އަދީބު ފުރުވަން މިހާތަނަށް ހުއްދަ ދީފައެއް ނެތް: ކަރެކްޝަންސް

ކުރީގެ ނާއިބު ރައީސް އަދި އެމްއެމްޕީއާރުސީ ޚިޔާނާތުގެ މުގުލުގައި ހުންނެވި އެކެއް ކަމުގައިވާ އަހުމަދު އަދީބު، މާދަމާ ރާއްޖެއިން ބޭރަށް ފުރަން އަދި މިހާތަނަށް ހުއްދަ ދީފައިނުވާ ކަމަށް މޯލްޑިވްސް ކަރެކްޝަނަލް ސަރވިސް އިން ބުނެފިއެވެ.

މިއަދު އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ކުރެއްވި ޓްވީޓެއްގައި ވަނީ އަދީބު މާދަމާ ރާއްޖޭން ބޭރަށް ފުރުވާލާ ކަމަށް ވިދާޅުވެ އެކަމާއި ކަންބޮޑުވުން ފާޅުކުރައްވާފައެވެ.

އަދި އެފަދައިން ކަން ކުރައްވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ކެމްޕޭނު ރަސްމީކޮށް ފެށުމުގެ ކުރިން އަދީބު ފުރުވާނުލައިފިނަމަ ކޮށްލާފާނޭ ފަޟީޙަތަކުން ރެކުމަށްޓަކައި ކަމަށްވެސް ބުނާ އަޑުއިވޭ ކަމަށް ވައްޑެ ވިދާޅުވި އެވެ.

މިކަމާއި ގުޅިގެން 'ވޮއިސް' އަށް ކަރެކްޝަންސްގެ މީޑިއާ އޮފިޝަލަކު މައުލޫމާތު ދެއްވަމުން ވިދާޅުވީ މި ވަގުތާއި ހަމައަށް އަދީބު ފުރުމަށް އަދި ހުއްދަ ދީފައި ނުވާ ކަމަށެވެ.

މިއާއިއެކު އެއްވެސް ހާލަތެއްގައި ރާއްޖެއިން ބޭރަށް ފުރަން ހުއްދަ ދޭކަހަލަ ހާލަތެއް މެދުވެރި ވެއްޖެނަމަ ކަރެކްޝަންސް އިން އެކަން އަންގާނެ ކަމަށްވެސް އޮފިޝަލް ވަނީ ފާހަގަކުރައްވާފައެވެ.

އަދީބު ރާއްޖެ އިން ބޭރަށް ފުރުވާލަނީ ރައީސް ޞާލިހު ފަޟީހަތް ކޮށްލަފާނެތީ ކަމަށް ވައްޑެ ވިދާޅުވެފައިވާއިރު، އެ ކަމަށް ބާރުދޭ ފަދަ ވާހަކަ ތަކެއް މީގެ ކުރިން، ކުރީގެ ޓުއަރިޒަމް މިނިސްޓަރު އަލީ ވަހީދުވެސް ވަނީ ދައްކަވާފައެވެ.

އެގޮތުން، އެމްއެމްޕީއާރްސީގެ ހިޔާނާތުގެ ފައިސާ އިން 35 މިލިއަން ރުފިޔާ އަދީބުގެ އަތުން ރައީސް ޞާލިހު ނެންގެވިކަމަށް އަލީ ވަހީދު ވަނީ ވިދާޅުވެފަ އެވެ. އެކަން ހިނގައިދިޔައިރު އަލީ ވަހީދު ހުންނެވީ އެމްޑީޕީގެ ޗެއާޕާސަންގެ މަގާމުގައެވެ.

މީގެ އިތުރުން އަދީބު ބޭރަށް ފުރުވާލަނީ އެމްއެމްޕީއާރުސީގެ ހިޔާނާތުން ލިބިފައި ހުރި ފައިސާގެ ތެރެއިން ފޮރުވާފައި ހުރި ފައިސާ ރައީސް ޞާލިހުގެ ކެންޕެއިނަށް ޚަރަދު ކުރުމަށް ކަމަށްވެސް އަޑުތައް ވަނީ ފެތުރިފައެވެ.