ދީނާއި ޚިލާފުކަމެއް ހިންގާނަމަ ސަރުކާރުން ފިޔަވަޅު އަޅާނެ: ތަރުޖަމާނު
އިސްލާމްދީނާއި ޚިލާފު އެއްވެސް ކަމެއް ހިންގާނަމަ ސަރުކާރުން އެކަމަށް އަޅަން ޖެހޭ ފިޔަވަޅު އަޅާނެކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ވަނީ އިސްލާމްދީނާއި ޚިލާފު ކަންކަން ރާއްޖޭގައި އާންމުވަމުން ދާއިރު ސަރުކާރުން ކަންބޮޑުވެގެން ނޫޅޭކަން ފާހަގަކޮށްފައެވެ. އަދި އެފަދަ ކަންކަން އާންމުކުރާ ފަރާތްތަކާއި މެދު ސަރުކާރުން ފިޔަވަޅު އަޅަމުން ނުދާކަން ފާހަގަކޮށްފައެވެ. އަދި އެފަދަ ކަންކަމަށް ސަރުކާރުން އަޅާނުލަނީ ކީއްވެތޯ އެ ނޫސްވެރިޔާ ވަނީ ސުވާލުކުރައްވާފައެވެ.
އެކަމާއި ގުޅޭގޮތުން ރައީސް އޮފީހުގެ ތަރުޖަމާނު މިއުވާން ވިދާޅުވީ އިސްލާމްދީނާއި ޚިލާފު ކަންކަން ކުރާނަމަ ސަރުކާރުން އެފަދަ ފަރާތްތަކާއި ދޭތެރޭ ފިޔަވަޅު އަޅާނެކަމަށެވެ. އަދި އެފަދަ ކަންތައްތަކަކީ ސަރުކާރުން ދޫކޮށްލާނެ ކަންކަމެއް ނޫންކަމަށް މިއުވާން ވިދާޅުވިއެވެ.
"ދީނާއި ޚިލާފު ކަމެއް ހިނގާނަމަ ސަރުކާރުން އެކަމާއި ގުޅިގެން އަޅުއްވަން ޖެހޭ ފިޔަވަޅުތައް އަޅުއްވާނެ. ސަރުކާރު ހަމަ ބަލަންވެސް ބަލާނެ އެކަހަލަ ކަމެއް ހިނގައިފިކަމަށް ވާނަމަ، އަޅުގަނޑުމެން އެއްވެސް ގޮތަކަށް ދޫކޮށެއް ނުލާނަން. ދިވެހިރާއްޖެއަކީ ސައްތައިން ސައްތަ އިސްލާމީ ގައުމެއް. އިސްލާމްދީނާއި ޚިލާފު ކަންތައްތަކެއް ހިންގުމުގެ ފުރުސަތެއް ސަރުކާރުން ނުދޭނެ"
ރައީސް އޮފީހުގެ ތަރުޖަމާނު މިއުވާން
މިއުވާން މިފަދައިން ވިދާޅުވެފައި ވީނަމަވެސް ދާދި ފަހުން ހިތަދޫގައި މަގު ހަދަން ފެށިއިރު ހިންދޫއިންގެ އަޅުކަމެއް ކުރަމުންދާ މަންޒަރު ފެނިގެންދާ ވީޑިއޯއެއް ވަނީ އާންމުވެގެން ގޮސްފައެވެ. އޭގެ އިތުރުން މީގެ ކުޑަ ދުވަސްކޮޅެއްކުރިން ބިލެއްދޫގައިވެސް އިންޑިއާ ބަޔަކު ހިންދޫ ދީނުގެ ޚާއްސަ ދުވަހެއް ފާހަގަކުރުމަށް އަޅުކަމެއް ހިންގާފައިވާ މައްސަލައެއްވެސް ވަނީ ފެންމަތުވެގެން ގޮސްފައެވެ.
މި ނޫނަސް މިފަދަ އެތައް މައްސަލައެއް ފެންމަތިވެގެން ގޮސްފައިވާއިރު މިއިން އެއްވެސް ކަމަކަށް ފިޔަވަޅު އަޅާފައި ނުވާކަން ފާހަގަކޮށްލެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
