ޕީޕީއެމުން ދީން ހަތިޔާރަކަށް ނުހަދާނެ: ޝިޔާމް

ޕީޕީއެމުން ދީން ހަތިޔާރަކަށް ނުހަދާނެ ކަމަށާ، ރައީސް ޔާމީން ވެރިކަން ކުރެއްވީވެސް ދީން ހަތިޔާރަކަށް ހަދައިގެން ނޫން ކަމަށް އެޕާޓީގެ ނައިބްރައީސް އަހްމަދް ޝިޔާމް ވިދާޅުވެއްޖެއެވެ.

ޝިޔާމް މިހެން ވިދާޅުވީ ޕީޕީއެމް އިން މިހާރު ކުރިއަށް ގެންދަ ހޯޕް ކޮންފަރެންސްގައި ވާހަކަ ދައްކަވަމުންނެވެ.

ޕީޕީއެމްގެ އަގުކުރުންތައް މައިގަނޑު ގޮތެއްގައި އޮތީ ދެބަޔަކަށް ކަމަށް ޝިޔާމް ވިދާޅުވިއެވެ. އެއީ ޤައުމިއްޔަތާއި ގުޅުން ހުރި ބަޔަކާއި ސިޔާސަތުތަކާއި ގުޅުން ހުރި ބައެއް ކަމަށް ޝިޔާމް ވިދާޅުވިއެވެ. ޤައުމިއްޔަތާއި ގުޅުންހުރި ބައިގައި އިސްލާމް ދީނާއި، ޤައުމިއްޔަތާއި، މިނިވަންކަމާއި ގުޅޭ އަގުކުރުންތައް ހިމެނެއެވެ.

"ދީނާއި ޤައުމިއްޔަތާއި ސިޔާސީ ޕާޓީތަކަށް ވިއްކޭނެ އެއްޗެއްނޫން، އަޅުގަނޑުމެން ނުވެސް ވިއްކަން" ޝިޔާމް ވިދާޅުވިއެވެ.

ދީން ހަތިޔާރަކަށް ހަދައިގެން ޕީޕީއެމުން މަސައްކަތެއް ނުކުރާނެ ކަމަށް ޝިޔާމް ވިދާޅުވިއެވެ.

"އަޅުގަނޑުމެންނަކީ އިސްލާމް ދީނަކީ ހިމާޔަތް ކުރަން ޖެހޭ އެއްޗެއްކަމަށް ޤަބޫލްކޮށްގެން، އިސްލާމް ދީނުގެ މަތީގައި އަސާސްތައް ޤާއިމްކުރާ ބައެއް" ޝިޔާމް ވިދާޅުވިއެވެ.

ރައީސް ޔާމީނުގެ ޒައާމަތުގައި އިސްލާމްދީން ހިމާޔަތް ކުރުމަށް އެމަނިކުފާނު ގިނަ މަސައްކަތްތަކެއް ކުރައްވާފައިވާ ކަން ފާހަގަ ކުރައްވައި ޝިޔާމް ވިދާޅުވީ ދީނީ ތައުލީމް އަށަގަންނަވައި ދީނީ ތައުލީމް އުގަންނައި ދެއްވުމަށްޓަކައި އިސްލާމިކް ޔުނިވަރސިޓީ އެއް އުފެއްދެވި ކަމަށާއި، ދީނީ ވައުޒު ވިދާޅުވުމަށް ޓަކައި ބޭރުން ބޭފުޅުން ގެންނަވައި ވަރަށް ގިނަ ޕްރޮގްރާމްތައް ހިންގާފައިވާ ކަމަށާއި، އިސްލާމް ދީން ހިމާޔަތް ކުރުމުގެ މަސައްކަތް ޢަމަލުން ދައްކަވައިފައިވާ ކަމަށެވެ.

"ރައީސް ޔާމިން އެއްވެސް ހާލަތެއްގައި ދީން ހަތިޔާރަކަށް ހައްދަވައިގެން ވެރިކަން ކުރެއްވީކީ ނޫން، އިސްލާމް ދީނުގެ ހައްޤުގައި ވިދާޅުވާން ޖެހޭ އެއްވެސް ބަސްފުޅެއް ވިދާޅުވުމަކަށް އެމަނިކުފާނު ފަސްޖެހިވަޑައިގެންފައެއް ނުވޭ" ޝިޔާމް ވިދާޅުވިއެވެ.

ރައީސް ޔާމިންގެ ސަރުކާރުގައި ރައީސް ޔާމިން ދިޔައީ ދިވެހިންގެ ކަންކަމުގައި ގޮތް ނިންމުމުގެ ބާރާއި އިޚްތިޔާރު އޮތީ ދިވެހިންގެ އަތް މަތީގައި ކަން ޤަބޫލް ކުރައްވައި އެގޮތުގައި ކަމަށް ޝިޔާމް ވިދާޅުވިއެވެ.

މިހާރު ފެންނަމުންދަނީ ދިވެހިންގެ އަތްމަތިން އެބާރު މުޅިން ގެއްލިފައިވާ މަންޒަރުކަމަށް ޝިޔާމް ވިދާޅުވިއެވެ.