ސައީދުގެ ސުވާލެއް: ތައުލީމީ ޒުވާން ޖީލަށް ހޯދާދޭންވީ ރިއެކްޓު ނުކުރާ ރައީސް އެއް ތޯ؟

ކުރިއަށް އޮތް ރިޔާސީ އިންތިޚާބުގައި ގައުމުގެ ޒުވާން އާބާދީއަށް ހޯދައިދޭންވީ "ރިއެކްޓު" ނުކުރައްވާ ރައީސްއެއްތޯ އައްސަވާ މަޖިލީހުގެ މާވަށު ދާއިރާގެ މެމްބަރު އަދި ޕީއެންސީގެ ނައިބުރައީސް މުހައްމަދު ސައީދު ސުވާލުކުރައްވައިފިއެވެ.

ސައީދު މިފަދައިން ސުވާލުކުރައްވާފައިވަނީ ވެރިކަމުގައި ހުންނެވި އިބްރާހިމް މުހައްމަދު ސޯލިހުއަށް ވަރަށް ބޮޑަށް ފާޑުވިދާޅުވެ ޕީޕީއެމް ޖަގަހަ ޖަލްސާގައި ދެއްކެވި ވާހަކަފުޅެއްގައެވެ.

ސައީދު ވިދާޅުވީ ރާއްޖޭގެ އާބާދީގެ ބޮޑުބައެއް މިއަދު ހިއްސާކުރަނީ ޒުވާނުންކަމަށެވެ. އަދި ކުރިއަށް އޮތް ރިޔާސީ އިންތިޚާބުގައި 47000 ޒުވާނުން އަލަށް ވޯޓުލާން ނުކުންނާނެކަމަށެވެ.

ކަން އެހެން އޮތް އިރު މިހާ ބޮޑު ޒުވާން އާބާދީއަކަށް ކަންކަމުގައި ރިއެކްޓު ނުކުރައްވާ، އަދި ވެރިކަން ކުރައްވަންވީ ގޮތް ރަނގަޅަށް އެނގިވަޑައި ނުގަންނަވާ މީހަރު ރައީސް ކަމަށް ހޮވުމަކީ ޒުވާނުންނަށް އެންމެ ރަނގަޅު ގޮތަށް ވާނެތޯ ސައީދު ވަނީ އައްސަވާފައެވެ.

"ބައްލަވާ މިހާ ތައުލީމީ ޖީލުތަކެއް، މިހާ ބޮޑު ޒުވާނުންގެ ބޮޑު ބައެއް ދިވެހިރާއްޖެއަށް އިތުރުވެގެން މި އަންނަނީ، މިވެސް ގައުމެކޭ ކިތަންމެ ކުޑަ ނަމަވެސް. މި މީހުން މި ގައުމަށް އައިސް ދެކެންވީތޯ ހަމަ ރިއެކްޓު ނުކުރާ ފައިސާ ޗާޕުކޮށްކޮށް ބޭނުން ޚަރަދެއްކޮށްފަ އެއްވެސް ކަހަލަ އިންތިޒާމެއް ގޮތެއް ފޮތެއް ނެތް އުސޫލެއް ރައީސް އޮފީސްތެރޭ ގާއިމު ނުކުރާ ވެރިއަކު އައިސް ވެރިކަން ކޮށްލަން ޖާގަ ދޭން ވީ ތޯ"

ޕީއެންސީގެ ނައިބުރައީސް މުހައްމަދު ސައީދު

ޒުވާން ޖީލަށް ވެރިއަކު އައްޔަންކުރާއިރު، ހޮއްވަވާނީ ގައުމު ހިންގަން ނޭނގޭ ވެރިއެއްތޯ ނުވަތަ ތަސައްވަރެއް އޮވެރެން ޒުވާނުންނަށް ކަންތައްތަކެއް ކޮށްދެއްވާނެ ދުރުވިސްނިވަޑައިގަންނަވާނެ ލީޑަރެއްތޯ ނިންމަވާނީ ޒުވާނުންނާއި އެ ޒުވާނުންގެ ބެލެނިވެރިންކަމަށެވެ. އެހެން ނޫންކަމަށްވާނަމަ ޒުވާނުންގެ އުމުރުން އަދި ގައުމުގެ އުމުރުންވެސް އިތުރު ފަސް އަހަރު ގެއްލިގެން ދާނެކަމަށް ސައީދު ވިދާޅުވިއެވެ.

"ލިބޭނެ އާމްދަނީއެއް، ލިބޭނެ ފުރުސަތުތަކާއި ގައުމަކަށް ހޯދޭނެ ފުރުސަތުތަކާއި، އަޅުގަނޑުމެންގެ ކުރިމަގު މާކުރިއަށް ބަލައިގެން ޗާޓު ކުރަހާ ޑިޒައިންކޮށް ގޮތް ރާވާ، ދިވެހިންގެ މުސްތަގުބަލުގެ ފޮޓޯ މާ ކުރިއަށް ވިސްނައިގެން ހޯދާނެ ވަރުގަދަ ސިކުނޑިއެއް ނޫންތޯ އަޅުގަނޑުމެން ގައުމަށް، މި 47000 ޒުވާނުންނަށްޓަކައި މަޔަކު ބަފަޔަކު ވިސްނުމުން ނެރެދެން ޖެހޭނީ"

ޕީއެންސީގެ ނައިބުރައީސް މުހައްމަދު ސައީދު

ސައީދު ވިދާޅުވީ ރައްޔިތުންގެ އަތަށް އަރާ ވޯޓު ކަރުދާސްކޮޅަކީ ވަރަށް ބޮޑު އަމާތާނެއްކަމަށެވެ. އެއީ ރައްޔިތުންނާއި ގައުމުގެ މުސްތަގުބަލާއި ގުޅިފައިވާ އަމާނާތެއްކަމަށްވާއިރު، ގައުމާއި ރައްޔިތުންނަށް އެންމެ ފައިދާހުރި ގޮތަށް އެ ނިންމުން ނިންމުމަށް ސައީދު ވަނީ އިލްތިމާސްކުރައްވާފައެވެ.

އެގޮތުން ޒުވާނުންނަށް ރަނގަޅު މުސްތަގުބަލެއް ހޯދައިދީ ޒުވާނުންގެ ވިންދާއި އެއްގޮތަށް ވެރިކަން ކުރެއްވޭނެ ލީޑަރެއްކަމަށް ސައީދުއަށް ފެނިވަޑައިގަންނަވާ ހަމައެކަނި ލީޑަރަކީ ރައީސް ޔާމީން އަބްދުލްގައްޔޫމުކަމަށް ސައީދު ވިދާޅުވިއެވެ.

ކުރިއަށް އޮތް ރިޔާސީ އިންތިޚާބަށް ޕީޕީއެމުން ނެރޭ މެނިފެސްޓޯއަކީ ޒުވާނުންނަށް ޚާއްސަ އަހަންމިއްޔަތެއް ދީގެން ނެރޭ، ޒުވާނުން އިސްކޮށްފައިވާ މެނިފެސްޓޯއެއްކަމަށް ރައީސް ޔާމީންވެސް ވަނީ އިއުލާނު ކުރައްވާފައެވެ.