ރައީސް ޔާމީން އަކީ ވަކި ޢައިލާއަކަށް ބަލައިގެން ވަޒީފާ ދެއްވި ބޭފުޅެއް ނޫން: ޑރ. ޝަހީމް

ރައީސް ޔާމީން ޢަބްދުލްޤައްޔޫމްއަކީ ވަކި އާއިލާއަކަށް، ވަކި މީހެއްގެ އަނބިކަނބަލަކަށް، ނުވަތަ ވަކި މީހެއްގެ ފިރިކަލަކަށް ބަލައިގެން ވަޒީފާ ދެއްވި ބޭފުޅެއް ނޫން ކަމަށް ޑރ މުޙައްމަދް ޝަހީމް ޢަލީ ސަޢީދު ވިދާޅުވެއްޖެއެވެ.

ޝަހީމް މިހެން ވިދާޅުވީ ދިކޮޅު ކޯލިޝަނުން ދަރުބާރުގޭގައި ބާއްވާ 'ހޯޕް ކޮންފަރެންސް' ފެށުމުގެ ރަސްމިއްޔާތުގައި ވާހަކަދައްކަވަމުންނެވެ.

ޝަހީމް ވިދާޅުވީ ރައީސް ޔާމީންގެ ޒައާމަތު ބިނާވެފައިވަނީ، ދިވެހިވަންތަކަމަކާއި ދިވެހި ދައުލަތުގެ މިނިވަންކަމާއި އިސްތިގުލާލު ރައްކައުތެރިކޮށް ދެމެހެއްޓުމުގެ އިތުރުން ރާއްޖޭގައި އިގްތިސާދީ މިނިވަންކަން ގާއިމު ކުރުމާއި ދިވެހިވަންތަކަމުގެ ސަގާފަތް ރާއްޖޭގައި ދެމެހެއްޓުމުގެ މައްޗަށްކަމަށެވެ.

ޑރ ޝަހީމް ވިދާޅުވީ ރައީސް ޔާމީންގެ ޒައާމަތުގެ ދަށުން ކުރެވޭ ވެރިކަމަކަށް މިއަދު ދިވެހިން ބޭނުން ޖެހިފައިވާ ވަރާއިމެދު މިއަދު ވިސްނާލަންޖެހިފައިވާކަމަށެވެ. އެނާ ވިދާޅުވީ ރައީސް ޔާމީންގެ ސަރުކާރުގައި ބިނާ ކުރެވިފައިވާ ދަރުމަވަންތަ ހޮސްޕިޓަލަށް ބަލާލުމުން ފެނިގެންދަނީ އުފެއްދުންތެރިކަމުގެ ވިސްނުމުގެ އިސްކޮޅު ހުރި މިންވަރުކަމަށެވެ. އަދި ބިނާ ކުރެވިފައިވާ ސީޕްލޭން ޓާމިނަލްއަށް ބަލާލުމުން އެ ފެނިގެންދަނީ ރާއްޖޭގެ ތަރައްގީ މިސްރާބު ހިފާފައިވާ މިންގަނޑުކަމަށްވެސް ވިދާޅުވިއެވެ. ހުޅުމާލެ އަދި މާލެ ގުޅުވާލުމަށް ބިނާ ކުރެވިފައިވާ ބުރިޖުން ރަމްޒުކޮށްދެނީ ތަރައްގީ ދަތުރުކޮށްފައިވާ މިސްރާބުކަމަށެވެ. އެހެންނަމަވެސް މިއަދު ހުރިހާ ކަމެއް ހުރީ ހުއްޓިފައިކަމަށާއި ދިވެހި ގައުމު އުސްމިންތަކަކަށް ގެންދެވުމައްޓަކައި ރައީސް ޔާމީން ބުރަ މަސައްކަތްތަކެއް ކުރެއްވިކަމަށް އެނާ ފާހަގަކުރެއްވިއެވެ.

"ރައީސް ޔާމީން އަބްދުލްގައްޔޫމުގެ ވެރިކަމުގައި އެންމެ ފާހަގަކޮށްލެވޭ އެއް ކަމަކީ، އެ މަނިކުފާނަކީ ޒުވާނުންނަށް ފުރުސަތު ދެއްވި ބޭފުޅެއް. އެ މަނިކުފާނުގެ ކެބިނެޓަށް ބެއްލެވި ނަމަވެސް އެ މަނިކުފާނަކީ ވަކި އާއިލާއަކަށް، ވަކި މީހެއްގެ އަނބިކަނބަލަކަށް، ވަކި މީހެއްގެ ފިރިކަލަކަށް ބަލައިގެން ވަޒީފާ ދެއްވި ބޭފުޅެއް ނޫން"

"ކިތަންމެ ނިކަމެތި އާއިލާއަކަށް ނިސްބަތްވި ނަމަވެސް، އެ އާއިލާއަކަށް ނިސްބަތްވާ އެ ބޭފުޅަކީ ނުވަތަ ޒުވާނަކީ ތައުލީމީ، ގާބިލު ބޭފުޅެއް ނަމަ، ގައުމުގެ ކަންތައްތައް ހަވާލުކުރުމާ ފަސްޖެހިވަޑައިގަތް ބޭފުޅެއް ނޫން" 2018 ގެ ރިޔާސީ އިންތިޚާބުގައި ރައީސް ޔާމީންގެ ރަނިން މޭޓުގެ ގޮތުގައި އިންތިޚާބުގައި ވާދަ ކުރެއްވި ޑރ ޝަހީމް ވިދާޅުވިއެވެ.

އެ އެންމެހައި ސަބަބުތަކަށްޓަކައި ޔާމީނުގެ ވެރިކަމެއް އަލުން އިއާދަކުރުމަށް އަޒުމު އާކުރުމަށް ޝަހީމް ވަނީ ގޮވާލާފައެވެ.