ޗާގޯސް މައްސަލައިގައި ރައީސް ޔާމީން ބަދަލުކުރަން ޖެހޭ ކަމެއް ނޯންނާނެ: މިއުވާން

ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމަށް ވެރިކަން ލިބިވަޑައިގަތަސް ޗާގޯސް މައްސަލައިގައި އިތުރަށް ބަދަލުކުރަން ޖެހޭ ކަމެއް ނޯންނާނެކަމަށް ރައީސް އޮފީހުގެ ތަރުޖަމާނު މިއުވާނު މުހައްމަދު ވިދާޅުވެއްޖެއެވެ.

ޕީޕީއެމް އޮފީހުގައި ރޭ ބޭއްވި ޖަލްސާގައި ވާހަކަދައްކަވަމުން ރައީސް ޔާމީން ވަނީ ޗާގޯސް މައްސަލައިގައި ސަރުކާރުން ގަވައިދާއި ޚިލާފަށް ނިންމާފައިވާ ނިންމުންތަކަށް އިޚްތިރާމް ނުކުރައްވާނެކަމަށް ވިދާޅުވެފައެވެ. އަދި މި މައްސަލަ ރާއްޖެއަށް ގެއްލުންވާ ގޮތަށް ނިމިއްޖެކަމަށް ވާނަމަ ބަދަލުދެއްވާފައި ނަމަވެސް ރާއްޖޭގެ ސަރަހައްދު ހޯއްދެވުމުގެ މަސައްކަތްޕުޅު ކުރައްވާނެކަމަށް އެމަނިކުފާނު ވަނީ ވިދާޅުވެފައެވެ.

ރައީސް ޔާމީންގެ އެ ވާހަކަފުޅުތަކާއި ގުޅިގެން ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ތަރުޖަމާނާއި ސުވާލުކޮށްފައެވެ. އެގޮތުން މި ސަރުކާރުގެ ސްޓޭންޑް ދެން އަންނަ ސަރުކާރަކުން ބދަލުކުރުމާއި މެދު ދެކޭ ގޮތަކީ ކޮބައިތޯ އާއި، އެ ގޮތަށް ސްޓޭންޑް ބަދަލުކޮށްގެން ރާއްޖެއަށް ވާނެ ގޮތަކީ ކޮބައިތޯ ނޫސްވެރިއަކު ވަނީ ސުވާލުކޮށްފައެވެ.

އެ ސުވާލަށް ޖަވާބުދެއްވަމުން މިއުވާން ވިދާޅުވީ ޗާގޯސް މައްސަލައިގައި ދިވެހި ސަރުކާރުން ދެން އިތުރަށް ނިންމަން ޖެހޭކަމެއް ނޯންނާނެކަމަށެވެ. އަދި ރައީސް ޔާމީން އިތުރަށް ބަދަލުކުރައްވަން ޖެހޭކަމެއްވެސް ނޯންނާނެކަމަށް މިއުވާން ވަނީ ވިދާޅުވެފައެވެ. މިހާރު ނިމިފައި އެ އޮތީ ބައިނަލްއަގުވާމީ ކޯޓަކުން ނިންމާފައި އޮތް ނިންމުމެއްކަމަށާއި، މިހާރުވެސް ޗާގޯސްއާއި ގުޅުންހުރި މައްސަލައެއް ބައިނަލް އަގުވާމީ ކޯޓެއްގައި ކުރިއަށް ދާކަމަށް އޭނާ ވިދާޅުވިއެވެ.

އެހެންކަމުން ބައިނަލް އަގުވާމީ ކޯޓަކުން ނިންމާ ނިންމުންތަކަށް އިޚްތިރާމް ނުކުރައްވާނަމަ އޭގައި ދެން ވިދާޅުވާނެ އެއްޗެއް ނެތްކަމަށާއި، އެހެން ނަމަވެސް ދިވެހި ސަރުކާރުން ދެން އިތުރަށް މި މައްސަލައިގައި ނިންމަން ޖެހޭ ކަމެއް ނެތްކަމަށް މިއުވާން ވަނީ ވިދާޅުވެފައެވެ.

"ރާއްޖޭގެ ސްޓޭންޑެއް ބަދަލުކޮށްގެން އިތުރަށް ބަދަލުވާނެ ކަމެއް ނޯންނާނެ. ދެން އައިސީޖޭގެ މައްސަލައިގައި އައިސީޖޭއިން ނިންމާފައިވާ ނިންމުން ތަންފީޒުކުރުމަށް އދ ގެ އާންމު މަޖިލީހަށް ހުށައެޅިއްޖެކަމަށް ވާނަމަ ރާއްޖެއިން ވޯޓުދޭނެ ގޮތަކާއި ގުޅޭގޮތުން އެއިރަކު އޮންނަ ސަރުކާރެއްގެ ޚާރިޖީ ސިޔާސަތާއި އެއްގޮތަށް ވޯޓުދެއްވާނެ. އަޅުގަނޑުމެންގެ ޚާރިޖީ ސިޔާސަތަކީ ޑީކޮލޮނައިޒޭޝަން އަދި އަޅުގަނޑުމެން ތާއީދުކުރަމޭ ޑީކޮލޮނައިޒް ވުމޭ އަޅުގަނޑުމެންގެ ސްޓޭންޑަކީ، އެހެން ވީމަ އެއާއި އެއްގޮތަށް އަޅުގަނޑުމެން ވޯޓުދެމުން ދޭނީ. ދެން އަޅުވެތިކަމާ މި ކަންކަމާ އެބޭފުޅުން ތާއީދުކުރައްވަންޏާ އެ ބޭފުޅުން އެބޭފުޅުން ސްޓޭންޑް ބަދަލުކުރާނެ"

ރައީސް އޮފީހުގެ ތަރުޖަމާނު މިއުވާން

ޗާގޯސް މައްސަލައިގައި ރައީސުލް ޖުމްހުރިއްޔާ ފޮނުވި ސިޓީ ފުޅާއި ގުޅިގެންވެސް ގިނަ ސުވާލުތަކެއް އުފެދިފައިވާއިރު، އެކަމާއި ގުޅިގެން މިއުވާން ވިދާޅުވީ ރާއްޖެއަށް ގެއްލުމެއް ލިބޭ އެއްވެސް ވާހަކަފުޅެއް އެ ސިޓީފުޅުގައި ނޯންނާނެކަމަށްވެ.

އަދި ދެ ގައުމެއްގެ ދެމެދުގައި ބަދަލުކުރެވޭ އެފަދަ ސިޓީފުޅުތަކަކީ އާންމު ކުރާ ލިޔެކިޔުންތަކެއް ނޫންކަމަށް މިއުވާން ވިދާޅުވިއެވެ.