ޕާޓީގެ ތެރެއިން ވަކި ގޮތްޕެއް ހަދާކަށް އެއްވެސް ހުރަހެއް ނެތް: އިބްރާހީމް ވަހީދު

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ތެރެއިން ވަކި ގޮފިތައް އުފެއްދުމަށް އެއްވެސް ހުރަހެއް ނެތްކަމަށް އެމްޑީޕީގެ ޗެއާޕާސަންގެ ނައިބު އިބުރާހިމް (އިބުރޭ) ވިދާޅުވެއްޖެ އެވެ.

އެމްޑީޕީގެ ރިޔާސީ ޕްރައިމަރީއަށްފަހު ޕާޓީގެ ރައީސް މުހައްމަދު ނަޝީދު ވަނީ "ފިކުރެއްގެ ދިރުން" ނަމުގައި ގޮތްޕެއް ރަޖިސްޓްރީ ކުރުމުގެ މަސައްކަތްޕުޅު ފައްޓަވާފަ އެވެ.

އެމަނިކުފާނު ވިދާޅުވީ ރައީސް ޞާލިހާއެކު އެމްޑީޕީއަށް ކުރިއަށް އޮތް ރިޔާސީ އިންތިޚާބު ކާމިޔާބު ކުރެވިދާނެކަމަށް ގަބޫލުފުޅު ނުކުރައްވާ ކަމަށެވެ. މިވަގުތަށް އެމަނިކުފާނަށް ފެނިވަޑައިގަންނަވާ އެންމެ ރަނގަޅު ގޮތަކީ ޕާޓީގެ ގިނަ އަދަދެއްގެ ބަޔަކު އެމަނިކުފާނުގެ "ފިކުރެއްގެ ދިރުން" ގޮތްޕާއި ގުޅިވަޑައިގަތުންކަމަށް ނަޝީދު ވިދާޅުވި އެވެ.

ނަޝީދުގެ މި ވާހަކަތައް އެމްޑީޕީގެ މައެއް މަޖިލިސް މެމްބަރުން ސިފަކުރައްވަމުން ދަނީ އެއީ ރައީސް ޞާލިހާއި ދެކޮޅަށް ކުރައްވާ މަސައްކަތްޕުޅެއްގެ ގޮތުގައެވެ. އެގޮތުން ނަޝީދުގެ މަގްސަދަކީ ކުރިއަށް އޮތް ރިޔާސީ އިންތިޚާބު ރައީސް ޞާލިހަށް ކާމިޔާބުވިޔަ ނުދިނުންކަމަށް އެމްޑީޕީގެ މަޖިލިސް މެމްބަރު އިކުރާމު ވަނީ ތުހުމަތު ކުރައްވާފައެވެ.

އެމްޑީޕީގެ ރިޔާސީ ޕްރައިމަރީގެ ދާއިމީ ނަތީޖާ އިއުލާނުކުރުމަށް މިއަދު އިންތިޚާބީ ކޮމެޓީއިން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ނަޝީދު މިހާރު ކުރައްވާ މަސައްކަތްޕުޅު ޕާޓީގެ އަސާސީ ގަވައިދާއި ޚިލާފު ވޭތޯ އަހާފަ އެވެ. އަދި ރައީސް ޞާލިހަށް ތާއީދު ނުކުރައްވާނެކަމަށް ވިދާޅުވެ ނަޝީދު ދައްކަވާ ވާހަކަތައް އަސާސީ ގަވައިދާއި ޚިލާފުވޭތޯވެސް ނޫސްވެރިޔާ އެއްސެވިއެވެ.

އެ ސުވާލަށް ޖަވާބުދެއްވަމުން ޗެއާ ޕާސަންގެ ނައިބު އިބުރޭ ވިދާޅުވީ ޕާޓީގެ ތެރެއިން ގޮތްޕެއް އުފެއްދުމަކީ އަސާސީ ގަވައިދާއި ޚިލާފުކަމެއް ނޫން ކަމަށެވެ. އެކަން ކުރުމަށް އެއްވެސް ހުރަހެއް ނެތް ކަމަށް އޭނާ ވިދާޅުވި އެވެ.

"ގޮފި ހެދޭނެ އިނގޭތޯ! ގޮފި ހެދުމަކީ ކެންޑިޑޭޓާއި ދެކޮޅަށް މަސައްކަތްކުރުން ކަމަކަށް ނުބެލެވޭނެ. ގޮތްޕަކީ ޕާޓީގެ އަސާސީ ގަވައިދުގެ ދަށުން ހެދޭއެއްޗެއް.. ފިކުރީ ގޮފިވެސް ހެދޭނެ. އެހެން ނަމަވެސް އަޅުގަނޑުމެން ބަލާނަން ގޮފި ހިންގަނީ ގައވައިދާއި އެއްގޮތަށްތޯ"

އެމްޑީޕީގެ ޗެއާޕާސަންގެ ނައިބު އިބުރާހިމް (އިބުރޭ)

އިބުރޭ ވިދާޅުވީ ރައީސް ނަޝީދު ޕާޓީގެ ރައީސްގެ ގޮތުގައި ހުންނަވާ ޕާޓީގެ ކެންޑިޑޭޓާއި ދެކޮޅަށް މަސައްކަތްޕުޅު ކުރައްވާނެކަމަށް ގަބޫލުފުޅު ނުކުރައްވާ ކަމަށެވެ.

މިހާތަނަށް އެމަނިކުފާނު ޕާޓީގެ ކެންޑިޑޭޓާއި ދެކޮޅަށް ކަމެއް ކުރައްވާފައިވާކަން ފާހަގަ ނުކުރެއްވޭކަމަށް އޭނާ ވިދާޅުވި އެވެ.