ހުޅުމާލޭގައި ތަރައްގީ ކުރި އިމާރާތައް ސަރުކާރުގެ އޮފީސްތައް ބަދަލުކުރަން ފަށައިފި

ހުޅުމާލޭގައި ތަރައްގީކުރި އިމާރާތައް ސަރުކާރުގެ އޮފީސްތައް ބަދަލުކުރަން ފަށައިފިއެވެ.

ހުޅުމާލޭގައި ސަރުކާރުގެ އޮފީސް އިމާރާތެއް ތަރައްގީކުރުމަށް މި ސަރުކާރުން ނިންމެވީ ސަރުކާރުގެ ގިނަ އޮފީސްތަކެއް ބޮޑު ހޭދައެއްކޮށްގެން އަމިއްލަ ތަންތަން ވަކި މުއްދަތެއްނެތި ކުއްޔަށް ހިފައިގެން ހިންގަންޖެހޭތީ، އެކަމަށް ހައްލެއް ގެނައުމަށްޓަކައި ރައީސުލްޖުމްޙުރިއްޔާ އިބްރާހިމް މުޙައްމަދު ސާލިޙް 2019 ވަނަ އަހަރު ނިންމެވި ނިންމެވުމުގެ މަތީންނެވެ.

6 ފަންގިފިލާއަށް އިމާރާތްކޮށްފައިވާ މި އޮފީސް އިމާރާތުގެ މަސައްކަތް ކޮށްފައިވަނީ ޗައިނާގެ ހުނާން އިންޖިނިއަރިންގ ކޯޕަރޭޝަން ލިމިޓެޑުންނެވެ.

އެ މަސައްކަތާއި ގުޅިގެން ޕްލޭނިން މިނިސްޓްރީއިން ބުނީ އޮފީސް ހުޅުވުމަށްޓަކައި ވާން ޖެހޭ ފަހުގެ ތައްޔާރީތައް ވަމުން ދާ ކަމަށެވެ.

އެގޮތުން އިމާރާތުގެ މަސައްކަތް ނިންމާ މިހާރު ކުރިއަށް ދަނީ އޮފީސްތަކުގެ ސެޓަޕް ހެދުމުގެ މަސައްކަތް ކަމަށާއި، މި މަހުގެ 15އަށް އެތައް ހުޅުވާ ބޭނުން ކުރެވެން ފެށޭނެކަމަށް ޕްލޭނިން މިނިސްޓްރީއިން ވަނީ ބުނެފައެވެ.

ހުޅުމާލޭ ފުރަތަމަ ފިޔަވަހީގެ ޓްރީޓޮޕް ހޮސްޕިޓަލް ކައިރީގައި ތަރައްޤީކޮށްފައިވާ މި އޮފީސް ޢިމާރާތުގެ ގްރައުންޑް ފްލޯރ އަދި ފުރަތަމަ ފަންގިފިލާ ޚާއްސަކޮށްފައި ވަނީ ޕާކިންގ ސަރަޙައްދެއްގެ ގޮތުގައި ބޭނުންކުރުމަށެވެ. އިމާރާތައް ބަދަލުކުރާ އޮފީސްތައް ހިންގާނީ 2 ވަނަ ފަންގިފިލާއިން ފެށިގެން 5 ވަނަ ފަންގިފިލާއާއި ހަމައަށެވެ. އަދި އިމާރާތުގެ އެންމެ މަތި 6 ވަނަ ފަންގިފިލާ ޚާއްސަކޮށްފައިވަނީ ކުދި މީޓިން ރޫމްތަކާއި، ސެމިނާ ރޫމެއްގެ އިތުރުން ޓެރަހަށެވެ.

ހުޅުމާލެއަސް ބަދަލުކުރަން ނިންމާފައިވާ އޮފީސްތައް:

1. މިނިސްޓްރީ އޮފް ޖެންޑާ ފެމެލީ އެންޑް ސޯޝަލް ސާރަވިސް- 2 ވަނަ ފަންގިފިލާ

2. މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން- 3 ވަނަ ފަންގިފިލާ

3. އެމެރިކަން އެމްބަސީ- 4 ވަނަ ފަންގިފިލާ

4. މިނިސްޓްރީ އޮފް ހަޔާ އެޑިއުކޭޝަން- 5 ވަނަ ފަންގިފިލާ

މި އޮފީސް އިމާރާތުގެ ކޮންމެ ފަންގިފިލާއެއްގައި 25،000 އަކަފޫޓުގެ ޖާގަ ހުންނާނެކަމަށް ޕްލޭނިންގ މިނިސްޓްރީން ވިދާޅުވެއެވެ. މިއީ ސަރުކާރުން 185 މިލިއަނަށްވުރެ ގިނަ ރުފިޔާ ޚަރަދުކޮށްގެން އިމާރާތްކޮށްފައިވާ ތަނެކެވެ.