ހިމަބިއްސާއި ރުބެއްލާ ވެކްސިންގެ ގައުމީ ކެމްޕެއިނެއް ފަށައިފި

ހިމަ ބިހި ނުވަތަ މީސްލްސް އައި ރުބެއްލާ އިން ރައްކާތެރިވުމުގެ ގޮތުން ދޭ ވެކްސިންގެ ގައުމީ ކެމްޕެއިން މިއަދު ފަށައިފިއެވެ.

މި ކަމާއި ބެހޭގޮތުން ހެލްތު ޕުރޮޓެކްޝަން އެޖެންސީ (އެޗްޕީއޭ) އިން ކުރި ޓްވީޓެއްގައި ބުނީ މި ކެމްޕެއިން އިފްތިތާޙްކޮށްދެއްވާފައިވަނީ އެއިޑްސް ދުވަސް ފާހަގަކުރުމަށް ހދ. ކުޅުދުއްފުށީގައި ކުރިއަށްދާ ހަރަކާތްތަކުގެ ތެރޭގައި ސިއްޙީ ވުޒާރާގެ ސްޓޭޓް މިނިސްޓަރު އަހުމަދު ގާސިމްކަމަށެވެ.

މިއީ ހެލްތު ޕްރޮޓެކްޝަން އެޖެންސީ (އެޗްޕީއޭ) އާއި ސޮސައިޓީ ފޯ ހެލްތު އެޑިއުކޭޝަން (ޝީ) އަދި ޕަބްލިކް އިންޓަރެސްޓް ލޯ ސެންޓަރ (ޕީއައިއެލްސީ) ގުޅީގެން ކުރިއަށް ގެންދާ ކެމްޕެއިނެކެވެ.

މި ކެމްޕެއިންގެ މަގްސަދަކީ ވީހާވެސް ގިނަ ރައްޔިތުންނަށް ވެކްސިން ފޯރުކޮށްދިނުން ކަމަށް އެޗްޕީއޭއިން ބުންޏެވެ.

ކުޅުދުއްފުށީގެ އިތުރުންވެސް ރާއްޖޭގެ އެކި ކަންކޮޅުތަކުގައި މި ކެމްޕެއިންގެ ހަރަކާތްތައް ކުރިއަށް ދާނެއެވެ. ކުރިއަށް އޮތް ދެހަފުތާ ތެރޭގައި ރާއްޖޭގެ އެކި ހިސާބުތަކުގައި ވެކްސިން ޖެހުމުގެ މަސައްކަތް ފަށާނެ ކަމަށް އެޗްޕީއޭއިން މައުލޫމާތު ދެއެވެ.

2017 ވަނަ އަހަރު ރާއްޖެއިން ހިމްބިހި ނައްތާލި ނަމަވެސް 2020 ވަނަ އަހަރު ހިމަބިހީގެ ކޭސްތަކެއް ފެނިފައިވެއެވެ. މިކަމަށް ކެމްޕެއިނެއް އެއަހަރު ފެށިނަމަވެސް ކޮވިޑުގެ ބަލިމަޑު ކަމާއި ހެދު ކެމްޕެއިން ވަނީ މެދުކަނޑާލާފައެވެ.

2020 ވަނަ އަހަރު ރާއްޖެއިން  ރުބެއްލާވެސް ނައްތާލާފައިވާކަމަށް ދުނިޔޭގެ ސިއްހަތު ޖަމިއްޔާއިން ފާހަގަކޮށްފައިވެއެވެ.

މީސްލްސް އަކީ ވައިރަހެއްގެ ސަބަބުން ޖެހޭ ގައިން ގަޔަށް އަރާ ނުރައްކާތެރި ބައްޔެކެވެ. މި ބަލީގެ އަލާމަތްތަކުގެ ތެރޭގައި ހުން އައުމާއި ކެއްސުމާއި ދެލޮލުން ފެން އައުން ހިމެނެއެވެ.  ރުބެއްލާ އަކީ ވެސް ވައިރަހަކުން ޖެހޭ ބައްޔެކެވެ. މިބަލީގެ އަލާމާތް ތަކުގެ ތެރޭގައި ކަރު ތެރޭގައި ރިއްސުމާއި ގައިގެ އެކި ހިސާބުތަކުގައި ބިހިތަކެއް ނެގުން ހިމެނެއެވެ.