"އިންޑިއާ އައުޓު" ގޮވާ އެއްވެސް ޕާޓީއަކާއެކު މަސައްކަތް ކުރަން ދަތި: ދަ ޑިމޮކްރެޓްސް

ދޭދޭ ޤައުމުތަކާއެކު އޮންނަ ގުޅުމަށް ބުރޫއަރާނެފަދަ އެއްވެސް ކަމެއް ކަމަކީ ދަ ޑިމޮކްރެޓްސް ޕާޓީން ހިތއްވަރުދޭނެ ކަމެއް ނޫން ކަމަށާއި، އެގޮތުން "އިންޑިއާ އައުޓު" ގެ ނަމުގައި މިހާރު ކުރިއަށް ގެންދާ ކެމްޕޭނުގައި ހަރަކާތްތެރިވާ އެއްވެސް ސިޔާސީ ޕާޓީއަކާއެކު، މަސައްކަތް ކުރަން ދަތިވާނެކަމަށް ދި ޑިމޮކްރެޓްސްއިން ބުނެފި އެވެ.

އެ ޕާޓީން މިފަދައިން ބުނެފައިވަނީ މިއަދު ބޭއްވި ނޫސްވެރިންގެ ބައްދަލުވުމެއްގަ އެވެ.

ޕާޓީގެ ފަރާތުން މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވީ ދޭދޭ ގައުމުތަކާއި އެކު އޮންނަ ގުޅުމަށް ބުރޫ އަރާޒާތުގެ ކަމެއް ކުރުމަކީ، އަދި އެފަދަ ކަމަކަށް ހިތްވަރު ދިނުމަކީ ވެސް ދި ޑިމޮކްރެޓްސްގެ އުސޫލުތަކާއި ޚިލާފު ކަމެއް ކަމަށެވެ.

އިންޑިއާ ސިފައިން ރާއްޖޭގައި ތިބުމާއި ދެކޮޅަށް ހިންގާ "އިންޑިއާ އައުޓު" ކެމްޕޭނަކީ އެފަދަ (ދޭދޭ ގައުމުތަކާއި އެކު އޮންނަ ގުޅުމަށް ބުރޫއަރާ ފަދަ) ކެމްޕޭނެއް ކަމަށާއި، އެ ހަރަކާތްތައް ހިންގާ ނުވަތަ އެ ހަރަކާތުގައި ބައިވެރިވާ ފަރާތަކާއެކު މަސައްކަތް ކުރުމަކީ ދަ ޑިމޮކްރެޓްސް އަށް ވަރަށް ދަތި ކަމަކަށް ވާނެކަމަށް ހަސަން ލަތީފު ވިދާޅުވި އެވެ.

"މިވަގުތު މި ހިނގަމުންދާ ހަރަކާތެއްގެ ގޮތުގައި އަޅުގަނޑުމެންނަށް ފެނޭ "އިންޑިއާ އައުޓު" ގެ ނަމުގައި ހަރަކާތެއް ހިންގާތަން. އެހެން ނަމަވެސް އެއީ ޑިމޮކްރެޓްސް އިން އެއްބަސްވާނެ ކަމެއް ނޫން. އަދި ޑިމޮކްރެޓްސް އަށް ދަތިވާނެ އެފަދަ ޕާޓީއަކާއި އެކީގައި.. މިދެންނެވީ އިންޑިއާ އައުޓު ސްލޯގަން ބޭނުންކޮށްގެން ހަރަކާތްތެރިވާ އެއްވެސް ސިޔާސީ ޕާޓީއަކާއި އެކީ މަސައްކަތް ކުރަން ޑިމޮކްރެޓްސްއަށް ދަތިވާނެ"

ހަސަން ލަތީފު

މި ސަރުކާރު ބަދަލުކުރުމަށްޓަކައި ދަ ޑިމޮކްރެޓްސްއިން ދަނީ ޕީޕީއެމް-ޕީއެންސީ ކޯލިޝަނާއެކު މަޝްވަރާ ބައްދަލުވުންތަކެއް ބާއްވަމުންނެވެ.

ޕީޕީއެމް-ޕީއެންސީ ކޯލިޝަނުން ވަނީ އިންޑިއާ ސިފައިން ޤަވައިދާއި ޚިލާފަށް ރާއްޖޭގެ ކަންކޮޅުތަކުގައި ތިބުމާއި ދެކޮޅަށް ކުރިއަށް ގެންދާ "އިންޑިއާ އައުޓު" ހަރަކާތް ހުއްޓާނުލާނެކަމަށް ބުނަމުންނެވެ. އަދި ޕީޕީއެމްގެ ވެރިކަމެއްގައި ރާއްޖޭގައި ތިބި އިންޑިއާ ސިފައިން އަނބުރާ ފޮނުވާލާނެކަމަށް ބުނަމުންނެވެ.

"އިންޑިއާ އައުޓު" މައްސަލައިގައި ދެ ޕާޓީގެ ޚިޔާލު ތަފާތު ނަމަވެސް، މިހާރު ދެ ޕާޓީން ފަށާފައިވާ މަޝްވަރާގެ ތެރެއިން އެކަމަށް ޙައްލެއް ލިބިގެންދާނެކަމަށް ޤަބޫލުކުރައްވާ ކަމަށް ހަސަން ލަތީފު ވިދާޅުވި އެވެ.

އަދި މިހާތަނަށް އެއްބަސްވެފައިވާ ކަންކަމުގެ ތެރޭގައި "އިންޑިއާ އައުޓު" ހަރަކާތް ނުހިމެނޭކަން ވެސް ހަސަން ލަތީފު ފާހަގަކުރެއްވި އެވެ.