"އެމްޑީޕީން ވަކި ކޮށްފައިވާ ކަމަށް ރައީސް ނަޝީދު ވިދާޅުވި ހާމިދު، ވަކިވީ އަމިއްލައަށް އެދިގެން"

އެމްޑީޕީން ވަކި ކޮށްފައިވާ ކަމަށް އެޕާޓީގެ ރައީސް މުހައްމަދު ނަޝީދު ވިދާޅުވި ޕޮލިސް ބޯޑުގެ މެމްބަރު އަދި ރައްޔިތުންގެ މަޖިލިހުގެ ކުރީގެ މެމްބަރު ހާމިދު އަބްދުލްޣަފޫރު ޕާޓީން ވަކިވީ އަމިއްލައަށް އެދިގެން ކަމަށް އެމްޑީޕީގެ ޗެއާޕާސަންގެ ނައިބު އިބްރާހީމް ވަހީދު (އިބުރޭ) ވިދާޅުވެއްޖެއެވެ.

ރައީސް ނަޝީދު ރޭ ބޭއްވެވި ނޫސްވެރީންގެ ބައްދަލްވުމުގައި, އެމްޑީޕީގެ ދަފްތަރުން ވަކިކޮށްފައިވާ 39،000 މެންބަރުން ވަކިކުރީ އެ މެންބަރުންނަށް ނުވެސް އެނގި ކަަމަށާ އަދި އެ މެންބަރުންނަކީ އެމްޑީޕީގެ ވަރަށް ދުވަސްވީ މެންބަރުން ކަމަށް ވަނީ ވިދާޅުވެފައެވެ.

އޭގެތެރެއިން އެމަނިކުފާނު ފާހަގަކުރެއްވި މީހުންގެ ތެރޭގައި، ހާމިދު އަބްދުލްޣަފޫރު ވެސް ހިމެނެއެވެ.

މިކަމާއި ގުޅިގެން، މިއަދު އެމްޑީޕީގެ އިންތިހާބާއި ގުޅޭ ކޮމިޓީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އިބުރޭ ވިދާޅުވީ، ހާމިދު ޕާޓީން ވަކިވީ އަމިއްލައަށް އެދިގެން ކަމަށާ، އޭނާ ޕާޓީން ވަކިވުމަށް އެދި ފޯމު ލުމަށްފަހު، ޕާޓީން ވަކިކުރުން ލަސްވާތީ އެކަމާއި ގުޅިގެން ސިޓީވެސް ލާފައިވާ ކަމަށެވެ.

"ހާމިދު އަބްދުލްޣަފޫރު އަމިއްލަ އަށް އެދިގެން ޕާޓީން ވަކިވީ. އޭނާ ޕާޓީން ކެނޑުން ލަސްވާތީ ކުރީގެ ޗެއާޕާސަން ހަސަން ލަތީފް އޭރުގެ ސެކެރެޓަރީ ޖެނެރަލް އަށް ގުޅުއްވާފައި އިލެކްޝަނާއި ގުޅައިގެން އަވސްކޮށްދޭންވެސް އެދިފައި އޮތީ އިނގޭތޯ. ހާމިދު ޕާޓީން ކަނޑައިދިނުމަށް. އެހެންވީމާ ނޯންނާނެ ނޫންތޯ. އަމިއްލަ އަށް އެދިގެން ހާމިދުވެސް ކެނޑިފައި އޮތީ." އިބުރޭ ވިދާޅުވިއެވެ.

މީގެ އިތުރުން އިބުރޭ ވިދާޅުވީ، ރައީސް ނަޝީދުގެ ގާތް ޢާއިލާ ބޭފުޅުން ޕާޓީން ވަކިކޮށްފައިވާ ކަމަށް ވިދާޅުވާއިރު, ޕްރައިމަރީގައި ވާދަކުރައްވާ ކެންޑިޑޭޓް ނަންބަރު 2 އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ވެސް އެއްބަނޑުއެއްބަފާ ބޭފުޅުން ޕާޓީން ވަކިވެފައިވާ ކަމަށެވެ. އަދި އެކަން އެނގުމުން އެ ބޭފުޅުންވެސް އަލުން ޕާޓީއާއި ގުޅިފައިވާ ކަމަށެވެ.

އިބުރޭ ވިދާޅުވީ، އެމްޑީޕީގައި ތިބި މެންބަރުންގެ ތެރެއިން އިލެކްޝަންސް ގެ ދަފްތަރުގައި ނުހިމެނޭ މެމްބަރުން ޕާޓީން ކެނޑުމުގެ ކުރިން އެ މެންބަރުންގެ ލިސްޓު، މެންބަރުންގެ ނަމާއި، އައިޑީކާޑު ނަަންބަރު އަދި އެޑްރެސް ހިމެނޭހެން ހުރިހާ ދާއިރާގެ ރައީސުންނާއި ހުރިހާ އެމްޑީޕީގެ މަޖިލިސް މެމްބަރުންނަށް ދީފައިވާ ކަމަށެވެ. އަދި އެކަން ކޮށްފައި ވަނީ މެއި މަހުގެ 29 ވަނަ ދުވަހުގެ ކުރިން ކަމަށާ، އެއަށްފަހު އެފަރާތްތަކަށް އަލުން ޕާޓީއާއި ގުޅުމަށްވެސް އެދެވޭ ވަރަށް ވަގުތު ދީފައިވާ ކަމަށެވެ.

އެހެންކަމުން، ދަފްތަރުގެ މައްސަލާގައި ރައީސް ނަޝީދު ދައްކަވާ ވާހަކަތަކަކީ ހަގީގަތުގައި ދެއްކޭނެ ވާހަކަތަކެއް ނޫންކަމަށް ވެސް އިބުރޭ ވިދާޅުވިއެވެ.