ނިކުމެ މިހުރީ "ފްލެޓު ދޮންބެ"، ބޯހިޔާވަހިކަމުގެ މައްސަލަ ހައްލު ކޮށްދޭނަން: ރައީސް ނަޝީދު

މި ވެރިކަމުގައި ބޯހިޔާވަހިކަމުގެ މައްސަލަ ހައްލުކޮށް ނުދެވުނަސް، އެމްޑީޕީގެ ރައީސް މުހައްމަދު ނަޝީދުގެ ވެރިކަމެއްގައި ބޯހިޔާވަހިކަމުގެ މައްސަލައަށް ހައްލު ހޯއްދަވާ ދެއްވާނެކަމަށް އެމަނިކުފާނު ވިދާޅުވެއްޖެއެވެ.

ނަޝީދު މިފަދައިން ވިދާޅުވެފައިވަނީ ބޮނޑިބަތް ޕާކުގައި އޮތް އެމަނިކުފާނުގެ ކެމްޕޭނު ޖަލްސާއެއްގައި ވާހަކަދައްކަވަމުން ނެވެ.

އެމަނިކުފާނު ވިދާޅުވީ ބޯހިޔާވަހިކަމުގެ މައްސަލައަކީ ހައްލު ނުކުރެވޭނެ މައްސަލައެއް ނޫންކަމަށެވެ. އަދި އެއީ މާލެއާއި އަތޮޅުތެރެއަށްވެސް ދިމާވެފައިވާ ބޮޑު މައްސަލައެއް ކަމަށާއި، އެކަން ހައްލުކުރުމަށް އެކަށީގެންވާ ގޮތެއްގައި ގޯއްޗާއި ފްލެޓު ދޫކުރުމަކީ ސަރުކާރުން ކުރަން ޖެހޭ ކަމެއްކަމަށެވެ.

ނަޝީދުގެ ވާހަކައިގައި ވަނީ މި ސަރުކާރުން ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުލުރުމަށް އެކަށީގެންވާ މަސައްކަތްތަކެއް ކުރަމުން ނުދާކަން ފާހަގަކުރައްވާފަ އެވެ.

އެއާއެކު ނަޝީދު ވަނީ އެމްޑީޕީ ސަރުކާރެއްގެ ވެރިކަމަށް އެމަނިކުފާނަށް އާދެވިއްޖެ ނަމަ ބޯހިޔާވަހިކަމުގެ މައްސަލަ ހައްލުކޮށްދެއްވާނެ ކަމުގެ ޔަގީންކަން ދެއްވާފަ އެވެ.

"ސަރުކާރުން ކުރަންޖެހޭ އެންމެ ބޮޑު މަސައްކަތަކީ ބޯހިޔާވަހިކަމުގެ މައްސަލައަށް ހައްލެއް ގެނައުން. އަޅުގަނޑު ރާއްޖޭގެ ރައްޔިތުންނަށް ތަކުރާރުކޮށް ޔަގީންކަން އަރުވަން ބޭނުން. އިރާދުކުރެއްވިއްޔާ ދެން އުފެދޭ އަޅުގަނޑުގެ އެމްޑީޕީ ސަރުކާރެއްގައި ތިބޭފުޅުންނަށް އެ މަސައްކަތް އަޅުގަނޑު އަވަދިނެތި ކުރުމުގައި ދެމި ހުންނާނަން"

އެމްޑީޕީގެ ރައީސް މުހައްމަދު ނަޝީދު

ރައްޔިތުންނަށް ބޯހިޔާވަހިކަން ކަށަވަރުކޮށްދިނުމުގެ މަސައްކަތް މި ސަރުކާަރަށް ނުކުރެވޭކަން ނަޝީދު ފާހަގަކުރައްވާފައި ވާއިރު، މިހާތަނަށް މި ސަރުކާރުން ބޯހިޔާވަހިކަމުގެ އެއްވެސް މަޝްރޫއެއް މުޅިން ނިންމާފައެއް ނުވެއެވެ.

ކުރީ ސަރުކާރުން ބޯހިޔާވަހިކަން ފޯރުކޮށްދިނުމަށް ފެށި ހިޔާ މަޝްރޫއުގެ ތެރެއިން ނިންމާފައިވާ ފްލެޓުތުގެ ފިނިޝިން މަސައްކަތްވެސް ނިންމުމަށް ސަރުކާރުން ބޮޑެތި އުޒުރުތަކެއް ދައްކާފައިވާއިރު، އެތަންތަނުގެ ކުލިވެސް މި ސަރުކާރުން ވަނީ ބޮޑުކޮށްފައެވެ.

އަދި ފްލެޓު ލިބުނު އެތައް ބައެއްގެ އަތުން ފްލެޓުތައް އަތުލާފައިވާކަމުގެ ޝަކުވާތައްވެސް ވަނީ ފެންމަތިވެގެން ގޮސްފައެވެ.