ހިލޭ ގޯތި ބަހާތީ މާލޭގެ ފްލެޓްތަކަށްވެސް ކުލި ދެއްކުން ހުއްޓާލަން މަޝްވަރާކޮށްފި!

މާލޭ ސަރަހައްދުން ހިލޭ ގޯތި ބަހަން ސަރުކާރުން ނިންމާފައިވާތީ ހުރިހާ ސޯޝަލް ހައުސިންތަކެއްގެ ކުލި ދެއްކުން ހުއްޓާލަން ދަ ކޮމަނާސް (ކޮތަރުކޮށި) ޖަމިއްޔާ އިން ފަށާފައިވާ މަޝްވަރާ ބައްދަލުވުންތަކުގެ ދެވަނަ ބައްދަލުވުން ބާއްވައިފިއެވެ.

މާލޭގެ ގާކޮށި ފްލެޓާއި އަރަބިއްޔާ ފްލެޓް އަދި ސިނަމާލެ ފްލެޓްތަކުގައި ދިރިއުޅޭ ބައެއް ޒުވާނުންނާއިއެކު ރޭ ބޭއްވުނު އެ ބައްދަލުވުމުގައި ކުލި ދެއްކުން ހުއްޓާލަންޖެހޭ ކަމަށް އެ ޒުވާނުން ދެކޭ ސަބަބު ތައް ވަނީ ހިއްސާ ކޮށްފައެވެ.

އެގޮތުން، މާލެ ސަރަހައްދުން ހިލޭ ބިން ލިބޭއިރު އަނެއްބައެއްގެ އާމްދަނީގެ ބޮޑު ބައެއް ކުއްޔަށް ހޭދަކުރަން ޖެހޭކަން ޒުވާނުން ވަނީ ފާހަގަކޮށްފަ އެވެ.

"އަޅުގަނޑުމެންގެ މައިންބަފައިން ކުރި ހުރިހާ މަސައްކަތަކުން ވެސް ލިބުނު ހުރިހާ އާމްދަނީއެއް ދިޔައީ ކުއްޔަށް. ދެން މިއަދު އަޅުގަނޑުމެން ވެސް އެއްހާލެއްގައި މިޖެހެނީ. އަދި މިހާރު ސަރުކާރުން މިނިންމި ނިންމުމެއްގެ ސަބަބުން މާދަމާ އަޅުގަނޑުމެންގެ ދަރިން ވެސް ތިބެން ޖެހޭނީ ހަމަ ކުލީގެ އަޅުވެތިކަމުގައި." ރޭގެ ބައްދަލުވުމުގައި ބައިވެރިވި ޒުވާނަކު ބުންޏެވެ.

މާލޭ މީހުންނަށް ހިލޭ ގޯތި ބަހަން ސަރުކާރުން ނިންމުމުން ހުރިހާ ސޯޝަލް ހައުސިންއެއްގެ ކުލި ދެއްކުން ހުއްޓާލުމާއި ގުޅޭ ގޮތުން ހިޔާ ފްލެޓުގެ އެޗް-4 ގެ މީހުންނާއެކުވެސް ހުކުރު ދުވަހު މަޝްވަރާ ބައްދަލުވުމެއް ބާއްވާފައިވެއެވެ.

ދަ ކޮމަނާސް އިން ބުނީ ކުލި ދެއްކުން ހުއްޓާލުމާއި ގުޅޭ ގޮތުން ސިލްސިލާކޮށް މަޝްވަރާ ބައްދަލުވުންތައް ކުރިއަށް ގެންދާނެ ކަމަށެވެ. މިބައްދަލުވުންތައް މާލެ ސަރަހައްދުގެ އިތުރުން ފްލެޓާއި، ރޯ ހައުސް އަޅާފައިވާ ރަށްރަށުގައި ވެސް ކުރިއަށް ގެންދާނެ ކަމަށް އެޖަމިއްޔާ އިން ބުނެއެވެ.

ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލޭގެ ރަށްވެހީންނަށް ގޯތި ދިނުމަށް ހިންގާ "ބިންވެރިޔާ" ސްކީމްގެ ދަށުން ފުރަތަމަ ބުުރުގައި ދޫކުރާ 5،000 ގޯތި ލިބޭ މީހުންގެ ވަގުތީ ލިސްޓް މިހާރު އޮތީ ގެޒެޓްކޮށްފައެވެ.