކު ޖަލަށް ލައިގެން، އެއީ މާމޮޅު ކަމަކަށް ހަދައިގެން އެއްވެސް އިރަކު ނޫޅުއްވާ ކަމަށާ އަދި ޖަލަކީ އެއްގޮަތަކަށްވެސް ދާން ބޭނުންވާ ތަނެއް ނޫން ކަމަށް ކުރީގެ ރައީސް، އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރޭ ބޭއްވި ނޫސްވެރިންގެ ބައްދަލުވުމުގައި ނަޝީދު ވިދާޅުވީ، އެބައެއްގެ ލީޑަރަށް ދެރަގޮތެއް ވުމުން ކޮންމެ ބައެއްވެސް ނުރުހޭނެ ކަމަށެވެ. އަދި ރައީސް ޔާމީންއަށް ރިޔާސީ އިންތިހާބުގައި ބައިވެރި ނުވެވޭނެތީ އެމަނިކުފާނުގެ ބަދަލުގައި ޕީޕީއެމް ޕީއެންސީން ކެންޑިޑޭޓަކު ނެރުއްވާނެ ކަމަށްވެސް ނަޝީދު ވިދާޅުވި އެވެ.

"އަޅުގަނޑަށް ލަފާ ކުރެވޭ ގޮތުގައި، ޕީޕީއެމް/ޕީއެންސީން ކެންޑިޑޭޓެއް ނެރުއްވާނެ، ކޮންމެ ބޭފުޅުކުވެސް އެ ބައެއްގެ ލީޑަރަށް ދެރަގޮތެއް ވީމާ، ނުރުހޭނެ، އިހުސާސްތައް އަންނާނެ، އުދާސްތައް އަންނާނެ، އެހެންވީމަ އެއީ އަޅުގަނޑުމެން އެންމެންވެސް ބަލައިގަންނާނެ ކަމެއް، އަދި މިއީކީއެއް އަޅުގަނޑުމެން އުފާ ކުރަން ޖެހޭ ބާވަތުގެ ކަމެއް ނޫން". ނަޝީދު ވިދާޅުވިއެވެ.

ނީގެ އިތުރުން ވ. އާރަށް މައްސަލާގައި ރައީސް ޔާމީނަށް އިއްވާފައިވާ 11 އަހަރުގެ ޖަލު ހުކުމާއި ގުޅިގެން ކުރި ސުވާލަކަށް ޖަވާބުދެއްވަމުން ނަޝީދު ވިދާޅުވީ، އެމަނިކުފާނު މިކަމާއި ގުޅޭގޮތުން އެއްޗެއް ނުދަންނަވާނެ ކަމަށެވެ.

"އަޅުގަނޑަކީ އެއްވެސް ހާލެއްގައި އެއްވެސް މީހަކު ޖަލަށް ލައިގެން، އެ މާމޮޅު ކަމަކަށް ހަދައިގެން އެއްވެސް އިރަކު އުޅުނު މީހެއް ނޫން، އަދި އުޅޭނެ މީހެއްވެސް ނޫން. ދެން އެއީކީ އަޅުގަނޑު ހަމަ އެއްގޮަތަކަށްވެސް ދާން ބޭނުންވާ ތަނެއް ނޫން.". ނަޝީދު ވިދާޅުވިއެވެ.

އަދި އެއީ ސިޔާސީ ދައުވާއެއް ކަމަށް ގަބޫލުރައްވަންތޯ ކުރެއްވި ސުވާލަށް ޖަވާބުދެއްވަމުން ނަޝީދު ވިދާޅުވީ، ޔާމީންގެ މައްޗަށް އުފުލިފައި ވަނީ ގާނޫނުގައިވާ މާއްދާތަކުގެ ތެރެއިން މާއްދާގައިވާ ދައުވާއެއް ކަމަށާ އަދި ހުކުމް އިއްވަނީ ހެއްކާއި ގަރީނާގެ މައްޗަށް ކަމަށެވެ. އެހެންކަމުން އެކަމާއި ގުޅޭގޮތުން އެހެން އެއްޗެއް ދަންނަވަން ބޭނުން ނުވާކަމަށް އެމަނިކުފާނު ވިދާޅުވި އެވެ.