"ލީޑަރުން" ކަންކުރާ ގޮތަކީ އެއްވުންތަކުގައި ރައްޔިތުން ލައްވާ ގޯސް ހަދާފަ ފިލުން: އިމްރާން
ސިޔާސީ ބައެއް "ލީޑަރުން" ކަންކުރާ ގޮތަކީ އެއްވުންތަކުގައި ރައްޔިތުން ލައްވާ ގޯސް ހަދާފަ ފިލުން ކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
އިމްރާން މިހެން ވިދާޅުވީ މިއަދު ކުރެއްވި ޓްވީޓެއްގައެވެ.
ބެލެވޭ ގޮތުގައި އިމްރާން މިހެން ވިދާޅުވެފައިވަނީ ކަނޑު ވިއްކުމާއި ދެކޮޅު އިއްތިހާދުން އިންތިޒާމް ކޮށްގެން މިރޭ ބޭއްވާ ބޮޑު ޖަލްސާއާއި ގުޅިގެންނެވެ.
އެގޮތުން އިމްރާން ވިދާޅުވެފައިވަނީ ސިޔާސި ބައެއް "ލީޑަރުން" ކަންކުރާ ގޮތަކީ އެއްވުން ތަކަށް ގޮސް ހަމަ ނުޖެހުން ހިންގާ އަދި ރައްޔިތުން ލައްވާ ގޯސް ހެދުމަށްފަހު މައިދާނުން ފިލައިގެން ދިޔުން ކަމަށެވެ.
އަދި މިކަމުގެ ކުށްވެރި އަދަބު ލިބެނީ ނިކަމެތި ރައްޔިތުންނަށް ކަމަށް އިމްރާން ވިދާޅުވިއެވެ.
މީގެ އިތުރުން މި ލީޑަރުން ތިބެނީ ފިލާ ކަމަށް ވުމުން ކޮންމެ ސިޔާސީ ފިކުރަކަށް ނިސްބަތްވާ ރައްޔިތަކު ވިޔަސް މި ގޮތަށް ކަންތައް ވިޔަ ނުދެއްވުމަށް އިމްރާން ވަނީ އިލްތިމާސް ކުރައްވާފައެވެ.
ރާއްޖޭގެ ދެކުނުގެ ކަނޑުގެ ސަރަހައްދުން ބޮޑުބައެއް ގެއްލިގެން ދިއުމާއި ދެކޮޅަށް ގިނަ ސިޔާސީ ޕާޓީތަކެއް ގުޅިގެން އުފައްދާފައިވާ އިއްތިހާދުން މިރޭ މާލޭގެ ކާނިވާ ސަރަހައްދުގައި "ބާނަ ބާނަތިއްބާ ތިޔަ ވިއްކާލީ ކަނޑު" ޖަލްސާ ބޭއްވުމަށް ވަނީ އިއުލާނުކޮށްފައެވެ.
އެ އިއްތިހާދުގައި ޕީޕީއެމް-ޕީއެންސީ ކޯލިޝަންގެ އިތުރުން، ދި ޑިމޮކްރެޓްސް (ކުރީގެ ފިކުރެއްގެ ދިރުން) އާއި މޯލްޑިވްސް ނެޝަނަލް ޕާޓީ އަދި ޖުމްހޫރީ ޕާޓީ ހިމެނެއެވެ. އެ ކޯލިޝަނުގައި އުމަރު ނަސީރާއި، ކުރީގެ ބަންޑާރަ ނައިބުންވެސް އިސްކޮށް ހަރަކާތްތެރިވެ އެވެ.
އެހެންނަމަވެސް ޖުމްހޫރީ ޕާޓީގެ ކައުންސިލް މެމްބަރުންނާއި އާންމު މެމްބަރުން ބައިވެރި ނުވުމަށް ޕާޓީގެ ލީޑަރު އަދި ރިޔާސީ ކެންޑީޑޭޓު ޤާސިމް އިބްރާހިމް ވަނީ އެދިވަޑައިގެންފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
