ސަރުކާރުގެ ސްޓޭންޑް ކުއްލި ކުއްލިއަށް ބަދަލު ކުރީމާ ވާން އުޅޭ ގޮތެއް ނޭނގޭ: އިންތި
ކަންކަމުގައި ސަރުކާރުގެ ސްޓޭންޑް ކުއްލި ކުއްލިއަށް ބަދަލުކުރަމުންދާތީ ރައްޔިތުންގެ މަޖިލީހުގެ މާފަންނު އުތުރު ދައިރާގެ މެންބަރު އިމްތިޔާޒް ފަހުމީ (އިންތި) ނުރުހުން ފާޅުކުރައްވައިފިއެވެ.
ހެއްކާއި ބެހޭ ގާނޫނަށް ސަރުކާރުން ހުށައަޅާފައިވާ އިސްލާހަށް ވާހަކަދއްކަވަން ފައްޓަވަމުން އިންތި ވިދާޅުވީ މިފަހަކަށް އައިސް މުޅިން އަޑުއިވެނީ ސަރުކާރުން ކުއްލި ކުއްލިއަށް ސްޓޭންޑް ބަދަލުކުރާ ވާހަކަކަމަށެވެ.
ޗާގޯސް މައްސަލައިގައިވެސް ސަރުކާރުން ކުއްލި ގޮތަކަށް ސްޓޭންޑް ބަދަލުކޮށްފައިވާއިރު މަސްދަރު ހާމަކުރުމާއި ގުޅިގެންވެސް ސަރުކާރުން މީގެ ކުރިން ގެންގުޅުނު ވިސްނުން މިހާރު ބަދަލުކޮށްފައިވާކަން މަޖިލީހަށް ހުށައެޅި ހެއްކާއި ބެހޭ ބިލުން ހާމަވެގެންދާކަމަށް އޭނާ ވިދާޅުވިއެވެ.
އިންތި ވިދާޅުވީ ހެއްކާއި ބެހޭ ގާނޫނަށް ސަރުކާރުން ހުށައަޅާފައިވާ އިސްލާހަކީ އެފަދަ ގާނޫނެއް އެކުލަވާލުމުގެ މަގްސަދާއިވެސް މުޅިން ޚިލާފުވާ އިސްލާހެއްކަމަށެވެ.
ސަރުކާރުން ހެއްކާއިބެހޭ ބިލު އެންމެ ފުރަތަމަ މަޖިލީހަށް ހުށައަޅައި ތަސްދީގުކުރުމަށްފަހު އަނެއްކާ އެބިލުގައިވާ މަސްދަރު ހާމަކުރުމާއި ގުޅޭ ބައި 21 ޖުލައިގައި ރައީސް އޮފީހުން ނޫސްބަޔާނެއް ނެރެފައިވާ ކަމަށް އިމްތިޔާޒް ވިދާޅުވިއެވެ.
ބިލު އޮތް ގޮތް ދިފާއު ކުރައްވައި ބިލުގެ ދިރާސާ ކުރުމުގެ މަރުހަލާގައި ވަރަށް ފުޅާ މިނެއްގައި ކޮމިޓީއިން ވަރަށްގިނަ ފަރާތްތަކާ ނުހަނު ފުޅާ ދާއިރާއެއްގައި މަޝްވަރާކޮށް އެކުލަވާލާފައިވާ ބިލެއް ކަމަށް ނޫސްބަޔާނުގައި ބުނެފައިވާ ކަމަށް ވެސް އިމްތިޔާޒް ވިދާޅުވިއެވެ.
އިންތި ވިދާޅުވީ އެފަހުން ކުއްލި ގޮތަކަށް ސަރުކާރުން ސްޓޭންޑް ބަދަލުކުރީ ކޮން ސަބަބަކާއި ހުރެކަން ބުނަން ނޭނގޭކަމަށެވެ. އަދި ސަރުކާރުން އެހާ ފަސޭހައިން ކަންކަމުގައި ސްޓޭންޑް ބަދަލުކުރަމުން ދިއުމަކީ ވަރަށް ބޮޑު މައްސަލައެއްކަމަށް އޭނާ ވިދާޅުވިއެވެ.
އަދި ސަރުކާރުން އެގޮތަށް ސްޓޭންޑް ބަދަލުކުރަމުންދާތީ ސަރުކާރުން ބޭނުންވާ ގޮތަކީ ކޮބައިކަންވެސް އޮޅޭކަމަށް އޭނާ ވިދާޅުވިއެވެ. އަދި ވާން އުޅެނީ ކިހެނެއްކަން ނޭނގޭކަން ފާހަގަކުރައްވާ އިންތި ވަނީ ބޮޑެތި ފާޑުކިޔުންތަކެއްވެސް އަމާޒުކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
