ވިލާ އެއަރ އަށް 11 އަހަރު ފުރުން ފާހަގަކޮށްފި

ޖުމްހޫރީ ޕާޓީގެ ލީޑަރު އަދި މަޝްހޫރު ވިޔަފާރިވެރިޔާ ގާސިމް އިބްރާހިމްގެ ވިލާ އެއަރ އަށް 11 އަހަރު ފުރުން ފާހަގަކޮށްފިއެވެ.

ވިލާ އެއަރ ގެ އަހަރީ ދުވަސް ފާހަގަކުރުމަށް ރޭ ވަނީ ކުލަގަދަ ރަސްމިއްޔާތެއް ވިލާ ކޮލިޖުގައި ބާއްވާފައެވެ. މި ރަސްމިއްޔާތުގައި ކުންފުންޏަށް ގިނަ ދުވަސްތަކެއްވަންދެން ޚިދުމަތް ކުރައްވާފައިވާ ފަރާތްތަކުގެ އަގުވަޒަންކޮށް ހަނދާނީ ލިޔުން ވަނީ ހަވާލުކޮށްފައެވެ.

އެގޮތުން ވިލާ ކުންފުންޏަށް 5 އަހަރާއި 10 އަހަރާއި ދޭތެރޭ ޚިދުމަތް ކުރައްވާފައިވާ ފަރާތްތަކާއި 10 އަހަރަށްވުރެ ގިނަ ދުވަސް ވަންދެން ޚިދުމަތް ކުރައްވާފައިވާ ފަރާތްތަކުގެ އަގު ވަޒަންކުރުމުގެ ގޮތުން ހަނދާނީ ލިޔުން ހަވާލުކޮށްފައިވެއެވެ.

ރާއްޖޭގައި އެންމެ ގިނަ ދުވަސްވީ ވައިގެ ދަތުރުފަތުރަށް ހާއްސަ ޕްރައިވެޓް ކުންފުނި ވިލާ އެއަރގެ ދަށުން "ފްލައި މީ"ގެ ނަމުގައި އެއާލައިނެއް އުފައްދާ ހިންގަން ފެށީ 2011 ވަނަ އަހަރުއެވެ. ވިލާ އެއަރގެ 11 އަހަރުވީ މާޒީގައި ރާއްޖޭގެ ދެ އެއާޕޯޓެއް ހިންގާފައިވެއެވެ. އެއީ މާމިގިލީ އިންޓަނޭޝަނަލް އެއާޕޯޓާއި ގދ. ކާޑެއްދޫ އެއާޕޯޓެވެ.

ކުރީގެ ރައީސް ޔާމީން އަބްދުލްގައްޔޫމުގެ ޒައާމަތުގައި ވިލާ ކުންފުނީގެ ދަށުން ހިންގަމުން ދިޔަ ކާޑެއްދޫ އެއަރޕޯޓު ވަނީ ސަރުކާރަށް ބަދަލުކޮށްފައެވެ. ސަބަބެއްކަމަށް ބުނެފައިވަނީ ސިވިލް އޭވިއޭޝަންގެ ގަވައިދުތަކާއި މިންގަނޑުތަކާއި ޚިލާފަށް އެއަރޕޯޓު ހިންގަމުން ދިއުމެވެ. އަދި މާމިގިލީ އެއަރޕޯޓުވެސް ޑޮމެސްޓިކް އެއަރޕޯޓަކަށް އޭރު ބަދަލުކުރެވިގެން ދިޔައެވެ.

އެކަންކަމާއި ގުޅިގެން ގާސިމް ވިދާޅުވީ، ކުރީ ސަރުކާރުން އެފަދައިން އަމަލުކޮށްފައިވަނީ ސިޔާސީ ގޮތުން ފިއްތުންތައް ކުރިމަތިކުރުވުމަށްކަމަށެވެ.

އެހެން ނަމަވެސް ރައީސް ޔާމީންގެ ވެރިކަން ބަދަލުވެ، ގާސިމް ހިއްސާވާ ސަރުކާރެއް އުފެދުމާއެކު ކާޑެއްދޫ އެއަރޕޯޓު އަލުން ވިލާގެ ދަށަށް ބަދަލުކުރެވި މާމިނގިލީ އެއަރޕޯޓަށް އިންޓަނޭޝަނަލް އެއަރޕޯޓެއްގެ ދަރަޖަ ވަނީ ދީފައެވެ.

ވިލާ އެއަރ އަކީ އޭވިއޭޝަން ދާއިރާގައި ފާހަގަކޮށްލެވޭ އަމިއްލަ ކުންފުންޏެކެވެ. އެ ކުންފުނިން ރައްޔިތުންގެ އިތުބާރާއި ޔަގީންކަން ހޯދައިދިނުމަށް ކުންފުނީގެ މުވައްޒަފުން ކުރަމުން އަންނަ ބުރަ މަސައްކަތުގެ އަގުވަޒަންކުރާކަމަށް ކުންފުނިން ބުނެއެވެ. އަދި އެކަމަށްޓަަކައި މުވައްޒަފުންނަށް ޝުކުރު އަދާކުރާކަމަށް ވަނީ ބުނެފައެވެ.