މަތީ ތައުލީމީ ދާއިރާގެ މަސައްކަތްތެރިންގެ މުސާރަ ބޮޑުކޮށް، ބޮޑުކުރި މުސާރަ ހާމަކޮށްދެއްވައިފި

މަތީ ތައުލީމާއި ތަމްރީނުގެ ދާއިރާގެ މުވައްޒަފުންގެ މުސާރަ ބޮޑުކޮށްފިއެވެ.

ހިރިލަންދޫ ސްކޫލަށް 71 އަހަރު ފުރުނު މުނާސަބާ ފާހަގަކުރުމަށް ބޭއްވެވި ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ މާރޗް 1 އިން ފެށިގެން އެ ދާއިރާގެ މުސާރަ އަށް ބަދަލު ގެންނަވާފައިވާ ކަމަށެވެ.

އެއާއެކު، ޤައުމީ ޔުނިވަރސިޓީ އާއި ޕޮލިޓެކްނިކް އަދި އިސްލާމިކް ޔުުނިވަރސިޓީގެ މުވައްޒަފުންގެ މުސާރަ ދެން ލިބޭނީ މުސާރަ އަށް ގެނައި ހެޔޮ ބަދަލުތަކާ އެކުގައި ކަމަށްވެސް އެމަނިކުފާނު ވިދާޅުވިއެވެ.

އެގޮތުން މީގެ ކުރިން ގައުމީ ޔުނިވަރސިޓީގެ ލެކްޗަރާއަކަށް ލިބުނު މުސާރަ އަކީ 18880 ކަމަށާއި އެހެން ނަމަވެސް، މިހާރު ގެނައި ބަދަލަށް ފަހު އިތުރު ވަގުތާ ނުލައި ލެކްޗަރާއިންނަށް މަހަކު 29900 ރުފިޔާ ލިބޭނެ ކަމަށާ އަދި އެއީ ގާތްގަނޑަކަށް 59 އިންސައްތަ ކުރިއެރުމެއް ކަމަށްވެސް ވިދާޅުވި އެވެ.

މީގެ އިތުރުން ރައީސް ވިދާޅުވީ ސީނިއަރ ލެކްޗަރާއަކަށް މިހާރު ލިބެނީ 20831 ރުފިޔާ ކަމަށާއި އަލަށް ގެނައި ބަދަލާއެކު ސީނިއަރ ލެކްޗަރާއަކަށް 34000 ރުފިޔާ އިތުރު ވަގުތާއި ނުލައި ލިބޭނެ ކަމަށެވެ.

ހަމައެހެންމެ, އެސިސްޓެންޓް ޕޮރޮފެސަރެއްގެ މުސާރަ 23500 ރުފިޔާ އިން 39400 އަށް ބޮޑުކޮށްފައިވާއިރު، އެސޯސިއޭޓް ޕްރޮފެސަރެއްގެ މުސާރަ 26000 ރުފިޔާ އިން 45000 ރުފިޔާ އަށް ބަދަލުވެގެން ދާނެ ކަމަށްވެސް ރައީސް ޞާލިހް ވިދާޅުވިއެވެ.

މީގެ އިތުރުން، މެނޭޖްމެންޓު ލެވެލްގައި މަސައްކަތް ކުރާ މީހުންގެ މުސާރަ އަށް ވެސް ހެޔޮ ބަދަލުތަކެއް އަންނާނެ ކަން ރައީސް ވަނީ ފާހަގަކުރައްވާފައެވެ.

އިތުރު މަގާމުތަކުގެ މުސާރައަށް ގެނައި ބަދަލުތައް:

* ޑީން: 30،000 ރުފިޔާއިން 38،000 ރުފިޔާއަށް

* ޑެޕިއުޓީ ވައިސް ޗާންސެލަރު: 39،000 ރުފިޔާއިން 48،000 ރުފިޔާއަށް

* ރަޖިސްޓްރާ: 23000 ރުފިޔާއިން 42000 ރުފިޔާއަށް

* ވޮކޭޝަނަލް އެސޯސިއޭޓް ލެކްޗަރާ: 14،000 ރުފިޔާއިން 26،000 ރުފިޔާއަށް

* ވޮކޭޝަނަލް ލެކްޗަރާ: 17،000 ރުފިޔާއިން 29،000 ރުފިޔާއަށް

* ވޮކޭޝަނަލް ސީނިއާ ލެކްޗަރާ: 17،000 ރުފިޔާއިން 34،000 ރުފިޔާއަށް

މި ބަދަލާއެކު ޖުމްލަ 767 މުވައްޒަފަކަށް އަހަރެއްގެ މައްޗަށް 62 މިލިއަން ރުފިޔާ ހޭދަކުރުމަށް ހަމަޖެހިފައިވާކަމަށް ރައީސް ފާހަގަކުރެއްވިއެވެ.

މަތީ ތައުލީމާއި ތަމްރީނުގެ ދާއިރާގެ މުވައްޒަފުންގެ މުސާރައަށް ގެނައި ހެޔޮ ބަދަލުގެ އިތުރު ތަފްސީލު ކުރިއަށް އޮތް ދެތިން ދުވަހުގެ ތެރޭގައި ފިނޭންސް މިނިސްޓްރީ އާއި ހަޔަރ އެޑިއުކޭޝަން މިނިސްޓްރީ އިން ހާމަކުރާނެ ކަމަށް ވެސް ރައީސް ވިދާޅުވިއެވެ.