"ޗާގޯސް މައްސަލައިގައި ގަވައިދާއި ޚިލާފަށް ނިންމި އެއްވެސް ނިންމުމަކަށް އިޚްތިރާމެއް ނުކުރާނަން"
ދިވެހިރާއްޖޭގެ ސަރަހައްދުން ބައެއް ގެއްލުމުގެ ފުރުސަތު އޮތް ގޮތަށް ޗާގޯސް މައްސަލައިގައި ދިވެހި ސަރުކާރުން މޮރިޝަސް ކޮޅަށް ޖެހި ނިންމާފައިވާ އެއްވެސް ނިންމުމަކަށް ޕީޕީއެމްގެ ސަރުކާރެއްގައި އިޚްތިރާމު ނުކުރައްވާނެކަމަށް ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ވިދާޅުވެއްޖެއެވެ.
އެމަނިކުފާނު މިފަދައިން އިއުލާނުކުރައްވާފައިވަނީ ޕީޕީއެމް އޮފީހުގައި އޮތް ޖަލްސާއެއްގައި ވާހަކަދައްކަވަމުންނެވެ.
ޗާގޯސް މައްސަލައާއި ގުޅިގެން ސަރުކާރުން އަމަލުކޮށްފައިވާ ގޮތަށް ރައީސް ޔާމީން ވަނީ ނުރުހުން އަމާޒުކުރައްވާފައެވެ.
އެގޮތުން އެމަނިކުފާނު ވިދާޅުވީ ޗާގޯސްއަކީ މޮރިޝަސްގެ ތަނެއްކަމަށް ދުނިޔޭގެ އެއްވެސް ކޯޓަކުން މިހާތަނަށް ކަނޑައަޅާފައި ނުވާކަމަށެވެ. އެހެން އެކަން އޮއްވާ ރައީސުލްޖުމްހޫރިއްޔާގެ ސިޓީފުޅެއް ކުއްލި އަކަށް ފޮނުވަން ޖެހުނު ސަބަބަކީ ކޮބައިތޯ ރައީސް ޔާމީން ވަނީ ސުވާލު އުފައްދަވާފައެވެ. އަދި ރައީސްގެ އެ ސިޓީފުޅާއެކު ރައްޔިތުންގެ މަޖިލީހުގެ އިމްތިޔާޒަށްވެސް އަރައިގެންފައިވާކަމަށް އެމަނިކުފާނު ފާހަގަކުރެއްވިއެވެ.
"ކޮން ސިޓީއެއްހޭ ދީގެން މި އުޅެނީ؟ އަޅުގަނޑުމެންގެ ހައްގު ގެއްލޭގޮތަށް ކޮން ސިޓީއެއްހޭ ދީގެން މި އުޅެނީ؟ ހައްގު ގެއްލޭގޮތަށް ސިޓީއެއް ދީފިކަމަށް ވަންޏާ މި މައްސަލަ ނިމޭދުވަހަކުން ނިމިގެން އަންނައިރު އެ ސިޓީގައި އޮތް ގޮތަކަށް އަޅުގަނޑުމެންނަށް ގެއްލުންވެފައި، އަނެއް ބަޔަކަށް ފައިދާ ވާ ގޮތަކަށް މި ދެނީ. މިއީ ދިވެހިރާއްޖެ މިހާތަނަށް ގަބޫލު ކުރި އުސޫލެއް ނޫން. އަޅުގަނޑުމެން އޮތީ އަޅުގަނޑުމެންގެ ސަރަހައްދު ކަނޑައަޅާފަ"
ޕީޕީއެމްގެ ރައީސް ޔާމީން
އެއާއެކު ރައީސް ޔާމީން ވިދާޅުވީ ރައީސް ސޯލިހު މޮރިޝަސްއަށް ފޮނުވި ސިޓީފުޅާއެކު ރާއްޖޭގެ ސަރަހައްދުން ބައެއް ގެއްލިގެން ދިޔަނަމަވެސް، އެމަނިކުފާނުގެ ވެރިކަމެއްގައި އެ ސިޓީއަށް އަދި އެ މައްސަލައިގައި ގަވައިދާއި ޚިލާފަށް ނިންމާފައިވާ އެއްވެސް ނިންމުމަކަށް އިޚްތިރާމު ނުކުރައްވާނެކަމަށެވެ.
"2023 އަކީ ދިވެހި ރައްޔިތުންގެ އަހަރެއްކަމަށް ވަންޏާ އަޅުގަނޑުމެންނަށް މި ސަރުކާރު ލިބިއްޖެކަމަށް ވަންޏާ ގާނޫނާއި ޚިލާފަށް، ގާނޫނު އަސާސީ އާއި ޚިލާފަށް މިހާރު ސަރުކާރުން މި މައްސަލައިގައި ކޮށްގެން އުޅޭ ކަންތަކަށް އަޅުގަނޑު އިޚްތިރާމެއް ނުކުރާނަން. އެކަން އަނބުރާ ޖަހާނަން. އަޅުގަނޑު ކުރިންވެސް ދަންނަވަމުން ދިޔައިން މި ސަރުކާރުން ގާނޫނާއި ޚިލާފަށް ކުރާ ކަންތައްތަކަށް އިޚްތިރާމެއް ނުކުރާނަން އަޅުގަނޑުމެން"
ޕީޕީއެމްގެ ރައީސް ޔާމީން
ރައީސް ޔާމީން ވިދާޅުވީ މި ސަރުކާރުން ރާއްޖޭގެ ސަރަހައްދުން ބައެއް ދޫކޮށްލި ނަމަވެސް، އެމަނިކުފާނުގެ ވެރިކަމުގައި އެ ސަރަހައްދު ހޯދުމަށް ކުރެވެން ހުރި ހުރިހާ މަސައްކަތެއް ކުރާނެކަމަށެވެ.
ރައީސް ޔާމީން ވަނީ ޗާގޯސް މައްސަލައިގައި ސަރުކާރުން ނިންމި ނިންމުމާއި ގުޅިގެން ވަރަށް ބޮޑަށް ނުރުހުން ފާޅުކުރައްވާއެވެ. އެއާއެކު އެމަނިކުފާނު ވިދާޅުވީ އެ ސަރަހައްދު ހޯދުމަށް ބަދަލުދޭން ޖެހިއްޖެކަމަށް ވާނަމަ އެކަންވެސް ކުރައްވާނެކަމަށެވެ. އެހެން ނަމަވެސް މި ސަރުކާރުން އެ ނިންމި ގޮތަށް ރުހިވަޑައިގެން އެމަނިކުފާނު ނުހުންނަވާނެކަމަށް ރައީސް ޔާމީން ވަނީ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
