މަގުމަތީގައި ކުރާ މަސައްކަތްތަކުން އަގު ނަގާނީ ކުންފުނިތަކުގެ އިމާރާތްތަކާއި ގުޅޭ ކަންކަމުން އެކަނި: ޑރ. މުއިއްޒު

މަގުމަތީގައި ކުރާ މަސައްކަތްތަކުގެ ތެރެއިން އަގު ނަގަން މާލޭ ސިޓީ ކައުންސިލުން ނިންމާފައިވަނީ ކުންފުނިތަކުގެ އިމާރާތްތަކާއި ގުޅޭ މަސައްކަތްތަކުން އެކަނި ކަމަށް މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.

ޑރ މުހައްމަދު މުއިއްޒު މިފަދައިން ވިދާޅުވެފައިވަނީ މަގުމަތީގައި ކުރާ މަސައްކަތަށް އަގު ނެގުމަށް މާލޭ ސިޓީ ކައުންސިލުން ނިންމާފައިވާކަން ފާހަގަކޮށް ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފު ފާޑުވިދާޅުވުމާއި ގުޅިގެން ކުރެއްވި ޓްވީޓެއްގަ އެވެ.

އެ ޓްވީޓުގައި މޭޔަރު މުއިއްޒު ވިދާޅުވީ މަގުމަތީގައި ކުރާ މަސައްކަތްތަކުގެ ތެރެއިން ސިޓީ ކައުންސިލުން އަގުނަގަން ނިންމާފައިވަނީ ހަމައެކަނި ކުންފުނިތަކުގެ އިމްރާތްތަކާއި ގުޅޭ މަސައްކަތްތަކުން ކަމަށެވެ.

ރައްޔިތުންގެ ގޭގެއަށް ކަރަންޓު ކޭބަލް ވެއްދުމާއި، ފެން ގުޅުމާއި އެހެނިހެން ބޭނުންތަކަށް ކޭބަލް ވެއްދުމަށް މަގު ކޮނުމުކަށް އެއްވެސް އަގެއް ނުނަގާނެކަމަށް މޭޔަރު ވަނީ ވިދާޅުވެފައެވެ.

"މަގުމަތީގައި ކުރާ މަސައްކަތްތަކުން އަގު ނެގުމަށް ސިޓީ ކައުންސިލުން ނިންމާފައިވަނީ ކުންފުނިތަކުގެ ޢިމާރާތްތަކާއި ގުޅޭ މަސައްކަތް ތަކުން. ޢާއްމު ރައްޔިތުންގެ ގޭގެޔަށް ކަރަންޓު ކޭބަލް ވެއްދުމާއި، ފެން ގުޅުމާއި، އެކިކަންކަމުގައި ކޭބަލް ވެއްދުމަށް މަގުކޮނުމަކަށް އަގެއް ނުނަގާނެ"

މާލޭ ސިޓީގެ މޭޔަރު ޑރ މުހައްމަދު މުއިއްޒު

ދެ މުއައްސަސާއިން އެއްބަޔަކު އަނެއް ބަޔަކަށް ދައްކަން ޖެހޭ ބިލުތަކެއްގެ މައްސަލައިގައި ސްޓެލްކޯއާއި މާލޭ ސިޓީ ކައުންސިލާއި ދެމެދު ވަނީ ނުތަނަވަސްކަމެއް އުފެދިފައެވެ.

ކަރަންޓު ބިލުތަކެއް ނުދައްކާ ހުރުމުގެ ސަބަބުން މާލޭ ސިޓީ ކައުންސިލްގެ ބެލުމުގެ ދަށުގައި ހުރި ބައެއް ތަންތަނުން ސްޓެލްކޯއިން ކަރަންޓު ކަނޑާލާފައިވާއިރު، ސްޓެލްކޯއިން ބިމު ކުލީގެ ގޮތުގައި 68 މިލިއަން ރުފިޔާ މާލޭ ސިޓީ ކައުންސިލަށް ނުދައްކާ އޮތްކަމަށް މާލޭ ސިޓީކައުންސިލުން ވަނީ ހާމަކޮށްފަ އެވެ.

އެހެން ނަމަވެސް މަޝްވަރާކޮށްގެން މި މައްސަލަ ހައްލުކުރެވިދާނެކަމަށް ދެ މުއައްސަސާއިންވެސް ގަބޫލުކުރެއެވެ. އަދި މި ކަމާއި ގުޅިގެން މާލޭ ސިޓީ ކައުންސިލުންވެސް ސްޓެލްކޯއިންވެސް އާންމުންނަށް ދޭން ޖެހޭ ޚިދުމަތަކަށް ބުރޫ ނާރާނެކަމަށް ދެ މުއައްސަސާއިން ވެސް ވަނީ ކަށަވަރުކޮށްދީފަ އެވެ.