ފުލުހުންނަކީ ތައުޙީދު ފަހުމުވެފައިވާ ބަޔަކަށް ހެދުމަކީ ހޯމް މިނިސްޓްރީގެ ޒިންމާއެއް: ޝެއިޚް ޝަފީއު

ބޭރު ޤައުމުތަކަށް ފޮނުއްވާ ފުލުހުންނަކީ އިސްލާމްދީނާއި މި ދީނުގެ ތައުޙީދު ރަނގަޅަށް ފަހުމުވެފައިވާ ފުލުހުންނަށް ހެދުމަކީ ދިވެހި ސަރުކާރާއި ފުލުހުންނާ ބެހޭ މިނިސްޓްރީ، ހޯމް މިނިސްޓްރީއާއި ފުލުހުންގެ އިދާރާގެ ޒިންމާއެއް ކަމަށް ދީނީ ޢިލްމުވެރިޔާ އައްޝައިޚް ޝަފީއު ވިދާޅުވެއްޖެއެވެ.

އިންޑިއާއިން ތަމްރީނުތައް ފުރިހަމަކުރި ދިވެހި ފުލުހުންގެ ކިތްކުރީ ހިންދޫ ދީނުގެ އިއުތިޣާދާއި ގުޅިފައިވާ ތިކާލާ ޖެހުމާއި ގުޅިގެން ޝެއިޚް ޝަފީއު ކުރެއްވި ޓުވީޓެއްގައި ވިދާޅުވީ، އެފަދަ އިސްލާމްދީނާއި އިސްލާމްދީނުގެ ތައުޙީދާ ފުށުއަރާ ޝިރުކުގެ ކަންކަން ނުވަތަ ޝިރުކަށް ވާސިލުވެދާ ފަދަ ކަންކަން ކުރާން ޖެހުމަކީ އިންތިހާއަށް ކަންބޮޑުވާކަމެއް ކަމަށެވެ.

"ޚަބަރު ލިބިފައިވާ ގޮތުގައި އެފަދަ ކަންކަން ކުރުމަށް ނުވަތަ ކުރެވުނަ ދިނުމަށް ބައެއް ފުލުހުން ދެކޮޅު ހެދުމުން އެ ކަންކަން އެ ފުލުހުންނާ މެދު ނުހިނގައެވެ." ޝެއިޚް ވިދާޅުވި އެވެ.

ޝެއިޚު ޝަފީއު އިތުރަށް ވިދާޅުވީ، ޝިރުކުގެ ދީންތަކުގެ އަހުލުވެރީން އެބައިމީހުންގެ ދީނުގެ އިޢުތިޤާދުގައި ހިމެނޭ ޝިރުކިއްޔާތުގެ ކަންކަމުގައި ބައިވެރިކުރުވާން އުޅުމުން އެ ކަންކަމާ ދެކޮޅު ހެދުމަކީ ކޮންމެ މީހެއްގެ މައްޗަށް ލާޒިމު ކަމެއް ކަމެއް ކަމަށާ، އެއީ ގާނޫނީ ޒިންމާއެއް ކަމަށް ފުލުހުންވެސް ދަންނަން ޖެހޭ ކަމަށެވެ.

އަދި އެފަދަ ކަންކަމުގައި ބައިވެރިވުމަކީ ތައުޙީދުގެ ޢަޤީދާއިން ބޭރުވެ ކުފުރުގެ ތެރެއަށް ވެސް ހިނގައިދާނޭ ކަމެއް ކަމަށް ވާއިރު އެ ކަންކަމާ ފާޅުގައި ދެކޮޅު ހެދުމުގެ ހިތްވަރު ހުންނާން ވާނެ ކަމަށްވެސް ޝެއިޚު ވިދާޅުވި އެވެ.

މިއާއެކު ޝެއިޚް ވަނީ، ބޭރު ޤައުމުތަކަށް ފޮނުއްވާ ފުލުހުންނަކީ އިސްލާމްދީނާއި މި ދީނުގެ ތައުޙީދު ރަނގަޅަށް ފަހުމުވެފައިވާ ފުލުހުންނަށް ހެދުމަކީ ދިވެހި ސަރުކާރާއި ފުލުހުންނާ ބެހޭ މިނިސްޓްރީ، ހޯމް މިނިސްޓްރީއާއި ފުލުހުންގެ އިދާރާގެ ޒިންމާއެއް ކަން ފާހަގަކުރައްވާފައެވެ.

"އަދި އިސްލާމްދީނާ ފުށުއަރާ އެއްވެސް ކަމެއްގައި ބައިވެރި ނުވުމަށް އެ ފުލުހުންނަށް އިރުޝާދު ދެއްވައި ނަސޭހަތްތެރިވުމަކީ ތި ބޭފުޅުންގެ ( ސަރުކާރާއި، ހޯމް މިނިސްޓްރީއާއި ފުލުހުންގެ އިދާރާގެ) މައްޗަށް ދީނީ ގޮތުންނާއި ޤާނޫނީ ގޮތުން ލާޒިމުކުރާ ކަމެއް." ޝަފީއު ވިދާޅުވި އެވެ.

މީގެ އިތުރުން، އެޤައުމުތަކުގެ އެ ކަމާ ބެހޭ އިދާރާތަކަށް ދިވެހި ފުލުހުންނަކީ މުސްލިމުން ކަމާއި އިސްލާމްދީނާ ފުށުއަރާ އެއްވެސް ކަމެއް އަދި އިޙްތިފާލެއް އެ ފުލުހުންނާ މެދުގައި ހިންގައިގެން ނުވާނޭ ކަމަށް ވެސް އެ ފަރާތްތަކަށް އެންގުމަކީ ކޮންމެހެން ކުރާން ޖެހޭ ކަމެއް ކަމަށްވެސް ޝެއިޚު ވިދާޅުވި އެވެ.

"ދިވެހީންގެ ވަޠަނާއި ދީނަށް ޙުރުމަތްތެރިކޮށް ހިތުމަކީ ފުލުހުންގެ ބޮލުގައި އެޅިފައިވާ ދީނީ އަދި ޤައުމީ ވާޖިބެކެވެ. އަދި އެއީ ފުލުހުންގެ ހުވާގައި ވެސް ހިމެނޭ ބައެކެވެ." ޝެއިޚް ވިދާޅުވި އެވެ.