ސިޓީ ކައުންސިލުން ބަގީގެ ޚިދްމަތަށް ހެޔޮ އަގުތަކެއް ކަނޑައަޅައިފި

މާލެ ސިޓީ ކައުންސިލުން ވިލިމާލޭގައި ބަގީގެ ޚިދްމަތް ދިނުމަށް ހެޔޮއަގުތަކެއް ކަނޑައަޅައިފިއެވެ.

ވިލިމާލޭގައި ބަގީގެ ޚިދްމަތް ދިނުމަށް މާލެ ސިޓީ ކައުންސިލުން އަގުތައް ކަނޑައަޅައިފައިވަނީ މާލެ ސިޓީ ކައުންސިލުގެ 4 ވަނަ ދައުރުގެ 91 ވަނަ ރަސްމީ އާންމު ޖަލްސާގައެވެ. މި ހުށައެޅުން ހުށައެޅީ ޑެޕިއުޓީ މޭޔަރ އަހުމަދު ނަރީޝް އެވެ. މި ހުށައެޅުމަށް ތާއީދުކުރެއްވީ ވިލިމާލެ ދާއިރާގެ ކައުންސިލަރ ނަހުލާ އަލީއެވެ.

ވިލިމާލޭގައި ދިނުމަށް ހަމަޖެހިފައިވާ ބަގީގެ ޚިދްމަތަށް ކަނޑައަޅާފައިވާ އަގުތަކަކީ ޚިދްމަތް ހޯދާ ރައްޔިތުންނަށް ލުއިފަސޭހަ ވާނެ ފަދަ އަގުތަކެކެވެ. ބަގީ ދުއްވާ ރޫޓުން ބަގީއަށް އަރާ ނަމަ ބަގީއަށް ދޭން ޖެހެނީ 2 ރުފިޔާއެވެ. ނަމަވެސް "ޕްރައިވެޓް ހަޔަރ" ކުރާނަމަ ބަގީގެ އަގަށް ބަދަލު އަންނާނެއެވެ.

އެގޮތުން 4 ސީޓުގެ ބަގީ އަކަށް ދައްކަން ޖެހެނީ 4 ރުފިޔާއެވެ. 6 ސީޓޫގެ ބަގީއަކަށް ދައްކަން ޖެހެނީ 10 ރުފިޔާއެވެ. 12 ސީޓުގެ ބަގީއެއް ހަޔަރ ކުރާނަމަ 15 ރުފިޔާ ދައްކަން ޖެހެއެވެ.

ސިޓީ ކައުންސިލުން ވިލިމާލޭގައި ބަގީގެ ޚިދްމަތް ދޭން ފެށުމަށް މަސައްކަތް ކުރަމުންދާއިރު ވިލިމާލޭގައި އެމްޓީސީސީ އިން ދަނީ  މިނީ ބަހުގެ ޚިދްމަތްވެސް ދެމުންނެވެ.