އަންހެން ނޫސްވެރިއެއްގެ މޭމަތީ ފުލުހަކު އަތްލި މައްސަލަ އެމްޖޭއޭއިން ކުށްވެރިކޮށްފި!
އިދިކޮޅު މުޒާހަރާ ކަވަރުކުރަމުން ދިޔަ "ހުވަދޫ އޮންލައިން" ގެ އަންހެން ނޫސްވެރިއެއްގެ މޭމަތީ ފުލުހަކު އަތްލި މައްސަލަ މޯލްޑިވްސް ޖާނަލިސްޓު އެސޯސިއޭޝަން (އެމްޖޭއޭ) އިން ކުށްވެރިކޮށްފި އެވެ.
އެ ކަމާއި ގުޅިގެން އެމްޖޭއޭއިން ނެރުނު ބަޔާނެއްގައި ބުނެފައިވަނީ ހުވަދޫ އޮންލައިންގެ އަންހެން ނޫސްވެރިޔާ ފާތިމަތު ތައުފީގުގެ މޭމަތީގައި ފުލުހަކު އަތްލި މައްސަލަ އެ އެސޯސިއޭޝަންގެ ސަމާލުކަމަށް އައުމުން އެކަން ހިނގާފައިވާ ގޮތް ބަލާފައިވާނެ ކަމަށެވެ. އަދި ބެލިބެލިމުން ކަންބޮޑުވުން ހުރި ކަންކަން ފާހަގަކުރެވިފައި ވާ ކަމަށެވެ.
އެމައްސަލަ ސަމާލުކަމަށް އައުމާއެކު އެ ޔޫނިއަންގެ ވިމަންސް ކައުންސިލް އެއްވެ އެހާދިސާއާ ގުޅޭ މައުލޫމާތު އެއްކޮށް ބެލިއިރު އެކަމުގައި ކަންބޮޑުވާ ކަންތައްތަކެއް ފާހަގަ ކުރެވިފައިވާ ކަމަށް އެމްޖޭއޭއިން ވަނީ ބުނެފައެވެ.
އަދި އެކަން ފާޅުގައި ކުށްވެރި ކުރުމަށް ވިމެންސް ކައުންސިލަށާއި އެ ޔޫނިއަންއަށް އިއްތިފާގު ވެވުނު ކަމަށް އެމްޖޭއޭއިން ނެރުނު ބަޔާނުގައި ބުނެފައިވެއެވެ.
އެމްޖޭއޭއިން ބުނީ ފާތިމަތު ތައުފީގު އެކައުންސިލަށް މައުލޫމާތުދީފައިވާ ގޮތުގައި މި ހާދިސާ ހިގައިދިޔަ ވަގުތަކީ ފުލުހުންގެ ފުލުހުންގެ އަންހެން މުވައްޒަފުން ވެސް ތިބި ވަގުތެއް ކަމަށެވެ. އަދި އަންހެން ނޫސްވެރިއެއްގެ ގައިގައި ފިރިހެން އޮފިސަރަކު އަތްލުމަކީ އެއްވެސް ގޮތަކަށް ހިނގައިގެން ވާނެ ކަމެއް ނޫން ކަމަށެވެ.
މުޒާހަރާތައް ކަވަރުކުރާ ނޫސްވެރިންވެސް އެއަދާކުރަނީ އެމީހުންގެ ޒިންމާކަން ފުލުހުންވެސް ގަބޫލުކޮށް އެމީހުންގެ މަސައްކަތަށް ފަހި މާހައުލެއް ތަނަވަސްކޮށްދިނުމަށް އެ ޔޫނިއަންއިން ދިވެހި ފުލުހުންނަށް ތަކުރާރުކޮަށް ގޮވާލާކަމަށް އެ ބަޔާނުގައި ވަނީ ބުނެފަ އެވެ.
އެމްޖޭއޭ އިން ބުނީ ފާހަގަ ވެފައިވާގޮތުގައި މުޒާހަރާ ކަވަރުކުރާ ނޫސްވެރިން އަމަލުކުރާނޭ، އެންމެންނަށް އެއްބަސްވެވޭނޭ ގައިޑްލައިނެއް އެކުލަވާލާ އަމަލުކުރުމުގެ މުހިންމުކަން ބޮޑުވެފައިވާ ކަމަށެވެ.
އޭގެ އިތުރުން މުޒާހަރާ ކަވަރުކުރާ ނޫސްވެރިންނަށް ހުރަސް އެޅުމާއި، މުޒާހަރާތައް ރޫޅާލުމުގައި ނޫސްވެރިންނަށް އަނިޔާވާގޮތަށް އަމަލުކުރާކަމަށް ތުހުމަތު ކުރެވޭ މައްސަލަތައް ފުލުހުންގެ ފަރާތުން ނޭޝަނަލް އިންޓަގްރިޓީ ކޮމިޝަނަށް ހުށަހަޅައިގެން އެފަދަ މައްސަލަތައް އަވަސް ގޮތެއްގައި ބަލައި މިފަދަ ކަންކަމުގެ ހަގީގަތް ހާމަކޮށް ފިޔަވަޅު އަޅަންޖެހޭ ފަރާތަތަކާ މެދު ފިޔަވަޅު އެމަށްވެސް އެމްޖޭއޭއިން ވަނީ ގޮވާލާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
