ލާމަރުކަޒީ ނިޒާމު ހިންގޭވަރަށް ފައިސާ ހޯދާކަމަށް ސަރުކާރަކަށް ނޭނގޭ: ޝިޔާމް

ލާމަރުކަޒީ ނިޒާމު ހިންގޭވަރަށް ފައިސާ ހޯދަން މި ސަރުކާރަށް ނޭނގޭކަމަށް މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެއެވެ.

ޝިޔާމު މިފަދައިން ވިދާޅުވެފައިވަނީ ލާމަރުކަޒީ ގާނޫނަށް ސަރުކާރުން ގެނައި އިސްލާހާއި ގުޅިގެން މަޖިލީހުގެ ކޮމެޓީއިން ނިންމި ގޮތުގެ ރިޕޯޓާއި ގުޅިގެން ވާހަކަދައްކަވަމުންނެވެ.

އޭނާ ވިދާޅުވީ ސަރުކާރުން މިހާރު އަމަލުކުރަމުންދާ ގޮތުން ލާ މަރުކަޒީ ނިޒާމަށް ރައްޔިތުންގެ އިތުބާރު ގެއްލެމުންދާކަމަށެވެ. އެގޮތުން ލާމަރުކަޒީ ގާނޫނަށް ކުއްލި ކުއްލިއަށް އިސްލާހުތައް ހުށައަޅާއިރު ސަރުކާރަށް މި ނިޒާމު ހިންގަން ނޭނގިގެން އުޅޭ މަންޒަރު ފެންނަމުންދާކަމަށް ޝިޔާމު ވިދާޅުވިއެވެ.

މި ސަރުކާރަކީ އަންހެނުން ބާރުވެރިކުރުމަށް އައި ސަރުކާރެއް ނަމަވެސް ލާމަރުކަޒީ ގާނޫނަށް ގެނައި އިސްލާހާއެކު އަންހެނުންނަށް ވަރަށް ބޮޑަށް އަނިޔާވެރިވެފައިވާކަން ޝިޔާމުގެ ވާހަކަފުޅުގައި ފާހަގަކުރެއްވިއެވެ.

އެއާއެކު ޝިޔާމު ވަނީ ރަށްރަށަށް ވަޑައިގެން ރައީސުލްޖުމްހޫރިއްޔާ އެއްވެސް ވިސްނުންފުޅެއް ނެތި ވައުދުވެވަޑައިގަތުން ހުއްޓާލުމަށްވެސް އިލްތިމާސްކުރައްވާފައެވެ. އެއީ ރައީސް ސޯލިހު އެފަދައިން ވާ ވައުދުތައް ފުއްދުމަށް އާމްދަނީ ހޯދޭނެ ގޮތެއް ސަރުކާރަށް ނުދެއްކޭތީކަންވެސް އޭނާ ފާހަގަކުރެއްވިއެވެ.

"ރައްޔިތުންނަށް އުންމީދުތަކެއް ދިނީ ކައުންސިލްގައި ތިއްބަވާނެއޭ ޑަބްލިއުޑީސީގެ ބޭފުޅުންވެސް، އަންހެނުންގެ ތަރައްގީއަށް މަސައްކަތް ކުރާ ކޮމެޓީއެއް އޮންނާނެއޭ، ފުލް ފަންކްޝަން ކުރާ ކޮމެޓީއެއް އޮންނާނެއޭ، އެ ރަށެއްގެ އެ މުޖުތަމައެއްގެ އަންހެނުންގެ ހައްގުގައި މަސައްކަތް ކުރާނެ ކޮމެޓީއެއް އޮންނާނެއޭ. އެހެން ނަމަވެސް މިއަދު މިވީ ކިހިނެއްތޯ؟ އެ ކޮމެޓީއިން މެމްބަރަކު ޒަރޫރީ ކަމެއްގައި މަޖުބުރުވެގެން އިސްތިއުފާދެއްވަން ޖެހުނަސް މި މެމްބަރަކު އިންތިޚާބު ކުރެވޭ ގޮތެއް ނުވޭ. ރައްޔިތުން މި މަޑުކުރަން ޖެހެނީ 365 ދުވަސް ވަންދެން. ކީއްވެގެންތޯ؟ އިންތިޚާބުތައް ބާއްވާނެ ފައިސާ ނެތީ. ނިޒާމު ހަމަ ބޮލަށް އަންނަހާ ނިޒާމެއް ވިއްޔާ މި ގެންނަނީ. އެކަމަކު އެ ނިޒާމު ހިންގާނެ ވަރަށް އާމްދަނީ ހޯދާކަށް ސަރުކާރަށް ނޭނގޭ"

ނައިފަރު ދާއިރާގެ މެމްބަރު އަހުމަދު ޝިޔާމު

ލާމާރުކަޒީ ގާނޫނަށް މިހާރު ހުށައަޅާފައިވާ އިސްލާހު ފާސްވެއްޖެނަމަ އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ ގޮނޑިއެއް ހުސްވެއްޖެނަމަ ދެން އެ ގޮނޑިއަށް މެމްބަރަކު އައްޔަން ކުރާނީ އެއް އަހަރު ދުވަހުގެ މުއްދަތެއްގައެވެ.

ސަރުކާރުން މިފަދައިން އިސްލާހު ހުށައެޅީ އަވަސް އަވަހަށް އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކުގެ މެމްބަރުން އިސްތިއުފާދެމުންދާތީ އިންތިޚާބުތައް ބާއްވަން ޖެހުމުން ބޮޑު ޚަރަދެއް ހިނގާތީކަމަށް ސަރުކާރުން ވަނީ ބުނެފައެވެ.

އެހެން ނަމަވެސް އެފަދައިން އިސްތިއުފާ ދޭން ޖެހޭ ސަބަބު ބިލު އެކުލަވާލިއިރު ދިރާސާކުރެވިފައި ނުވާކަން ގިނަ މެމްބަރުން ފާހަގަކުރެއްވިއެވެ. އަދި އެކަމަށްޓަކައި ސަރުކާރަށް ފާޑުކިޔުންތައްވެސް ވަނީ އަމާޒުކުރައްވާފައެވެ.