2023 ގެ ނިންމުން ނިންމާއިރު ގައުމުގެ މަސްލަހަތު އިސްކުރައްވާ: އެމް.އާރު.އެމް
2023 އަކީ ރައްޔިތުން މުހިންމު ނިންމުމެއް ނިންމާނެ އަހަރެއްކަމަށާއި، އެ ނިންމުން ނިންމާއިރު ގައުމުގެ މަސްލަހަތު އިސްކުރުމަށް މޯލްޑިވްސް ރިފޯމް މޫވްމެންޓު (އެމް.އާރު.އެމް) އިން އިލްތިމާސްކޮށްފި އެވެ.
އާއަހަރުގެ ތަހުނިޔާއާރު އެމްއާރުއެމުން ނެރުނު ބަޔާނެއްގައި ބުނެފައިވަނީ 2023 އަކީ ދިވެހިރާއްޖޭގެ ތާރީހުގައި މުހިންމު އަހަރަކަށް ވެގެންދާނެ ކަމަށެވެ.
އެހެންކަމުން ހުރިހާ ރައްޔިތުންވެސް ކަންކަމާމެދު ފުންކޮށް ވިސްނަވާ ނިންމުންތައް ނިންމެވުމުގައި ގައުމުގެ މަސްލަހަތު އިސްކުރެއްވުމަށް އެމް.އާރު.އެމް އިން އިލްތިމާސްކުރާކަމަށް އެ ބަޔާނުގައި ބުނެފައިވެއެވެ.
2023 އަކީ ރިޔާސީ އިންތިޚާބު އޮންނަ އަހަރުކަމަށް ވުމުން، އެމް.އާރު.އެމް ގެ ބަޔާނުގައި ނިންމުންތައްކަމަށް ބުނެފައިވަނީ ރިޔާސީ އިންތިޚާބާއި ގުޅިގެން ނިންމާ ނިންމުންތަކަށް ކަމަށް ބެލެވެއެވެ.
އެމް.އާރު.އެމް އަކީ ކުރީގެ ރައީސް މައުމޫނު އަބްދުލްގައްޔޫމު އިސްކޮށް ހުންނަވާ ހިންގަވާ ސިޔާސީ ޕާޓީއެކެވެ. މާބޮޑު ތާއީދެއް އެ ޕާޓީއަށް ނެތް ނަމަވެސް އެއީވެސް މި ސަރުކާރު ގެނައުމަށް ހިއްސާވާ ޕާޓީއެކެވެ. އަދި މިހާރުވެެސް ސަރުކާރަށް ތާއީދު އޮތް ސަރުކާރު ކޯލިޝަންގައި ހިމެނިވަޑައިގަންނަވާ ޕާޓީއެވެ.
އެހެން ނަމަވެސް ކުރިއަށް އޮތް ރިޔާސީ އިންތިޚާބުގައި އެމްއާރުއެމުން ވާދަކުރާނެކަން މިހާތަނަށް ރަސްމީކޮށް އިއުލާނުކޮށްފައެއް ނުވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
