ކައިޒީންއަށް ޕާސަނަލް ސެކިއުރިޓީ ނުދޭކަމަށް ބުނެ ފުލުހުން ހެދީ ދޮގު!
މާޗުމަހުގެ 29 ވަނަ ދުވަހުގެ ރޭ ދިވެހި މޮޑެލް ފާތިމަތު ޒަޔާން (ކައިޒީން) އަށް ޕާސަނަލް ސެކިއުރިޓީ ނުދޭކަމަށް ބުނެ ދިވެހި ފުލުހުންގެ ޚިދުމަތުން ދޮގު ހަދައިފި އެވެ.
ކައިޒީންގެ އުފަންދުވަސް ފާހަގަކުރުމަށް އުސް ފަސްގަނޑުގައި ކޭކު ފަޅާ ހަވާއެރުމުގެ ހަރަކާތްތައް ކުރިއަށް ދިޔަ ވަގުތާއި، އެ ފަހުންވެސް ފުލުހުންގެ ޕާސަނަލް ޕްރޮޓެކްޝަން އޮފިސަރުންގެ ޓީމެއް ވަނީ ކައިޒީންގެ ގާތުގައި ހަރަކާތްތެރި ވެފައެވެ.
އެގޮތުން އޭނާ އެ ސަހަރައްދަށް ދިޔަ ވަގުތު ވަށައިގެން ސެކިއުރިޓީން ތިބި މަންޒަރާއި، ކައިޒީންގެ ކާރުގެ ދޮރު ހުޅުވާދިނުމަށް ވެސް ސެކިއުރިޓީ އޮފިސަރުން ތިބި މަންޒަރު ފެނިގެންދާ ފޮޓޯތަކާއި ވީޑިއޯތައް ވަނީ އާންމުވެފައެވެ.
ކައިޒީންއަށް ސެކިއުރިޓީ ދޭން ތިބީ ފުލުހުންކަން ކަށަވަރުކުރެވުމުން "ވޮއިސް" އިން ވާނީ ކައިޒީންއަށް ދިވެހި ފުލުހުން ސެކިއުރިޓީ ދިނީ ކޮން އުސޫލަކުންތޯ އަހާ ސުވާލުކޮށްފަ އެވެ. އެއީ ވިޔަފާރި އުސޫލުން ކުރި ކަމެއް ތޯއާއި ފުލުހުން ޕާސަނަލް ސެކިއުރިޓީ ދިނުމުގައި އަމަލުކުރާ އުސޫލަށް ބަދަލެއް އައިސްފައި ވޭތޯ ވެސް ވޮއިސްއިން ވާނީ އަހާފަ އެވެ.
އެ ސުވާލާއި ގުޅިގެން ފުލުހުން ވަނީ ދޮގު ހަދާފަ އެވެ. އެގޮތުން އެރޭ ފުލުހުން ހަރަކާތްތެރިވީ ހަވާއެރުވި މަންޒަރު ބެލުމަށް ގިނަ ބަޔަކު އެއްވުމުން އާންމު އުސޫލުން އާންމުންގެ ސަލާމަތާއި ރައްކާތެރިކަން ކަށަވަރުކުރުމަށް ކަމަށް ފުލުހުން ވަނީ ބުނެފަ އެވެ.
"މާޗު 29 ވަނަ ދުވަހުގެ ރޭ އުސް ފސްގަނޑުގައި ހަވާއެރުވި އިރު ފުލުހުން ހަރަކާތްތެރިވެފއިވޭ. ފުލުހުން އެ ސަރަހައްދުގައި ހަރަކާތްތެރިވެފައި ވަނީ ހަވާއެރުވި މަންޒަރު ބެލުމަށް ގިނަ ބަޔަކު އެ ސަރަހައްދަށް ޖަމާވެފައިވާތީ އާންމު އުސޫލުން ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް. އެ އިވެންޓާއި ގުޅިގެން ޕާސަނަލް ސެކިއުރިޓީ އެއްވެސް ފަރާތަކަށް ފޯރުކޮށްދީފައި ނުވާނެ"
ދިވެހި ފުލުހުންގެ ޚިދުމަތް
ފުލުހުން މިފަދައިން ބުނި ނަމަވެސް އެއީ ކަނޑައެޅިގެން ދޮގެކެވެ. ކައިޒީންއަށް ޕާސަނަލް ސެކިއުރިޓީ ފުލުހުން ވަނީ ފޯރުކޮށްދީފަ އެވެ.
ކައިޒީންއަށް ސެކިއުރިޓީ ފޯރުކޮށްދިން އޮފިސަރުންނަކީ ފުލުހުންގެ ތެރޭގައި، ޕާސަނަލް ސެކިއުރިޓީ ދިނުމަށް ހަދާފައި އޮންނަ ހާއްސަ ޔުނިޓުގައި މަސައްކަތްކުރާ ބަޔެކެވެ. އަދި އެ ޔުނިޓުގައި އުޅޭ ފަރާތްތައް ފުލުހުންގެ އެއްވެސް ޑިއުޓީއެއް ނުވަތަ އާންމު ތަންތަނުގައި ސެކިއުރިޓީ ކުރުން ފަދަ ކަންކަމެއް ނުކުރާނެއެވެ.
އޭގެ އިތުރުން އާންމު ތަންތަނުގެ ސެކިއުރިޓީ ބަލަހައްޓާ ނަމަ ފުލުހުން އެކަން ކުރާނީ ޔުނިފޯމުގައެވެ.
ކުލަ ހެދުމުގައި ސެކިއުރިޓީ ދިން ސަބަބާއި ގުޅޭގޮތުން ތަކުރާރުކޮށް ސުވާލު ކުރުމުން ވެސް ފުލުހުން އެއްވެސް ޖަވާބެއް ދީފައެއް ނުވެއެވެ. އަދި އޭގެ ތަފްސީލު ހޯދުމަށް ފުލުހުންގެ މީޑިއާއަށް ތަކުރާރުކޮށް ގުޅުމުން ވެސް ޖަވާބުދީފައި ނުވާއިރު ފޯނުލައިން ބިޒީކޮށް ޖަވާބުދިނުމަށް ފުލުހުން ވަނީ ދެކޮޅު ހަދާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
