މާމިގިލީން ޖޭޕީގެ ބާރު ކެނޑި، ހަ ގޮނޑި ގެއްލިއްޖެ

އިއްޔެ ކުރިއަށްދިޔަ ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބުގައި، ޖުމްހޫރީ ޕާޓީގެ ބޮޑު ތާއީދެއް އޮންނަ އދ. މާމިގިލީން އެ ޕާޓީއަށް ބޮޑު ނާކާމިޔާބީއަކާއި ކުރިމަތިވެއްޖެ އެވެ.

ޖުމްހޫރީ ޕާޓީގެ ލީޑަރު ގާސިމް އިބްރާހިމް ނިސްބަތްވެވަޑައިގަންނަވާ އަދި އެމަނިކުފާނުގެ ވިލާ ކުންފުނީގެ ވަރަށް ބޮޑެތި އިންވެސްޓްމަންޓްތަކެއް އޮތް މާމިގިލީގައި އަބަދުވެސް އޮންނަނީ ޖުމްހޫރީ ޕާޓީގެ މެޖޯރިޓީ އެވެ. ނަމަވެސް އިއްޔެ އޮތް ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބުގައި، އެ ޕާޓީއަށް ވަނީ ބޮޑު ނާކާމިޔާބީއަކާ ކުރިމަތިލާން ޖެހިފަ އެވެ.

ނާކާމިޔާބީއާ ކުރިމަތިލާން ޖެހުނު ނަމަވެސް ކުޑަ ތަފާތަކުން ކައުންސިލްގެ ރައީސްގެ މަގާމު ޖުމްހޫރީ ޕާޓީން ވަނީ ދިފާއުކޮށްފަ އެވެ. އަދި ކައުންްސިލްގެ އެއް ގޮނޑި ދިފާއުކުރި އެވެ. މި ފަހަރު ވެސް ކައުންސިލްގެ ރައީސަކީ އިމާދު ފާރޫގެވެ. އިމާދު ވަނީ 459 ވޯޓް ހޯދާފަ އެވެ. ފާރޫގާ އެންމެ ގާތުން ވާދަކުރި ޕީއެންސީގެ ކެންޑިޑޭޓް އަހްމަދު ނިޝާން ވަނީ 432 ވޯޓް ހޯދާފަ އެވެ.

ޖޭޕީއަށް ދެން ލިބުނީ ކައުންސިލްގެ ގޮނޑިއެކެވެ. އެ ގޮނޑި ކާމިޔާބުކުރީ ޖޭޕީގެ ކެންޑިޑޭޓް މުހައްމަދު ޝަހްރަމް އެވެ. އޭނާ ވަނީ 406 ވޯޓް ހޯދާފަ އެވެ. ޕީއެންސީގެ ކެންޑިޑޭޓް އަލީ ނިހާލް ވަނީ 554 ވޯޓް ހޯދާފަ އެވެ. އަންހެނުންނަށް ހާއްސަ ދެ ގޮނޑީގެ ތެރެއިން އެއް ގޮނޑި ލިބުނީ ޕީއެންސީއަށެވެ. އަނެއް ގޮނޑި އެމްޑީޕީއަށެވެ.

ޕީއެންސީގެ ކެންޑިޑޭޓް އަޒްލީނާ އިބްރާހިމް ވަނީ 558 ވޯޓް ހޯދާފަ އެވެ. އެމްޑީޕީގެ ކެންޑިޑޭޓް ހައިފާ އާދަމް ވަނީ 555 ވޯޓް ހޯދާފަ އެވެ.

މި ފަހަރުގެ އިންތިހާބަށް ޖުމްހޫރީ ޕާޓީން ކެންޑިޑޭޓުން ނެރުނީވެސް ހަމައެކަނި މާމިގިއްޔަށެވެ.