ހޯޑެއްދޫ އޮޕަރޭޝަންގެ ތެރެއިން އިތުރު 69 ކިލޯ މަސްތުވާތަކެތި ހޯދައިފި
ގދ. ހޯޑެއްދޫގައި ފުލުހުން ހިނގަމުންދާ އޮޕަރޭޝަންގެ ތެރެއިން އެރަށާއި އެ ރަށާ ކައިރީގައި އޮންނަ ފަޅުރަށެއްގައި ވަޅުލާފައި ހުރި 69 ކިލޯގެ މަސްތުވާތަކެތި މިއަދު ހޯދާފައިވާ ކަމަށް ޕޮލިސް ކޮމިޝަނަރު މުހައްމަދު ހަމީދު ވިދާޅުވެއްޖެއެވެ.
މިކަމާއި ގުޅޭގޮތުން މައުލޫތު ދެއްވަމުން ސީޕީ ހަމީދު މިއަދު ކުރެއްވި ޓުވީޓެއްގައި ވިދާޅުވީ، މިދިޔަ ބުރާސްފަތި ދުވަހު ފުލުހުންނަށް ހޯޑެއްދުއިން ފެނުނީ 13 ކިލޯގެ ހެރޮއިން ކަމަށެވެ. އަދި މިއަދު ހޯނޑެއްދުއާއި އެ ރަށާ ކައިރި ފަޅު ރަށަކުން 69 ކިލޯގެ މަސްތުވާތަކެތި ފެނިފައިވާ ކަމަށާއި އެހެންކަމުން މި ދެ ދުވަހު ފެނުނު މަސްތުވާތަކެތީގެ އަދަދު 82 ކިލޯއަށް އަރާ ކަމަށް ސީޕީ ވިދާޅުވިއެވެ. އަދި އެ މަސްތުވާތަކެތީގެ ތެރޭގައި ހިމެނެނީ ހެރޮއިން އާއި މެތެމްފެޓަމިން ކަަމަށް ވެސް ސީޕީ ވިދާޅުވިއެވެ.
ހޯޑެއްދޫގައި ފުލުހުން ހިނގަމުންދާ އޮޕަރޭޝަންގެ ތެރެއިން އެރަށު ވަޅުލާފައި ހުރި ގިނަ އަދަދެއްގެ މަސްތުވާތަކެތި ފެނިފައިވާކަން މިދިޔަ ހުކުރު ދުވަހު ވެސް ފުލުހުން ހާމަކުރި އެވެ. އަދި އެ ހޯދި މަސްތުވާތަކެއްޗަކީ ހޯޑެއްދޫ އިން ފުލުހުން ހައްޔަރުކުރި ތިން މީހުންގެ ތެރެއން ހައްޔަރުގައި ހުރި އެކެއް ފޮރުވާފައިވާ ތަކެތި ކަމަށް ސީޕީ ވަނީ ވިދާޅުވެފައެވެ. އެހެންނަމަވެސް، އެދުވަހު ފެނުނު މަސްތުވާތަކެތީގެ ބާވަތާއި ބަރުދަނެއް ފުލުހުން ހާމަކޮށްފައެއް ނުވެއެވެ.
ހޯޑެއްދޫގައި ފުލުހުން ހިންގަމުންދާ އޮޕަރޭޝަންގެ ތެރެއިން ހައްޔަރު ކުރި ތިން މީހުންގެ ތެރެއިން ރަޝީދު ވަނީ ފުލުހުންގެ ބެލުމުގެ ދަށުގައި ހުއްޓާ ނިޔާވެފައެވެ. އަދި އޭނާ ނިޔާވީ ފުލުހުންގެ އިހުމާލުން ކަމަށް އާއިލާ އިން ބުނެފައިވަނިކޮށް، ޢާއިލާގެ ނުގަބޫލުގައި އޭނާގެ ޕޯސްޓްމޯޓަމް ހެދުމަށް މިހާރު ވަނީ ހަށިގަނޑު އިންޑިއާ އަށް ފޮނުވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
