އެޗްޑީސީއިން ހުޅުމާލޭގައި ގާއިމުކޮށްފައިވާ ރަށުމާރުކޭޓުން ބީލަމުގެ އުސޫލުން ގޮޅި ކުއްޔަށް ދޫކުރަނީ

ހުޅުމާލޭގައި ގާއިމުކޮށްފައިވާ ރަށުމާރުކޭޓުން ގޮޅި ކުއްޔަށް ހިފުމުގެ ފުރުސަތު ހުޅުވާލެވިފައިވާކަން އާންމުކޮށް އަންގާ ހައުސިންގ ޑިވެލޮޕްމެޓް ކޯޕަރޭޝަން (އެޗްޑީސީ) އިން އިއުލާންކޮށްފިއެވެ.

އެގޮތުން އެޗްޑީސީއިން ނެރިފައިވާ އިއުލާނެއްގައި ގޮޅި ހިންގުމަށް ކުއްޔަށް ހިފާނެ ފަރާތެއް ކަނޑައެޅީގެންދާނީ ބީލަމުގެ އުސޫލުން ކަމަށާއި ބީލަން ހުށަހަޅާ ފަރާތްތަކުގެ ތެރެއިން އެންމެމަތީ އަގުހުށަހަޅާ ފަރާތްތަކަށް ކަމަށް ވަނީ ބުނެފައެވެ.

ބީލަން ކުރިއަށް ގެންދާނެ ތާރީހެއްގެ ގޮތުގައި އެ ކޯޕަރޭޝަނުން ބުނެފައިވަނީ 08 މާރިޗް 2023 އެވެ.

އެގޮތުން މިދުވަހުގެ ބީލަން 09:30 އާއި 11:00 އާ ދެމެދު ބީލަމުގެ ފޯމް ބަަލައިގަތުމަށްފަހު ބީލަން ހުޅުުވިގެން ދާނީ 11:00 އާއި ހަމައަށް ދޫކުރެވިފައިވާ ނަންބަރުތަކަށް ކަމަށް އިއުލާން ކޮށްފައިވެއެވެ.

މިކަން ކުރިއަަށް ގެންދާނެ ތަން ފަހުގެ ތާރީޙުގައި އިއުލާން ކުރެވޭނެ ކަަމަށް އެޗްޑީސީއިން ބުނެފައިވެއެވެ.

ބީލަން ފެށޭ އަގެއްގެ ގޮތުގައި ކަނޑައަޅާފައިވަނީ 3500ރ. (ތިންހާސް ފަސްސަތޭކަ) އެވެ.

ކުއްޔަށް ދޫކުރުމަށް ހަމަޖެހިފައިވަނީ ބީލަމުގެ އުސޫލުން ފޯމު ހުށަހަޅާ ފަރާތްތަކުގެ ތެރެއިން އެންމެ މަތިން އަގު ހުށަހަޅާ 23 ފަރާތަށް 2 އަހަރުގެ މުއްދަތަކަށް 73.33 އަކަފޫޓުގެ ގޮޅިއެކެވެ.

ބީލަން ފޯމު ހުށަހެޅުމާ ގުޅޭ އިތުރު މައުލޫމާތު އެ ކޯޕަރޭޝަންގެ ވެބްސައިޓް ގައި ޝާއިއުކޮށްފައިވާ އިއުލާނާއިއެކު މައުލޫމާތު ކަރުދާހުގައި ހިމެނިފައިވާނެއެވެ.

އިތުރު މައުޅޫމާތު ސާފުކުރުމަށް މި ކޯޕަރޭޝަނުގެ ނަންބަރު 1516 އަށް ގުޅުއްވުމަށް އެޗްޑީސީއިން އެދިފައިވެއެވެ.