ރައީސް ޞާލިހު ބަލިކުރަން ކޮމަން ކެންޑިޑޭޓަކު ނެރެން ވެސް ތައްޔާރު: ދަ ޑިމޮކްރެޓްސް

ކުރިއަށް އޮތް ރިޔާސީ އިންތިޚާބުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ބަލިކުރުމަށް ގިނަ ސިޔާސީ ޕާޓީތަކެއް އެކުވެގެން "ކޮމަން ކެންޑިޑޭޓެއް" ނެރެން ވެސް ތައްޔާރަށް އޮތްކަމަށް ދަ ޑިމޮކްރެޓްސް އިން ބުނެފި އެވެ.

ދަ ޑިމޮކްރެޓްސްއިން ބާއްވާ އެ ޕާޓީގެ ފުރަތަމަ ޤައުމީ ޖަލްސާއާއި ގުޅޭގޮތުން މައުލޫމާތުދެއްވުމަށް ބޭއްވު ނޫސްވެރިންގެ ބައްދަލުވުމެއްގައި ވާހަކަދައްކަވަމުން މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވީ މި ވެރިކަން ބަދަލުކުރުމަށް ރައްޔިތުން އެދެމުންދާ ކަމަށެވެ.

ރާއްޖޭގެ ކަންކޮޅުތަކުގައި މި ވެރިކަން ބަދަލުކޮށްދިނުމަށް އެދި ރައްޔިތުން އެކި ސިޔާސީ ޕާޓީތަކުގެ އިސްވެރިންގެ ކިބައިން އެދެމުންދާކަމަށް ހަސަން ލަތީފު ވިދާޅުވި އެވެ. އަދި ވިދާޅުވީ "ރައީސް ޞާލިހު ނޫން ގޮތެއް" ރާއްޖޭގައި ޓްރެންޑުވަމުން އަންނަ ކަމަށެވެ.

ހަސަން ލަތީފު ވިދާޅުވީ ކުރިއަށް އޮތް ރިޔާސީ އިންތިޚާބުގައި ދަ ޑިމޮކްރެޓްސްއިން ކެންޑިޑޭޓެއް ނެރޭނެ ކަމަށެވެ.

އެހެން ނަމަވެސް ގިނަ ސިޔާސީ ޕާޓީތަކުން މި ވެރިކަން ބަދަލުކުރުމަށް މަސައްކަތް ކުރަމުން އަންނައިރު، އެންމެން ގުޅިގެން، އެންމެނަށް އެއްބަސްވެވޭ ކޮމަން ކެނޑިޑޭޓެއް ނެރުމަށް އެ ޕާޓީން އޮތީ ތައްޔާރަށްކަމަށް ހަސަން ލަތީފު ވިދާޅުވި އެވެ.

"އެހެން ޕާޓީތަކާއި އެކީގައި މަސައްކަތްކޮށްގެން ކޮމަން ކެންޑިޑޭޓެއް، އެއް ކެންޑިޑޭޓެއް އަޅުގަނޑުމެންނަށް ކުޑަކޮށްލެވިއްޖެ ނަމަ، ނުވަތަ މަދުކޮށްލެވިއްޖެ ނަމަ އެއީ ޕީޕީއެމް ރުހި ގަބޫލުވާ އަދި އަޅުގަނޑުމެން ވެސް ހަމަ ގަބޫލުވާ ކެންޑިޑޭޓެއް އަދި އަޅުގަނޑު ގަބޫލުކުރަނީ ޖުމްހޫރީ ޕާޓީން ވެސް އެއަށް ގަބޫލުވާނެ ކަމަށް، އަދި އެޔެއް އަޅުގަނޑުމެން އެބޭފުޅުންނާއި ސީދާ މަޝްވަރާ ކުރެވުނީއެއް ނޫން، އެހެން ނަމަވެސް އަޅުގަނޑުމެންނަށް ގަބޫލުކުރެވެނީ ރަނގަޅު ގޮތް ވިސްނިވަޑައިގަންނަވާނެ ކަމަށް. މި ދަންނަވާކަހަލަ ކެންޑިޑޭޓެއް އަޅުގަނޑުމެންނަށް ނެރެވިއްޖެއްޔާ އަޅުގަނޑުމެން މިތިބީ އެ ކެންޑިޑޭޓެއް ފަހަތަށް އަރާ ކޮމަން ކެންޑިޑޭޓަކާއި އެކީގައި މަސައްކަތްކުރުމަށް ތައްޔާރަށް"

ހަސަން ލަތީފު

ކުރިއަށް އޮތް ރިޔާސީ އިންތިޚާބުގައި ރައީސް ޞާލިހު ބަލިކުރުމަށް ކުރަން ޖެހުނު ކޮންމެ ކަމެއް ކުރާނެކަމުގެ ޔަގީންކަން ދޭކަމަށް ދަ ޑިމޮކްރެޓްސް އިން ވަނީ ބުނެފައެވެ.

ދަ ޑިމޮކްރެޓްސް އިން ވަނީ މި ސަރުކާރު ބަދަލުކުރުމަށްޓަކައި އިދިކޮޅު ޕީޕީއެމް-ޕީއެންސީއާއެކު މަޝްވަރާކުރަން ފަށާފައެވެ.