އަރަބިއްޔާ ސުކޫލުގެ މަސައްކަތް ނިންމާނީ މިސަރުކާރުން!: މިއުވާން
މި ދައުރު ނިމެންވާއިރަށް އަރަބިއްޔާ ސުކޫލުގެ މަސައްކަތް ނިންމާނެކަމަށާ އެ ސުކޫލު ނިންމާނީ މިސަރުކާރުން ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގައި އަރަބިއްޔާ ސުކޫލު ބަޖެޓުގައި ހިމަނާފައި ނުވާ ސަބަބާއި ގުޅޭގޮތުން ނޫސްވެރިއަކު ކުރި ސުވާލަށް ޖަވާބުދެއްވަމުން މިއުވާން ވިދާޅުވީ، އެ ސުވާލަށް އެޑިއުކޭޝަން މިނިސްޓަރުވެސް މިހާރު ކޮންމެވެސް ވަރަކަށް މީޑިއާތަކަށް މައުލޫމާތު ހިއްސާކުރައްވާފައި ވާކަމަށެވެ.
ބަޖެޓުގައި ސުކޫލު އިމާރާތް ކުރުމުގެ މަސައްކަތް ހިމަނާފައި ނުވަނީ އިދާރީ ގޯހަކުންކަމަށް ބެލެވޭކަމަށާއި، އެހެން ނަމަވެސް އެ ސުކޫލުގެ މަސައްކަތް ކުރަމުންދާނެކަމަށް މިއުވާން ވިދާޅުވިއެވެ.
އެއާއެކު އޭނާ ވިދާޅުވީ އަރަބިއްޔާ ސުކޫލަށް ދިމާވެފައިވާ މައްސަލަތަކަށް ދާއިމީ ހައްލެއް ހޯދައިދޭނީ މި ސަރުކާރުންކަމަށެވެ.
"އަރަބިއްޔާ މައްސަލައަށް އިރާދަކުރެއްވިޔާ އަޅުގަނޑުމެން ހައްލު ގެންނާނަން. ބަޖެޓުގައި، މިއަދުދެން އެޑިއުކޭޝަން މިނިސްޓަރުވެސް ބައެއް މީޑިއާތަކަށް މައުލޫމާތު ދެއްވާފައިވާނެ އިދާރީ ގޮތުން އެ ފޮތުގައި ސީދާ އެ ވާހަކަ ޖެހިފައި ނެތީ ކީއްވެގެންތޯ އެ ބައްލަވާކަމަށް. އެހެން ނަމަވެސް 2 ސުކޫލުގެ ބަޖެޓަށް ސަތޭކަ އެތައް މިލިއަނެއް ހަމަޖެހިފައި ހުރި ވާހަކަ މި ދަންނަވާލީ. އެ މަސައްކަތް މިހާރު ކޮންޓްރެކްޓް ކުރެވި މަސައްކަތް ކުރިއަށް އެބަދޭ"
ރައީސް އޮފީހުގެ ތަރުޖަމާނު މިއުވާން
މިއުވާން ވިދާޅުވީ އަރަބިއްޔާ ސުކޫލު އިމާރާތް ކުރުމުގެ މަސައްކަތަކީ ފައިސާ ނެތިގެން ހުއްޓާލާ ވަރަށް ވުރެ މާ މުހިންމު ޕްރޮޖެކްޓެއް ކަމަށެވެ. އަރަބިއްޔާގެ ދަރިވަރުން މީގެ ކުރިން އުފުލަމުން ދިޔަ ތަކުލީފުތަކަށް ހައްލު ގެނެސްދޭނީ މި ސަރުކާރުންކަމަށް މިއުވާނު ވަނީ ތަކުރާރުކޮށް ވިދާޅުވެފައެވެ.
އަރަބިއްޔާ ސުކޫލުގެ ދަރިވަރުން މިހާރު ކިޔަވަމުންދަނީ ވަގުތީ އިމާރާތެއްގައެވެ. އެ އިމާރާތުގައި ގިނަ ދުވަސްތަކެއް ހޭދަކުރަން ޖެހުމަކީ ދަރިވަރުން އަސާސީ އެތައް ހއްގުތަކުން މަހުރޫމުކޮށްގެން ތިބެން ޖެހޭ ކަމެއްކަން ފާހަގަކުރައްވާ އަރަބިއްޔާ ސުކޫލުގެ ބެލެނިވެރިން ވަނީ ބޮޑެތި ކަންބޮޑުވުންތަކެއް ފާޅުކޮށްފައެވެ.
އަދި އަރަބިއްޔާގެ ދާއިމީ އިމާރާތް އެޅުމށް ބާ ޖަމާލުއްދީން ސުކޫލު ދިނުމަށްފަހު އެތަނުން ބޮޑު ޖާގައެއް އުނިކުރި ކުރުމަކީ ސުކޫލުގެ މުސްތަގުބަލަށް ހުރަސް އެޅިގެންދާނެ ކަމެއްކަންވެސް އެ ސުކޫލުން ފާހަގަކުރެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
