ހަތަރު ރަށެއްގައި ހޮސްޕިޓަލު އަޅަން ޗައިނާގެ ކުންފުންޏަކާ ހަވާލުކޮށްފި
ރާއްޖޭގައި ހަތަރު ހޮސްޕިޓަލެއް އިމާރާތް ކުރުމަށް ޗައިނާގެ ކުންފުންޏަކާ ހަވާލުކޮށްފިއެވެ.
ފޮރިން މިނިސްޓްރީގައި މިއަދު ބޭއްވި ހާއްސަ ރަސްމިއްޔާތެއްގައި އެކަމާ ގުޅޭ އެއްބަސްވުމުގައި ވަނީ ސޮއިކޮށްފަ އެވެ.
އެ އެއްވަަސްވުމުގައި ސިޑްކާއާގެ ފަރާތުން ސޮއި ކުރެއްވީ ވައިސް ޗެއާމަން ދިން ބޯ ޖިން އެވެ. އަދި ރާއްޖޭގެ ފަރާތުން ސޮއި ކުރެއްވީ ހެލްތުގެ ސްޓޭޓް މިނިސްޓަރު އަހުމަދު އާދިލް އެވެ.
ޗައިނާ ސަރުކާރުގެ އެހީގައި މި ހޮސްޕިޓަލުތައް އިމާރާތްކުރަނީ ހއ. ދިއްދޫ، ދ. ކުޑަހުވަދޫ، ރ. އަލިފުށީގެ އިތުރުން ގއ. ވިލިނގިލީގައެވެ.
މިއަދުގެ ރަސްމިއްޔާތުގައި ވާހަކަ ދައްކަވަމުން ޝާހިދު ވަނީ އެ ހޮސްޕިޓަލުތަކުގެ މަސައްކަތް ލަސްތަކެއް ނުވެ ފެށޭނެކަމަށް ވިދާޅުވެފައެވެ. އަދި ޗައިނާއާއެކު ކުރަމުންދާ މަސައްކަތްތަކުގައި ދެ ފަރާތުގެ ގުޅުން އެއް ދުވަހުން އަނެއް ދުވަހަށް ބަދަހިވެގެން ދާނެ ކަމަށް އުއްމީދު ކުރައްވާ ކަމަށްވެސް ވިދާޅުވި އެވެ.
ޝާހިދުގެ ވާހަކަފުޅުގައި ވަނީ ޗައިނާއިން ރާއްޖޭގެ އުމްރާނީ ތަރައްގީއަށް ވަމުންދާ އެހީތެރިކަމަށް ޝުކުރު އަދާކުރައްވައިފަ އެވެ. އަދި ޗައިނާއަކީ ރާއްޖޭގެ ފަތުރުވެރިކަމުގެ މާކެޓުގައި ވެސް މުހިންމު މަންޒިލެއްކަން އެމަނިކުފާނު ފާހަގަ ކުރެއްވި އެވެ.
ޗައިނާ އާއެކު މިއަދު ވަނީ އިތުރު އެއްބަސްވުންތަކެއްގައި ވެސް ސޮއިކޮށްފައެވެ.
އެގޮތުން ޗައިނާ ސަރުކާރުގެ އެހީގައި ހަދާފައިވާ ދާރުލް އާސާރު މަރާމާތު ކުރުމާއި، ގައުމީ ކުތުބުހާނާ މަރާމާތު ކުރުމާއި 2026 އިން 2027 އަށް ޗައިނާ އާއި ރާއްޖޭގެ ތަރައްގީގެ ގުޅުން ބަދަހި ކުރުމަށް މަސައްކަތްކުރާނެ ގޮތުގެ އެއްބަސްވުމެއް ވަނީ ވެފައެވެ
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
