ރައީސް ޞާލިހަށް ދެވަނަ ދައުރެއް ހޯއްދަވާ ދެއްވަން މާރިޔާ ދޮރުން ދޮރަށް!
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް އެމްޑީޕީގެ ރިޔާސީ ޕްރައިމަރީ ކާމިބާރުކޮށްދިނުމަށް ކުރިއަށް ގެންދާ ޑޯ-ޓު-ޑޯ ކެމްޕޭނުގައި ޑިފެންސް މިނިސްޓަރު މާރީޔާ އަހުމަދު ދީދީ ހެންވޭރު ހުޅަނގުގެ ގެތަކަށް ޒިޔާރަތްކުރައްވައިފި އެވެ.
މި ކެމްޕޭނުގައި ޑިފެންސް މިނިސްޓަރު މާރިޔާ ދީދީއަކީ ރައީސް ސޯލިހުގެ ކެމްޕޭނުގެ މާލޭގެ ކޯޑިނޭޓަރެވެ. އެކަމަނާ މިއަދު ވަނީ ރައީސް ސޯލިހަށް ތާއީދު ހޯއްދެވުމަށް ހެންވޭރު ހުޅަނގުގެ ގެތަކަށް ޒިޔާރަތް ކުރައްވާފަ އެވެ. އަދި އެމްޑީޕީގެ މެމްބަރުންނާއި ބައްދަލުކުރައްވާ ވަގުތު ހޭދަކުރައްވާފަ އެވެ.
ރައީސް ސޯލިހަށް ތާއީދު ހޯއްދެވުމަށް މިނިސްޓަރު މާރިޔާ ގެތަކަށް ޒިޔާރަތް ކުރައްވާފައިވާއިރު އަރިހުގައި މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސެއިން) ވެސް ވަނީ ވަޑައިގެންފަ އެވެ.
ކުރިއަށް އޮތް ރިޔާސީ އިންތިޚާބުގައި ރައީސް ސޯލިހަށް ދައުރެއް ދޭން ޖެހޭކަމަށް ވިދާޅުވެ މިނިސްޓަރު މާރިޔާ ގެންދަވަނީ ވަކާލާތު ކުރައްވަމުންނެވެ.
އެގޮތުން ރައީސް ސޯލިހުގެ ކެމްޕެއިން ރަސްމީކޮށް ފެއްޓުމަށް ބޭއްވި ޖަލްސާގައިވެސް މާރިޔާ ވަނީ ރައީސް ސޯލިހަށް ދެވަނަ ދައުރެއް ދެއްވުމަށް ގޮވާލައްވާފައެވެ.
މާރިޔާ ވަނީ ރައީސް ސޯލިހު ކަންކަމުގައި ރިއެކްޓު ނުކުރައްވާކަމަށް ސިޔާސީ ލީޑަރުން ދައްކަވާ ވާހަކަތަކަށްވެސް ރައްދުދެއްވާފައެވެ. އެގޮތުން ރައީސް ސޯލިހު ކަންކަމުގައި ރިއެކްޓު ކުރައްވަނީ ހިކުމަތްތެރިކަމާއެކުގައި ކަމަށާއި، އެމްޑީޕީގެ ސިފަތައް އެމަނިކުފާނު ދަމަހައްޓަވާކަމަށް މާރިޔާ ވިދާޅުވިއެވެ.
އެމްޑީޕީގެ ރިޔާސީ އިންތިޚާބަށް ވަގުތު ކުޑަތަންވަމުން އަންނައިރު، މި އިންތިޚާބަކީ ފޯރިގަދަ އިންތިޚާބަކަށް ވާނެއެވެ. އަދި ޕާޓީގެ ކުރިމަގު ބިނާ ކުރާނެ އިންތިޚާބަކަށް ވެގެންދާނެކަމަށް ސިޔާސީ މަޝްރަހު ދިރާސާކުރައްވާ ބޭބޭފުޅުން ގެންދަވަނީ އަންދާޒާކުރައްވަމުން ނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
